Yoona i

Kugbɔŋu kun sòoǹ

Yoona

puee

Tibɔkilkaal

Kugbɔŋu nee máafí-ti digìńdi din Unimbɔti bɔnaatiliu Yoona kée. Yoona nìn bíi pɔ̄ɔntí u-ba kí taa ŋá Unimbɔti nín bí yii ú ŋá puee. Di sá Unimbɔti nìn tú-u ú cù Asuur tiŋyil Niiniifi, Isirayeel nannanliibi cee kí tùkù-bi yii bí kpántí bi-ba. Tibɔti tin bí kugbɔŋu nee jancukul kamaa poonee sá didàkal ní kugbɔŋu kɔkɔ là kí dàkà-ti.

Yoona bɔti nee lèekī ibaamɔn in ti máaǹ kí nīn nyí Unimbɔti puee iba ki dàkà-ti. Mpeekaamee tí béé yii an kaa sá Isirayeel yab baba ní Unimbɔti néeń, ama u néeń ki kpáaǹ binifantantiibi bin di yaa dū u-neendi din u cáá inifunaan puee ki yíiń tibɔŋmanee. Nliliitiimee tí béé yii báà binib yaa yīntiǹ Unimbɔti min kamaa ní u yaa yóoǹ yii u làá dáaĺ bi-tafal, ama ní bidambi yaa fāŋkì-u, ki pílifì u-nyɔkɔ ní ki kpántì bi-bimbimee, asee ú dū bi-kpitii kí pɔ̄-bi kí taa ti dáaĺ bi-tafal. Njoolkaamee tí béé yii tiwan tin kɔkɔ Unimbɔti náańee kā u-ŋaan, cilinjee unil maŋfal nì u-kúm. An pu ní Unimbɔti bɔnaatiliu Yoona kaa cáá nsan kí gíí diŋuul Unimbɔti nín dū Niiniifi yab nín yīntiǹ-u puee ki pú-bee. Yoona gbɔŋku gíti dàkà-ti yii dinimbinaamandi nì icɔŋki nì diwuŋyɔtil ŋūǹ kí bàń unil un kamaa ní Unimbɔti dū ditundi diba ki ŋúbiǹee. Kugbɔŋu nee gíti tí dàkà-ti yii Unimbɔti kaa féeń u-bɔnaatiliu ú nīn bí u-baba kaa nyí tin poon u bée, kaa yàntī u-bɔnaatiliu ń sāǹ-u kí cù ndan. Unimbɔti kíí kí nīn pée sòoǹ ki bùsī, ki lèekī taapu ki tùkù binib kaa gbèentí yii úǹ néeń bi-kɔkɔ kaa gàntī.

Yeesu tɔ́kɔǹ tin nìn jítì Yoona puee ní ki sòon̄ úǹ u-ba kúm nì u-fìkititam bɔti, ní ki dū Niiniifi yab nín nìn fōō Unimbɔti bɔti ki kpántì bi-bimbim puee ki sòon̄ nì u-yuntiŋu nib (Maat 12.38-42, Luuki 11.29-32).