Miika i

Kugbɔŋu kun sòoǹ

Miika

puee

Tibɔkilkaal

Unimbɔti bɔnaatiliu Miika nìn túń Unimbɔti tundi ubɔnaatil Yeesaya yuntiŋu ní. Kii Unimbɔti bɔnaatiliu Yeesayee, u mun nìn sòon̄ nì Juuda beel yab ŋyunti ŋun ní Asuur janjakitiŋ nìn kā bi-puee ní.

Miika nìn kpáafì bin nìn bíi pílifíǹ-uee yii tin nìn jítì Isirayeel beel tiŋyil Samaarii puee, tíǹ tibaantiil di làá jītí bi-tiŋki pu, cilinjee bi-tiŋyil Jeerusaleem pu. U nìn sòon̄ ki cántì-bi yii nnaabu ŋun dòońee sá bi-kpitii paati, cilinjee bigaajab nín mùul̄ bi-wɔfib puee. Unimbɔti bɔnaatiliu bíi mèé Unimbɔti yii ú dáaĺ bin ŋáań mimmee tafal. An di nìn cáań u nì binikpaambi nì bikpootiliibi kansikin kujaau. Bíǹ di sá bitindaŋkpilib nì bikpootiliibi nì bibɔsoonliibi nì bisaraaŋaliibi. U nìn kpákáǹ bibɔnaatiliibi bin mun nìn kíiĺ binib nì dimákakulindi nyɔɔbuŋŋee, di sá yii baa nìn pūǹ mpaan binib ń kpántí bi-ba. Miika nìn dī u-bɔkpāafitam pu ki là bin nìn pílifíǹ-uee ń dàkafì ní kí lēē dileel din di sá yii bí nīn tɔ́ Unimbɔti nín là puee, kí nīn tɔ́ bi-jutiibi, kí nīn néeń-bi (6.8). Abɔkpaa gbanti boonee, u nìn sòon̄ atumpɔɔn ŋin Unimbɔti làá tɔ̄ kí cáań dinibul difiil fool boonee pu.

Miika gbɔŋku sòoǹ abɔtaa ali ŋin kóò tɔbinee. Unimbɔti lī yii u làá sòoǹ u-nibul bɔti kí dáaĺ di-tafal (ayil 1-3, 6.1–7.7), ama u pōoǹ-dì mun yii u làá fīī-dì (ayil 4–5, 7.8-20), kí gíiǹní-dì di-tiŋkin kí dū-dì kí ŋá Daafiidi ŋaan ú kpòotī-dì (5.1-4a).