Miika 7

Unimbɔti bɔnaatiliu yaliŋkii

1 Óo, man falaau na!

M sá kii unil un di nyáń

kí kìtī fiinyi subiliŋ

ŋyunti ŋun ní bi kìtī-ŋee ní,

ki cūtì kí nyàab̀ fiinyi biliŋ

ŋyunti ŋun bi kītì-ŋi ki dóòyee ní.

Báà difiinyisakal diba kaa kíǹ!

Báà difiigipɔmbil din

m néeńee kaa bí!

2 Bin yú nì Unimbɔti deedeeyee

kúntì kitiŋ nee pu,

báà ubulcinnil ubɔbɔ kaa ti bí.

Báà unil kaa ti bí ki-ni ki yú deedee nì Unimbɔti.

Bi-kɔkɔ pée dàkafī nnikpaakoon pu ní.

Báà ŋma pīil̀ u-juti kutaliŋŋu.

3 Bi yáb̀ kí ŋá ikpiti.

Kí wàatī bí ŋá tiŋanee,

bibɔtiibi sīintí bi nín là puee,

ní bibɔsoonliibi sīintí kunimbiŋmiiu,

ní akpambal lì bi nín là puee.

4 Bi-kansikin un pée sá unimɔntee

bí kii abɔjanaakunee ní,

un pée sá deedeedaanee

jítiǹ kukuŋkuncikuu pu.

Ni-tafadaaldi yuntiŋu bāań dee.

Ni-bɔnaatiliibi bin cí-nee

nìn sòon̄ an pu.

Too, kɔŋkɔnnee, naa ti nyí tin poon ni bée.

5 Ní taa fōō ni-jutiibi bɔti kí kíí,

kí taa nín̄ máká ni-bɔɔbi pu.

Báà sii a-ba nimpuu nimbiin gba,

á nīn nyí nì a-ba nì tin a sòoǹee.

6 Di sá yii kibininjabiki sìí ki-baa,

ní kinimpubiki jáà nì ki-na,

ní unimpu nì u-beel kaa kpí^a.

Báà ŋma nannanliu sá u-dicaŋkun yɔu ní.

7 Ama mamee, ti-Dindaan watil pú ní m kpèé,

Unimbɔti un làá fīī-mee pu ní m máká.

M-Nimbɔtiu làá pīlifiǹ-mi.

Isirayeel yab máká Unimbɔti pu

8 Nimbi ti-nannanliibi, ní taa nín̄ fàal̀maan

tin bāań-ti nee pu.

Báà ti yaa lítì,

ti làá fàtīí yīkì.

Báà ti yaa bí dibɔmbɔndin,

ti-Dindaan di sá ti-walifiŋu.

9 Diŋuul din ti-Dindaan gíí ti-puee,

ti máaǹ kí fōō-dì,

kun puee ti yīntiǹ-u.

Ama ŋyunti bí ki dòoń,

u làá sòoǹ ti-bɔti kí pɔ̀-ti.

U làá dāá nyāntí-ti kí gíiǹ ŋwalifin,

kí gbéeǹ-ti u-ŋanti.

10 Ti-nannanliibi yaa láa ká mimmee,

bi làá dāá kɔ́ icoo ni.

Bíǹ bin nìn bàlifī-ti yii:

«Ni-Dindaan ni-Nimbɔtiuee bí lee?»

Bi làá dāá tāā-bi kí ŋmàtifì

kii adan pu kpatee.

Ti làá dāá ká míǹ nì ti-nimbibulii.

11 Ŋwiin bí ki dòoń,

bi làá dāá fàtīí mā digundi

kí tū ni-tiŋyil.

Ŋwiin gbantee,

ni-tiŋki làá dāá wàan̄ kí kūtì.

12 Ŋwiin gbantee, ni-nabiyaamu

làá dāá fàtīí gítiń ni-cee.

Bi làá dāá nyānní

Asuur nì Eejipiti timmun,

Niil nì Eefiraati mɔɔgbaŋŋi,

kí nyānní tiŋku ubɔ kí cáá sāā un kíǹee,

dijool diba kí cáá sāā din kíǹee kí dāan̄.

13 Kitiŋ laakin kɔkɔ kíǹee

làá dāá kpántí kuteeu

binib bin kóò ki-puee kpitii pu.

14 Ti-Dindaan, dū a-pikpaadɔŋu

kí kpàà a-nibul din sá a-fakalee.

Dì bí kuteeun di-baba

isufi in lòoǹ abilee māntìi tú-dì.

Péetí-dì kí cùnnì Baasan pikpaakun

nì Galaadi tiŋkin kii dooooyee.

15 Kii ŋyunti ŋun a nìn

nyántìń-ti Eejipiti tiŋkinee,

gíti ŋá a-maamaaci tuuŋŋi kí dàkà-ti.

16 Atimbun ŋin kíǹee nib làá dāá ká míǹ

ní icoo ń dāá cúú-bi,

min kamaa bi cáá mpɔnee.

Bi làá dāá cúú bi-nyɔmmu,

ní bi-tafaliŋ ń kpáá baa ti gbìl̀.

17 Bi làá dāá bàlim̀ ntampukumin

kii ikoobu nì ipeel in fù i-biŋŋi puee.

Bi làá dāá nyānní bi-balilaŋki

bi-wunti jìkì kí dāan̄

sii ti-Dindaan ti-Nimbɔtiu cee.

Bi làá dāá fàŋkì-si.

18 Ti-Dindaan, Unimbɔti ulɔu

di gíti bí kii sisee?

A lèekī a-nibul din kíǹ

ki bí dimaŋfalinee yìntitam,

ki pūǹ di-kpitii.

Aa fòol̄ diŋuul kí nīn cá jaanjaan,

ama an mɔ̄ǹ-si

á nīn dàkà-ti a-ŋanti.

19 A làá fàtīí tí sɔ̄ ti-saai,

a làá tāā ti-yìntitam kí múĺ,

ní kí dū ti-kpitii kí tɔ̄ tiŋku taapu taapu.

20 A làá dàkà Jaakɔb naantiibi a-deedeeu,

kí dàkà Abraam naantiibi a-laŋŋaŋfitiiku,

kii a nín nìn pūtì ki pōoǹ

ti-baabi dooooyee puee.