Miika 4

Jeerusaleem, ŋgbansɔŋfi tiŋyil

1 «Ŋwiin bí ki dòoń,

dijool din pu ti-Dindaan Diiku tɔ́kɔ́ee^a

làá dāá nīn tɔ́kɔ́ ajoon kɔkɔ pu,

di làá dāá nīn fɔ̀kɔǹ ŋgbantamu kɔkɔ.

Anibul làá dāá nīn bìtifī ki dòoń di-cee.

2 Atimbun tikpil làá dāá tàkan̄ nsan

ki cá ki lì yii:

<Dāam̄maan tí jɔ̄m̀ ti-Dindaan jool pu,

tí jɔ̄m̀maan Jaakɔb Nimbɔtiu Diikun!

U làá dàkà-ti kun u là tí ŋée

ní tí nóó u-sàmbiyaamu.>

Tiŋman, Siiyɔn ní Mara làá nyānní,

u-nyɔɔbundi làá nyānní Jeerusaleem ní.

3 U làá dāá sòoǹ kí ŋāŋkì

anibul tikpil kansikin bɔti,

kí dāá ŋāŋkì atimbun ŋin cáá mpɔn

ki bínní ndandatee kansikin bɔti.

Binib làá dāá dū bi-tàataajimmu

kí dūú mɔ́ɔ́ akoo,

ní kí dāá dū bi-kpammu

kí mɔ́ɔ́ igɔti.

Ditimbundi diba kaa dāa gíti

jáà nì di-juti,

ní binib kaa dāa bífí kujaau.

4 Báà ŋma dāa kíǹ ki kā

u-fiinyi nì u-fiigi sufii taapu,

ní ubɔ kaa dāa bí kí páb́-u.»

Ti-Dindaan Mpɔŋkɔdaan di sòon̄ míǹ.

5 Ditimbundi kamaa ŋáań

tin làá fáatíǹ di-waaŋee ní,

ama timbi làá nīn ŋáań tin làá fáatíǹ

ti-Dindaan ti-Nimbɔtiuee ní kí nīn cá jaanjaan.

Ti-Dindaan làá jī dibeel Jeerusaleem tiŋkin

6 Ti-Dindaan lī yii:

«Ŋyunti gbantee, m làá kóoǹní

bin fōō tiweendee kí kpāfì,

m làá gíiǹní bin tafal m dáaĺ

ki yāntì bi yàl̄ ki bínní kuyuŋuee.

7 Bin fōō tiweendi gbantee,

m làá dū-bi kí náań dinibul din bí dimaŋfalinee.

Bin bínní kuyuŋunee,

m làá dū-bi kí kpántí ditimbundi din pɔ̄ɔ̄yee.

Man bi-Dindaan

di làá dāá nīn sá bi-bɔtiu

Siiyɔn jool pu,

kí yòon̄ ŋyunti gbanti

kí nīn cáa cá jaanjaan!

8 Sii Jeerusaleem jool,

a wúǹ dinibul pu

kii upikpaal nín tɔ̄kɔntí kudifɔkɔu pu

ki kpèé u-piii puee ní.

A làá fàtīí ká mpɔn ŋun a nìn cáá njaminee.

A làá fàtīí kpántí dibeel tiŋyil.»

Jeerusaleem làá kɔ́ agìńni ní kí ŋmátí

9 Kɔŋkɔnnee Jeerusaleem yab,

ba pu ní ni sūǹ ki tátí míǹ?

Ba pu ní ni bí ki yáliŋkí

kii imatiŋween di bāań-nee?

Naa ti cáá ubɔti níii?

Ni-saŋkiliibi kpíì níii?

10 Nín̄ yáliŋkí nì ni-ba,

kí nīn kūuntí kii

upɔdaan di bíi màal̀ee.

Di sá yii kɔŋkɔnnee ni làá nyā kitiŋin

kí tin nín̄ kóò tisatin,

áli kí tin bà Babiloon tiŋkin.

Niin ní bi làá dā-ni kí líí,

niin ní ti-Dindaan làá fīī-ni kí nyāntí

ni-nannanliibi ŋaan.

11 Kɔŋkɔnnee Jeerusaleem, atimbun tikpil

kóoǹ ki kpáfì kí já nì si.

Ŋi lì yii: «Tí bīil̀-kì!

Bi yaa nāaǹ Siiyɔn tiŋki,

án làá nīn mɔ̄ǹ-teeee!»

12 Atimbun gbanti nín kaa nyí

ti-Dindaan nín bɔ́ntì kí ŋá pu,

kaa nyí u-landɔkɔyee pu ní ŋi ŋáań míǹ.

Úǹ là kí kóoǹ-ŋi kí kpāfì

kii bi nín kōontí idi kí bíĺ

dinaapaal pu kí gbée ní.

13 Nimbi bin kóò Jeerusaleem tiŋkinee,

yīkìmaan kí gbá idi.

M làá yàntī ní nīn pɔ̄ɔ̄

kii unaa un yiŋyi sá tikúti

ní u-tafuŋfukuti sá tasa kútee.

Ni làá nàan̄ anibul tikpil.

Tigaajawan tin ni làá fōō bi-ceeyee,

ní dū-tì kí sú man ni-Dindaan,

duulinya kɔkɔ kpiliu.

14 Kɔŋkɔnnee, nimbi bin kóò Jeerusaleemee,

kóom̀maan kí kpāfì.

Binannanliibi māntìi tú-ti kí jáǹ-ti.

Bi ŋúb́ ndɔ ki fátí

Isirayeel bɔsoonliu nimbiin^b.