Nawum 2

1 Juuda yab^a, ntuun ŋun cāabìń

tibɔmɔntiilee di dòoń ajoon puee,

ŋu sòoǹ ŋgbansɔŋfi bɔti ní!

Jīmaan ni-jiŋaalib,

cáaḿmaan ni-pooŋyi saraabi kí tīī Unimbɔti.

Kun puee, ukpitee kaa ti làá dāan̄ kí fōō ni-tiŋki,

bi pée nāaǹ-u ní múb.

2 Niiniifi, bi dòoń kí jáǹ-si dee.

Bijanjaliibi, jɔ̄m̀maan sintil difɔkɔŋi pu kí nīn cí,

nín̄ cɔ́ŋkímaan adan pu ki kpèé,

yòom̄maan ni-gbajab kí gbìn̄,

kámaan kunyannyaau kí pɔ́ɔǹ ni-ba.

3 Di sá yii ti-Dindaan fātìi gíiǹ

Jaakɔb nyooti ki tīī-u.

Úǹ u-ba di sá Isirayeel nyooti.

Binannanliibi nìn fúkúl̀-bi,

ki bíil̀ bi-fiinyi paŋŋi.

Bi jáń ki pɔ́ɔkiǹ Niiniifi tiŋki ki fúkúl̀-kì

4 Bi-nannanliibi janjaliibi gbampɔɔŋi máǹ,

ní bi pēē tiwamman cínciŋ.

Bi yaa gbāaǹ dikɔndi puee,

bi-tɔrɔkub kúti ŋmóò ní làka laka kii ŋŋmee,

ní bi fīintí bi-kpammu.

5 Janjatɔrɔkub dū bi-ba ki bíl̀ adan pu,

bi kpátìi gbí kitiŋ jaŋŋi kɔkɔ pu

a lì kii iŋminaapoolee.

Bi yáb̀ kii utaa nín ŋmóò puee ní.

6 Niiniifi bɔtiu yíiń u-janjaliibi kpilib,

ama ní bi còom̄ ki cá ki gùgufī.

Binannanliibi sáń ki cá kitiŋ gundi caŋin.

Bi bál̀ digbampɔɔl din boon bi làá báĺee.

7 Bi gbáń ki pīitì mpunyɔmu

mun bíitiǹ ibunee mpɔn,

bi jáń ki fōō dibeecindi.

8 Binannanliibi yōoǹ diwaal ki cáa cūnnì kuyuŋu.

Binimpoobi bin nìn jáaḿ-dèe bíi sūǹ

ki yáliŋkí kii abeenanjilee,

ní ki fátí bi-biŋŋi nì kunimbaau.

9 Niiniifi yab sá kii nnyimbilkaam

min nnyim nyáń ki dóòyee ní.

Bi nìn kūuntí ki yíì-bi yii:

«Sīĺmaan! Sīĺmaan,»

ama báà ubɔ kaa fātìi kpēē u-boon gba.

10 Fūkul̀maan kitiŋee nimbiliŋ nì ki-sindaariyau!

Ki-gaajawanti kaa cáá dikúntil,

tiwammɔntiil kɔkɔ nì ti-bulifi gbí ki-ni.

11 Bi fúkúl̀-kì ki gbákal̀-kì ki nāaǹ-kì.

Un cáá dipɔbilee gíti kpá,

bi-taaŋi yɔ̄tì,

tiwun kɔkɔ gbáà kpàkpakpa

ní inimbiin cúu kpántì.

Niiniifi bí kii gbikinti un bi jáń ki pɔ́ɔkiǹee ní

12 Kitiŋ kin poon gbikintib nìn kóòyee bí la?

Niin ní agbikintipɔmbil nìn kāntí ki jīǹ.

Ugbikintija yaa nìn búntì dijinnyaabilee,

ubɔ kaa nìn gbèetī u-biyaamu.

13 Ugbikintija nìn cútí tinan ní ki

tìì u-biyaamu.

U nìn kù ipeel ki tìì ugbikintinaati,

u nìn gbēentí laakin u kóòyee

ipeel in u cúú ki tɔ̄ntèe.

14 Ti-Dindaan Mpɔŋkɔdaan lī yii:

«Sii Niiniifi, m làá já nì si,

m làá yàntī a-janjatɔrɔkub

ń wà kí kpántí ŋfantam.

Kujaaun ní bi làá tin kpɔ̀ń a-gbikintipɔmbiliŋ.

M làá kúntí a nín yìin̄ ki fúkúl̀ ntimu puee,

ní ubɔ kaa làá ti gbìl̄ a-tuuŋyi nyɔmmu pu.»