Nawum 1

Kugbɔŋu kun sòoǹ

Naawum

puee

1 Kugbɔŋu nee poonee, tibɔti tin sòoǹ Niiniifi tiŋki puee kā. Tibɔti gbantee, Unimbɔti lēē-tì ki dàkā Nawum un sá ueelikoosjee^a.

Ti-Dindaan gíí Niiniifi tiŋki pu diŋuul

2 Ti-Dindaan sá Unimbɔti un cáá ipoompoonee

ní ki tɔ̀ ipɔntoon.

U dátí bin jáà nì uee tafal.

U-ŋuul pɔ̄ɔ̄ an kaa cáá bí lì.

U tɔ̀ u-nannanliibi ipɔntoon,

ní kaa súntí bi-kpitii in bi ŋáańee pu.

3 Ti-Dindaan kaa fòol̄ diŋuul malaa

ní ki cáá mpɔŋkpaan,

ama waa yàntī dibɔkpil daan fám

kaa dáaĺ u-tafal.

Kunaakpaabuŋŋu nì kubuŋkpaaŋŋu

poon ní u còom̄.

Atagban di sá u yaa tà, kukpɔŋkpɔŋu kun yíkée.

4 U kpàtī tiŋku pu ní ú kpā,

ní ki yàntī ibun kɔkɔ nyim fóotí.

Baasan pɔɔku nì Kaarmeel jool mooti fáaḿ,

ní Leebanɔn pumpukum yɔ́ĺ.

5 U yaa dòońee, ajoon cìŋkī ní,

ní ŋgbantamu kpìkitī.

U yaa páaǹnée kitiŋ cìŋkī,

ní binib bin kɔkɔ bí ki-puee jìkì.

6 U yaa fōō diŋuulee, ŋma di ŋūǹ kí ŋmátí?

U yaa fōō mbumee, ŋma di ŋūǹ kí yūĺ?

U-ŋuul fòol̄ bìlbil kii ŋŋmee ní,

ataŋkpee gba wìil̄ u-nimbiin ní.

7 Ti-Dindaan ŋān̄!

U sá kibalilaŋ ní dinimbinaamandi yuntiŋu poon.

U wúǹ bin di sáń ki kóò-uee pu,

8 báà digìńdi yaa dɔ́miń ki bīiǹ bi-pu kii nnyiŋgbeenee.

Ama u làá nàan̄ bin bí ki jáà nì uee,

ní kí jà u-nannanliibi kí kɔ́ǹ dibɔmbɔndin.

Tin ti-Dindaan sòon̄ Juuda nì Niiniifi puee

9 Ba ní ni bíi bɔ́ntí ti-Dindaan pu?

Úǹ di nàantí u-nannanliibi,

ní baa ti làá wɔ́b́-ni nliliitiim.

10 Di sá yii bi bí kii abɔjanaakun ŋin sɔ̀kɔ̄ee ní,

bíǹ bin nyù idafi ki gbéèyee.

Ŋŋmi làá wà-bi múb kii timɔkulindee ní.

11 Unil un bíi bɔ́ntí kí já nì ti-Dindaanee,

unil un di cáá ilandɔkɔkpitee

nyánní sii Niiniifi tiŋkin ní.

12 Ti-Dindaan nín sòon̄ puee sèé:

«Báà ni-nannanliibi yaa wīikí ki pɔ̄ɔ̄,

m làá nàan̄-bi ní bí kúntí múb.

M sīntiǹ-ni taapu,

maa ti làá ŋá míǹ.

13 Kɔŋkɔnnee, m làá nyìkitī diwaŋgul

din bi dūu nyīkiǹ ni-puee,

ní kí tìl̄ ni-kusakai.»

14 Ti-Dindaan nín sòon̄ tin

nimbi Niiniifi yab puee sèé:

«Naa ti làá màal̀ mbiyaamu

mun làá dāá fōō ni-yindee.

M làá kúntí awaakpitikaa nì amɔɔkaa

ŋin bí ni-waadiikunee.

M bíi bɔ́ntí ni-kaakul,

di sá yii naa bí tiban.»