Maatiiu 7

Taa nín̄ sòoǹ ki bíiĺ tɔb

1 «Taa nín̄ sòom̀maan tɔb bɔti, ní Unimbɔti ń taa sòoǹ ni mun yati. 2 Min min ní a dì kí sòoǹ a-nabiki bɔtee, míǹ ní Unimbɔti làá dī kí sòoǹ si mun yati. A nín ŋmàntī min kí tīī a-jutee, míǹ ní u làá dāá ŋmàntī kí tīī si mun. 3 Ba pu ní a wāĺ kimɔmbiki kin kā a-nabiki nimbilinee, ní kaa wāĺ didɔjal din kā sii a-ba yalinee? 4 Mana ní a ŋūǹ kí lì yii: <M-nabiki, yàntī ḿ lēē-si kimɔmbiki a-nimbilin,> ŋyunti ŋun didɔjal kā sii nimbilinee? 5 Mpoonnyoondaan, péé kí lēē didɔjal din kā sii a-ba nimbilinee kí wàatī, ní kí nín wāl̀ mmɔntiimin kí lēē kimɔmbiki kin kā a-nabiki yalinee.

6 «Ní taa dū tin bí circiree kí tīī iboo, yaa sá fám i làá fàtī ni-pu kí tɔ̀ntī-ni. Ní taa dū ni-beedimbiliŋ kí lúkú igbeeti, yaa sá fám bi làá tāā kí bīil̀.»

Un bàlifēe kāntí ní

(Luuki 11.9-13, 6.31)

7 «Mèèmaan Unimbɔti, u làá tīī-ni. Nyàab̀maan, u làá yàntī ní ká. Fáámaan, u làá pìitī-ni kipunyɔkɔ. 8 Kun puee sii un yaa mēē Unimbɔti tibee, see ú tīī-si kudɔŋu, ní sii un yaa nyàab̀ tibee, see á ká kudɔŋu, sii un yaa tí yú ki fátée, see bí pìitī-si. 9 Ni-kansikin ubɔ jipɔɔn di yaa mēē-u kpɔnɔ, u kíikí kí dū ditaŋkpal kí tīī-uaaa? 10 U yaa tí mēē-u ujɔm, u kíikí kí dū ukoobu kí tīī-uaaa? 11 Nimbi binikpitib nyí kí tīī ni-biyaamu tiwammɔntiil, kin ataa aŋa pu ní ni-Baa un bí yilpuee kaa nín ŋūǹ kí dū tiwammɔntiil kí tīī bin mèé-uee?

12 «Min ní ni yaa là bí ŋá kí tīī-nee, ŋámaan míǹ kí tīī bi mun. Mooyiisi marab nì Unimbɔti bɔnaatiliibi gbɔnti nín lì puee dee^a.»

Kipunyɔkɔwaai bɔti

(Luuki 13.24)

13 «Dīmaan kipunyɔkɔwaai kí kɔ́. Kun puee kipunyɔkɔ nì nsan ŋun wāāyee di cáǹ binib diwaŋkilin, niin ní kunipaau nóó. 14 Ama kipunyɔkɔwaai kin pɔ̄ɔ̄ dijitilee nì nsan ŋun kaa wāāyee di cáǹ binib dimaŋfal laŋki, binib fiii di kāntí-ŋu kí dī.»

Busubu nì bu-biliŋ bɔti

(Luuki 6.43-44)

15 «Ní nīn nyím̀maan ni-ba nì bin yíì bi-ba yii Unimbɔti bɔnaatiliibi kin kaa sée. Bi yaa dòoń ni-ceeyee, bi bí soooo kii apibilee, ama ní bi-pɔbiliŋ sá isaakpan yaŋ ki cútí. 16 Bi-tuuŋŋi ní ni làá dūú béé-bi, kun puee baa tòó atùun abɔjanaakun pu, kaa tí kìtī kɔŋkib bukuŋkumbu pu. 17 Busumɔntiibu sá kamaa lòoǹ asubimɔnti ní, ní busukpitibu lòoǹ asubikpiti. 18 Busumɔntiibu kaa ŋūǹ kí lòoǹ asubikpiti, míǹ ní busukpitibu kaa tí ŋūǹ kí lòoǹ asubimɔnti. 19 Isufi in kɔkɔ kaa lòoǹ asubimɔntee, bi làá gāā-i ní kí tɔ̄ ŋŋmin. 20 An puee, bin yíì bi-ba yii Unimbɔti bɔnaatiliibi kin kaa sée tuuŋŋi ní ni làá dū kí béé-bi.»

Yeesu boonnooliibi tiŋman pu yab

(Luuki 13.25-27)

21 «An kaa sá bin kɔkɔ yíì-mi yii: <M-Dindaan, m-Dindaanee> di làá dāá kɔ́ Unimbɔti Beelin, asee bin ŋáań min m-Baa un bí yilpuee lèe baba di dāa kóò. 22 Ibɔsoon dalee binib tikpil làá dāá lì-mi yii: <Ti-Dindaan, ti-Dindaan, a-yindi puee, Unimbɔti kaa nìn sòon̄ nì ti, ti dūu nāatì binibaaa? Taa jìn̄ arasiniibi a-yindi puɔɔɔ? Taa ŋáaǹ maamaacib a-yindi puɔɔɔ?> 23 Niinee ní ḿ dāá tùkù-bi yii: <Maa nyí-ni ki ká kpataaa. Sútímaan niin kí wàatī-mi, nimbi bikpitiŋaliibee dee^b!>»

Adiin ali bɔti

(Luuki 6.47-49)

24 «Míǹ ní un kamaa yaa gbìl̄ man bɔti tin m sòon̄ nee ní ki yaa kíǹ ki ŋáań mimmee, udaan náań nì uciŋfiti un máń u-diiku ki tɔ́kɔ́ǹ ditaŋkpal puee ní. 25 Utaa dɔ́miń ki nìn̄, ní nnyiŋgbeen dɔ́miń ki léeǹ kudiiyee pu, ní kubuŋkpaaŋŋu jítì, ama kudiiyee kaa lítì, kun puee ku tɔ́kɔ́ ditaŋkpal pu. 26 Ama un kamaa di yaa gbìl̄ man bɔti tin m sòon̄ nee ní kaa ŋáań mimmee náań nì ugbaan un máń u-diiku ki tɔ́kɔ́ǹ dibul puee ní. 27 Utaa dɔ́miń ki nìn̄, ní nnyiŋgbeen dɔ́miń ki léeǹ kudiiyee pu, ní kubuŋkpaaŋŋu dɔ́miń ki jítì, ní ku lítì ki nàn̄ dúsi dusi.»

Binib bākatì nì Yeesu bɔsòontam

28 Yeesu nín sòon̄ ki dàkā samaayee ki dóòyee, ní u-dàkatam gbanti kɔ́-bi tikpil, 29 kun puee úǹ dàkatamee cáá mpɔn, kaa bí kii bimaradakaliibi yamee.