Miika 6

Ti-Dindaan nì u-nibul cáá ibɔsoon

6

1 Ní pīlifìmaan tibɔti tin ti-Dindaan sòon̄ee.

Yīkì kí sòoǹ kí mɔ̄tì m-pu

ajoon nimbiin,

kí mɔ̄tì m-pu ŋgbantamu nimbiin.

2 Nimbi ajoon nì dinyeel din pu

kitiŋ tɔ́kɔ́ kaa cìŋkēe, pīlifìmaan.

Ti-Dindaan yíiń u-nibul ibeeyiin,

u bíi sòoǹ Isirayeel yab bɔti.

3 U bí yii: «M-nibul, ba ní m ŋá-si ní?

Digìńdi dilal poon ní m kɔ́ǹ-si ní?

Á kíí-mi!

4 M nín nyántìń-si Eejipiti tiŋkineeyaaa,

m nín dá-si ki nyántì kuyuŋuneeyaaa,

m nín tú Mooyiisi nì Aarɔn nì Miiriyam

bí kpòotī-see ní m yīntì ní^a.

5 M-nibul, á téetí tin bí nee!

Moowaab bɔtiu Balaaki

nìn bɔ́ntì kí ŋá-si tikpitil.

Téetí tin Beewɔɔr jipɔɔn

Balaam nìn kíí-uee.

Míǹ boonee, a yíkì Siitiim tantakalin

ki cūtì Giilgaal paaŋŋu pu.

A nìn ŋúń ki ká tiŋaŋkpaandi

tin man a-Dindaan ŋá ki tīī-see.»

Unimbɔti nín là unil ń nīn bí puee

6 Ti yaa dɔ́miń kí jāam̀ ti-Dindaanee,

ba ní ti máaǹ kí nīn ŋúb́

kí cáań kí ŋá saraa kí tīī

Yilpu Fɔ́ŋŋŋ Nimbɔtiu dee?

Ti kalin cāabìń dibindi diba nabil

kí ŋá saraa kí tīī-uaaa?

7 U là ipijaa kutukub naaa,

ŋkpam ń nīn pùub̀

ibun kutukub kutukub poon ní?

Tí dū ti-jipɔŋkpilib kí ŋá saraa ti-yìntitam puɔɔɔ,

ti nín dù ti-poon naŋu

kí ŋá saraa ti-kpitii pu ní?

8 Unil, ti-Dindaan dàkā-si tin ŋān̄ee.

Kun u bàlifī-see di sá

á nīn ŋáań tin bí deedeeyee,

kí nīn néeń ki ŋáań tikɔkɔ nì tiniti

ní kí nīn nóó a-Nimbɔtiu nì dibasintil.

Inaamuul dambi nì bi ŋáań tipɔmbɔtee tafadaaldi

9 Ti-Dindaan bíi sòoǹ nì

bin kóò kitiŋ nee poonee!

U làá fīī bin fàŋkí-uee.

«Pīlifìmaan, Juuda naakookun yab,

nimbi bin kɔkɔ kóoǹ ki

kpáfì kitiŋ nee poonee!

10 Binikpitib dumpuyee,

bi kāntí tigaajawan

tin bi mūul̀ binib ki kée ní.

Di sá yii ni cáá tiwaŋŋmantikaal

tin kaa bí deedeeyee ki mùul̄ binib.

An sá ntimbiil tuuŋŋi ní.

Maa ŋūǹ kí nīn wāĺ míǹ kí nīn kā ki ŋmí.

11 Biba tútì bi-saniyab

baa ti ŋmàntī tiwan deedee,

ki cáá bi-lookun ataŋkpee ŋin

bi cáa ŋmàntī nnyiŋfee mili pu

ki cáa mùul̄ binib.

Ḿ sòoǹ kí pɔ̀ binib gbantaaa?

12 Kitiŋ nee gaajab fìkì binib ŋma ní.

Ki-nib sá binyimɔndambi ní.

Bi yaa pée wāaǹ kinyɔkɔ kí sòoǹee,

an sá kí kīil̀ binib ní.

13 An pu ní m dū falaa ki gbáń-ni,

ki làá nàan̄-ni ni-kpitii pu.

14 Ni làá jī ama kaa làá díkì,

ŋkùm làá nīn pée bí ni-dicaŋŋin ní.

Ni làá dāá kpāafì ni-kpaajinti,

ama tì làá bùkū.

Báà ni yaa láa kpáafì ni-wanti tibaaa,

m làá dāá bīil̀-tì kujaaun.

15 Ni làá dāá kpɔ̀ kí bɔ̄l̀,

ama kaa làá dāá ŋmā kí cā.

Ni làá dāá ŋmáaḿ kí lēē ɔliifi subiliŋ kpam,

ama kaa làá dāá ká-mì kí ŋmìtī.

Ni làá dāá ŋàan̄ ndaam,

ama kaa làá dāá nyɔ̀-mì.

16 Ni nóó ubɔti Oomirii

nì u-jipɔɔn Akaab

dicaŋkun yab bimbikpitim.

Ni ŋáań kii binib gbanti nín ŋáań puee.

An pu ní m làá nàan̄ ni-tiŋki,

ní kí yàntī bin kíǹee ń nīn bèel̄

nimbi bin kóò ki-nee.

Icoo in jíń m-nibulee

làá jī ni mun.»