Bi bíi kpáafí bikpootiliibi
3
1 Ama man bí yii:«Pīlifìmaan, nimbi bin kpòotī Jaakɔb naantiibee,
nimbi Isirayeel nibul bɔsoonliibi.
Nimbi di kaa bàà máaǹ
kí nīn nyí tin bí deedeeyeeee?
2 Ama nimbi di ná tin ŋān̄ee
ní ki néeń tin kaa ŋān̄ee.
Ni cátí binib gbaŋŋu ki bìitī
tiwunnan nì akpab pu.»
3 Bi ŋmóò m-nibul nanti kii upeecuncutee.
Bi lèekī bi-gbaŋŋu
kii naŋkoosinaa nín lèekī puee,
ki kɔ́fí bi-kpabiŋ,
ki càkà bi-nanti
kii an sá tinan ní
bi làá tɔ́kɔń dikumboolinee.
4 An pu ní bi yaa láa kúuǹ ki yíiń ti-Dindaanee,
waa làá dāá kíí-bi.
Ŋyunti gbantee,
u làá dāá fàtī u-kpaŋkpamboon kí tīī-bi,
atuŋkpiti ŋin kɔkɔ bi ŋée pu.
Inyimɔn bɔnaatiliibi bɔkpaaŋi
5 Ti-Dindaan nín sòon̄ bibɔnaatiliibi bin mɔ́ntí m-nibulee pu puee sèé:
«Bin yaa tīī-bi njimee,
bi lì yii Unimbɔti ń tīī-bi ŋgbansɔŋfi.
Ama bin kaa tìì-bi tiba bí jēe,
bi jáà nì bi.
6 An puee kunyeeu làá mɔ́ ni-pu,
naa làá ti ká aleedaka.
Dibɔmbɔndi làá jēetí ni-pu,
naa làá ti ká tiba kí sòoǹ.
Ŋwìiń làá jēetí ni-pu,
ní ŋwiimpu ń dūú kpántí dibɔmbɔndi.»
7 Icoo làá cúú bin wāĺee
nì bin būūyee.
Bi làá bìin̄ bi-nyɔɔkuti pua,
kun puee Unimbɔti kaa ti kíikí-bi.
8 Ama mamee, nì ti-Dindaan Fam puee,
m cáá mpɔn,
ki nyí tin bí deedeeyee,
ki cáá dipɔbil.
M ŋūǹ kí yàntī Jaakɔb naantiibi,
Isirayeel nibul ń béé
bi-yìntitam nì bi-kpitii.
Jeerusaleem tiŋki làá wīī
9 Pīlifìmaan tin bí nee,
nimbi Jaakɔb naantiibi kpootiliibi,
nimbi Isirayeel nibul bɔsoonliibi.
Ni ná tin bí deedeeyee,
kaa sòoǹ tibɔti ibaamɔn.
10 Ni kù binib ki kāntí animbil
ki cáa nyāantí Siiyɔn tiŋki.
Ni wɔ́b̀ binib ki kāntí animbil
ki cáa nyāantí Jeerusaleem.
11 Bibɔsoonliibi fòol̄ tiwampɔkaal
ní ki sòoǹ binib bɔti,
bisaraaŋaliibi dàkà Unimbɔti marab
ní bi pà-bi,
ní Unimbɔti bɔnaatiliibi fòol̄ animbil
ní kí nín nàatī Unimbɔti bɔti.
Ti-Dindaan yindi pu ní bi tɔ́kɔ́
ki ŋáań tíǹ kɔkɔ ki lì yii:
«Ti-Dindaan bí ti-cee.
Nnaabu ŋubɔ kpá ki làá jēetí ti-pu.»
12 Too, ni-puee, bi làá kpɔ̀ Siiyɔn tiŋki
kii bi nín kù bukpaa puee,
ní Jeerusaleem tiŋki
ń kpántí adigbun ŋma,
ní ikuŋkum ń nyā kí múkúǹ
dijool din pu bi máń
kunimbɔtidii ki tɔ́kɔ́ǹee.