Yoona 1

Kugbɔŋu kun sòoǹ

Yoona

puee

Yoona mākaǹ kí sāǹ kí báĺ ti-Dindaan

1 Dalba ti-Dindaan nìn sòon̄ nì Amiitaayi jipɔɔn Yoona ki bí-u yii: 2 «Yīkì kí cù Niiniifi^a kitiŋkpaaŋŋi poon kí bāakì kí tùkù kitiŋ gbanti nib yii bi-kpitii nyāŋkì, di sá yii m-nimbil ká ikpiti in bi bí ki ŋáańee.»

3 Ama ní Yoona yíkì ki dūu túĺ Taarsiisi tiŋki pú, kí sāǹ kí cù ndandati ti-Dindaan ń taa ti ká-u. U yíkèe ní ki nín sìntī Jaafa^b tiŋkin ki bàn̄ ki ká meela ubɔ bɔ́ntì ki cá Taarsiisi tiŋkin, ní u pàn̄ ki kɔ́ ki kāl̀ meelan bí cáá-u kí nīn cá Taarsiisi tiŋkin ú cùú báĺ ti-Dindaan.

4 Ní ti-Dindaan dū kubuŋkpaaŋŋu kubɔ ki tɔ́ tiŋku pu. Kubuŋkpaaŋŋuee bíi fīintí tiŋku mpɔn mpɔn ní ki bàà làá wīī meela. 5 Niinee tifaandi kɔ́ meela tɔntɔnliibi, ní báà ŋma kíǹ ki bíi tíminsí ki yíì u-nimbɔtiu^c. Ní bi yōoǹ tiwan tin bi tākaǹ meelanee kɔkɔ ki tɔ́ tiŋkun kí ŋmā kí bàtī meela nyiŋfiŋu pu. Nì mimmee, Yoona úǹ pée kɔ́ meela poondiikun ki dōoǹ ki bíi gèeǹ fɔ̀rtititi! 6 Ní meelan tɔntɔnliibi kpiliu sútì ki pìl̄-u ní ki bí-u yii: «Sii dɔ̄ ki gèeǹ níii? Yīkì kí tīminsì kí yíiń a-nimbɔtiu. An yaa yíì úǹ làá sɔ̄ ti-saai kí jòoń-ti tí taa kpú.» 7 Ní meelan tɔntɔnliibi bí tɔb yii: «Ní yàntī tí tɔ̄maan kasi kí béé udaan un pu ní dinimbinaamandi nee dī ki bāań-tee.» Bi tɔ́ kasee ní an dūu tāā Yoona. 8 Ní bi bālifì Yoona yii: «Too, sii un pu dinimbinaamandi nee dī ki bāań-ti nee, a-tundi baasii sá dilal ní doo ní? La pu ní a nyánní ní? A sá kitiŋ kilakan ní? A sá dinibul dilal niliu ní?» 9 Ní Yoona kíí-bi yii: «Man sá ueebruja ní. Ti-Dindaan yilpu Nimbɔtiu un náań tiŋku nì kitiŋee ní m jáaḿ!» 10 Binibee nín ká yii Yoona u-ba nín lī puee dàkà yii ti-Dindaan ní u bíi sáńee ní bi fāŋkì tikpil tikpil, ki bí-u yii: «Batii bɔti ní a ŋá mimmee!» 11 Bi lī mimmee ní ki bālifì Yoona yii: «Mana ní ti máaǹ kí ŋá-si ní tiŋku ń ŋmīĺ án ŋá ti-pu fòooo dee?» Di sá yii kubuŋu nìn dáá pée gbíntìi jītí mpɔn ní tiŋku nyim nìn mɔ̀tīi yíkí mpɔn. 12 Ní Yoona kíí-bi yii: «Ní yòom̄maan-mi kí tɔ̄ tiŋkun, tiŋku làá ŋmīĺ ní án ŋá ni-pu fòooo! Mama m-ba pée nyí yii man pu ní kubuŋkpaaŋŋu nee bí ki jītí tiŋku pu ki páb́-ni míǹ.» 13 Binibee pɔ́ɔǹ bi-ba kí bàà ŋàal̀ meela kí fàtīí bà tiŋku gbandi ama baa ŋúń, kun puee tiŋku nyim nìn mɔ̀tīi jɔ́ḿ ní ki páb́-bi. 14 Niinee ní bi tíminsì ki yíiń ti-Dindaan ní ki bí yii: «Áù, ti-Dindaan, ti gbàam̄-si! Taa yàntī tí kpú kijapaai nee pu. Taa dū kijapaai nee kpuulool kí lúntí ti-pu, waa ŋá-ti tiba. Ti-Dindaan, sisi a-ba nín là puee, míǹ ní a ŋá.» 15 Bi mēē ti-Dindaan míǹ ki dóòyee ní ki cúú Yoona ki yōoǹ ki dūu tɔ́ tiŋkun. Niin niin ní kubuŋu nín bàà bí ki yòontí tiŋku nyim pu an fīintí-bi mpɔn mpɔnee gbēeǹ ní an ŋmíl̀ fɔ́ŋfɔŋ. 16 Binibee nín ká mimmee, bi fāŋkì ti-Dindaan tikpil tikpil ní ki ŋá saraa ki tīī ti-Dindaan ní ki pōoǹ-u ipoon.