Miika 1

Kugbɔŋu kun sòoǹ

Miika

puee

1 Ti-Dindaan nìn sòon̄ nì Miika un sá Mooreeseeti timbiliikin iyunti in ní Yootam nì Akaasi nì Eeseekiyaasi nìn kāl̀ kāl̀ dibeel Juuda tiŋki puee. Tibɔti tin ti-Dindaan nìn lēē ki dàkā-u Samaarii nì Jeerusaleem timmu puee sɔ̀.

Ti-Dindaan bíi wòoǹ u-nibul

2 Anibul kɔkɔ nib, ní pīlifìmaan!

Kitiŋ nì bin kɔkɔ kóò ki-puee,

ní kpòom̄maan ni-tafal kí pīlifì.

Ti-Dindaan làá sòoǹ ni-tuŋkpitiŋ pu

doooo u-circir kɔŋkooŋŋun.

3 Tiŋman, ti-Dindaan nyánní u-kɔŋkooŋŋun.

U sìntìń ki còom̄

ŋgbantamu yilpu kúntí kunti.

4 Ajoon ŋin pu u tɔ́kɔ́ee dùntī

kii tikaliŋkpun di kā ŋŋminee,

ní atantaka fátí iwèeń

kii nnyim nín pùub̀ dijool pu puee.

5 Tin bí nee kɔkɔ bāań

kun puee Jaakɔb naantiibi ŋá ikpiti,

Isirayeel yab kaa yúl̀ deedee.

Ŋma yàntī Jaakɔb naantiibi ŋáań ikpiti ní?

An kaa sá Samaarii tiŋkaaa?

Ŋma yàntī Juuda yab kóò iwaatootin ní?

An kaa sá Jeerusaleem tiŋkaaa?

6 «Ti-Dindaan nín lī puee sɔ̀.

An puee m làá yàntī

Samaarii tiŋki ń kpántí adigbuŋkati ŋma

kitiŋ kin pu bi dāa ŋūǹ kí kpɔ̀ fiinyi sufiiyee.

M làá yàntī bí bíntí

u-diiŋŋi taŋkpeeŋi kí tɔ̄ nsitimin,

ní kí bìitī bi-tiŋki nyeel pu

án nīn wāĺ.

7 M làá gbá kí wīī bi-waaŋi kɔkɔ,

ní kí dū tiwampɔkaal

tin bi pú-ŋee kí tɔ̄ ŋŋmin.

M làá nà awaa gbanti dúsi dusi,

di sá yii nlaakpaamu paati

ní bi dūu ká tiwan gbanti kɔkɔ,

ní tiwan gbanti làá fàtīí kpántí nlaakpaamu paati.^a»

Nnaabu bāań áli Jeerusaleem

8 «Miika nín lī puee sɔ̀.

M làá sɔ̄ kí yāliŋkì.

M làá nīn còom̄ kaa táká anaataka,

kaa pēē tiba.

M làá gāā dituweel

kii jiiŋkpaai nín sūǹ puee,

kí nīn yáliŋkí kii taataayee.

9 Di sá yii tiweendi tin Samaarii tiŋki fōōyee

kaa cáá nnyɔkɔ.

Tì nyātì ki bàn̄ Juuda tiŋki,

ki tin gūū Jeerusaleem punyɔmmu,

laakin m-nibul kóòyee.

10 Ní taa māafì an bɔti Gaati tiŋkin,

taa sɔ̄maan.

Beeti-Leeyafiira tiŋkin yab,

ní dòom̄maan ntampukumin kí nīn bíntí.

11 Nimbi bin kóò Safiir tiŋkinee,

kíĺmaan kuyuŋu saŋŋu

nì icoo nì dicancaŋgbeel.

Bin kóò Saanan tiŋkinee

kaa kíikí kí nyā bi-tiŋkin.

12 Bin kóò Marɔti tiŋkinee

kíǹ ki sūǹ bi-ba pu

ki mèé yii mbusu ń cù ndan.

Di sá yii nnaabu ŋun nyánní ti-Dindaan ceeyee

bāań ki gūū Jeerusaleem punyɔmmu.

13 Nimbi bin kóò Lakiisi tiŋkinee,

ní dū janjatɔrɔkub kí kúĺ kí lúntí itaamu.

Naa yúl̀ nì Unimbɔti deedee

kii Isirayeel yabee,

ní ki dáaĺ Jeerusaleem yab

ki kɔ́ǹ ni-tuŋkpitiŋin.

14 An pu ní ni máaǹ ni nì

Mooreeseeti-Gaati tiŋkin yab

ń yàkatī tɔbin.

Akisiib tiŋkin yab kaa làá dāá ŋmā

kí jòò Isirayeel yab bɔtiibi.

15 Nimbi bin kóò Mareesa tiŋkinee,

ti-Dindaan làá dū ujanjapɔɔl ubɔ

kí tɔ̄ ni-pu.

Isirayeel nigaakaabi làá dāá sāǹ

kí cù Adulaam taŋkpalɔkɔŋun kí báĺ.

16 Nimbi bin kóò Jeerusaleemee,

ní cāmaan ni-yikpiti,

ní kòol̀maan dibaakpandi

ni-biyaamu mun ni néeń tikpilee pu.

Ní nīn tú dibaakpandi kii kaajiikuee,

kun puee bi làá cùnnì ni-biyaamu kuyuŋu

kitiŋ kin dátiǹ-nee poon.