Nawum i

Kugbɔŋu kun sòoǹ

Naawum

puee

Tibɔkilkaal

Nawum gbɔŋku sòoǹ Asuur yab tiŋyil Niiniifi lítitam pu ní. Isirayeel yab nìn bí Asuur yab gbanti taapu ní. Asuur yab jáń ki fōō Teebi tiŋki ní Babiloon yab nāaǹ Niiniifi tiŋki. Ŋyunti gbanti poon ní bi ŋmàn̄ kugbɔŋu nee.

Kugbɔŋu nee cáá ajan ata ní:

- Dijampeepeekaal sòoǹ kugbɔŋu nee kɔkɔ bɔkilkaati pu, ní ki dàkà Unimbɔti pɔŋŋu ŋun kpòotī tiwannáaŋkaal kɔkɔ ki sòoǹ duulinya bɔtee (1.2-8).

- Dijanliliitiil cántí min ní mpɔn gbanti làá tɔ̄ ditundi kitiŋ bɔti bɔ́ntitam poon Nawum yuntiŋuee. Bi làá nàan̄ Niiniifi tiŋki ní Juuda yab ń fōō bi-ba.

- Dijantataatiil sòoǹ bi yaa kúntì Niiniifi tiŋki nì ki-pɔŋŋu, bi nín làá fàal̀ puee (2.4–3.19).

Unimbɔti bɔnaatiliu nyɔɔbundi kaa sá kí bāakì bi nín làá nàan̄ Niiniifi tiŋki puee ŋmaniŋma. Ama Nawum dàkā yii Unimbɔti bɔsooŋyi di làá nàan̄-kì. Niiniifi tiŋki cáá dilambil, ki cáá nnikpaakoon ki ŋá alaakpaatuun. Kì sá unil pɔŋŋu ŋun tɔ́kɔ́ tin pu Unimbɔti kaa lèe daaŋku ní. Díǹ pu nee Nawum gbɔŋku dàkà-ti yii mpɔn ŋun di bí mimmee làá kúntí.