Ti-Dindaan làá dáaĺ bin fìkì binibee tafal
2
1 «Mbusu dɔ̄ ki cí bin dɔ̄ kunyeeuki dàkafī kí ŋá tibɔkpitil
ki bɔ́ntí kí tɔ̄ atuŋkpitee!
Kutaa tin pée lì yii ku wúntéee,
bi ŋá bi nín bɔ́ntì puee,
di sá yii bi cáá an pɔŋŋu.
2 Biba kpaatanti yaa kɔ́-bi nnimbitaataamee,
bi cútí ní kí fōō.
Bi yaa tí ká adiin fáatiǹ-bee,
ní bí cúú kí fōō.
Bi fìkì kudiidaan nì u-dicaŋku,
unil nì u-fakal.
3 An pu ní ti-Dindaan lī yii:
<M bíi bɔ́ntí nnaabu kí tɔ̄
nimbi bin tūǹ an tuuŋŋee pu.
Naa làá dāá ŋmā kí ŋmátí.
Naa làá dāá nīn gíti còom̄ ni-yiliŋ gáań,
di sá yii an dāa sá
dinimbinaamandi yuntiŋu ní.>
4 Ŋwiin gbantee, bi làá dāá gāā-ni nlan,
bi làá dāá nīn gà ŋkpiisilan nee yii:
<Bi fúkúl̀-ti pílpil.
Ti-nibul kaa ti cáá kitiŋ.
Bin bíi fúkuĺ-tee
dū ti-sati ki yākatì.»
5 Too, ti-Dindaan nibul
yaa làá dāá fàtīí yàkatī tikpaatanee,
ni-kansikin báà ubɔ
kaa dāa cáá kí fōō dijandi.
Bin jáà nì Unimbɔti bɔnaatiliibi bɔtee
6 Biba sòoǹ nì mi yii:
«Taa ti sòoǹ tin a sòoǹ nee.
Aa máaǹ kí nīn lì yii:
Icoo làá jī-ti.
7 Bi ŋūǹ kí sòoǹ mimmaaa, Isirayeel yab?
Ti-Dindaan kaa ti cáá kimɔtii níii?
Míǹ ní u tūǹ u-tuuŋŋaaa?»
Mamee, m cáá dinyɔɔbummɔɔndi
kí tīī un bí deedeeyee.
8 Nimbi pu ní an lī yii:
«Ni dū m-nibul ki kpántì m-nannanliibi.
Ni fòol̄ bin nyánní kujaau
ki còom̄ ki cá nì ŋgbansɔŋfee bɔkutikpaaŋŋi.
9 Ni jì m-nibul nimpoobi
ki nyāntí bi-diiŋŋi ŋin bi néeńee poon.
Ni fòol̄ bi-biyaamu cee
tinyool tin m tīī-bi kí nīn cáa cá jaanjaanee.
10 Yīkìmaan! Nín̄ cámaan!
An kaa sá diŋuŋfil yuntiŋu!
Ni-jɔkɔntuuŋŋi puee,
nnaabukpaan dɔ̄ ki cí-ni.»
11 Binib yaa bí ki cáá kubɔcaau,
ki nāantí tinyimɔmbɔti
ki lì yii:
«Ni làá ká ndamam
nì ndaam min pɔ̄ɔ̄yee kí nyɔ̀.»
Kubɔcaau gbanti dambi gíti lì yii:
12 «M làá kóoǹ ni-kɔkɔ kí kpāfì,
Jaakɔb naantiibi.
M làá kóoǹ Isirayeel yab
bin kíǹ kaa kpíìyee kí kpāfì ubaanti.
M làá kóoǹ-ni kí kpāfì ubaanti
kii ipii nín kpáfí pu kupikpuŋkpuŋunee.
Ni làá dāá bùtī kí ŋá dinikitikpaandi bí gbìl̄ ni-pu.
13 Un pìitī nsanee
làá nīn līī ni-nyɔkɔpu.
Ni tɔ́ ni-ba,
dīmaan kipunyɔkɔ kí nyā.
An sá ti-Dindaan ni-bɔtiu
di līī ni-nyɔkɔpu ki kpòotī-ni.»