Nawum 3

Bi pɔ̄fì nnikpaakoon tiŋki Niiniifi yab

1 Mbusu dɔ̄ ki cí Niiniifi tiŋki

kin poon nnikpaakoon bée!

Dimuuldi nì tipɔmbɔti di gbí ki-poon.

Bi pée fúkuĺ binib ní kaa gbèentí.

2 Pīlifìmaan! Anaalab di nìiǹnée!

Tɔrɔkub taaŋi di wàkalìńee!

Itaamu di tòó càlib calibee!

Kujaau tɔrɔkub di jàkànée!

3 Bitanjakaliibi dū bi-ba ki bílìń!

Ntàataajimu di ŋmóò làka lakee!

Ŋkpamu di jìl̀ pàlpalee!

Bitaŋkpiibi dɔ̄ an kɔkɔ fìlfilfil!

Anikpil dɔ̄ akpuku akpuku!

Baa ti ŋūǹ kí kàaǹ-ŋi gba!

Binib kíǹ ki gbéetí-ŋi ní.

Icoo cúú Niiniifi tiŋki

4 Niiniifi tiŋki ŋá alaakpaatuun

ŋfunyɔm kutuku kutuku pu.

Kì nìn ŋān̄ ki bí gbàlgbalgbal,

ní ki nìn sàtī binib.

Kì nìn cáá ki-laakpaati ki cútí

atimbun tikpil kuyuŋu,

ní kì nìn cáá ki-nyɔkɔŋu

ki sàtī anibul.

5 Ti-Dindaan Mpɔŋkɔdaan nín lī puee sɔ̀.

M làá já nì si.

M làá kóoǹ a-wɔndoou

kí bìitī a-cancaŋgbeel pu kí dàkà atimbun,

ní kí bìitī a-cooi pu kí dàkà abee ŋin kíǹee.

6 M làá dū titampummool kí bìin̄ a-pu

kí kɔ́ǹ-si icoo,

ní kí nyāntí-si kí páań mpaampiin pu.

7 Bin kɔkɔ làá dāá ká-see

dāa sáń-si ní ki lì yii:

«Niiniifi tiŋki pée nāaǹ ní múb,

ŋma làá yāliŋkì ki-pu dee?

La ní m làá nín ká binib

bí dāá ŋméeǹ-kì dee?»

Bi làá ŋá Niiniifi kii bi nín ŋá Teebeesi puee ní

8 Niiniifi tiŋki, a dàkafī yii

a sɔ́ǹ Teebeesi^a tiŋki

kin bí Niil buntaaŋi kansikinee níii?

Nnyim di nìn māntìi tú-kì,

ní dimɔɔl cí-kì,

ní nnyim sá ki-guŋŋi.

9 Eetiiyoopii nì Eejipiti di nìn sá ki-pɔŋŋu

ŋun kaa cáá dikúntilee.

Puuti^b yab nì Liibii yab

di nìn sá ki-bɔɔbi.

10 Ama nì míǹ kɔkɔee,

bi cúú Teebeesi yab

ki cūnnì kuyuŋu.

Bi nìn nàn̄ bi-bipɔmmu

asaŋkaŋkpil kɔkɔ pu.

Bi nìn tɔ́ kasi ki yākatì bi-kpambaliŋ

ki cáá-bi ki cūnnì kuyuŋu,

ní ki bóob́ ki-kpootiliibi ikusaka.

11 Sii Niiniifi tiŋki, digìńdi làá dāá kɔ́ si mun,

a làá dāá nyàab̀ kí báĺ.

Sii mun làá dāá nyàab̀ kibalilaŋ

a-nannanliibi ń taa cúú-si.

Niiniifi tiŋki làá lítí

12 A-sintil difɔkɔŋi sá kii fiigi biliŋ

ŋin lúń busubu pu ki mántèe ní.

Bi yaa pée yáká-buee, abil gbátí ní

kí kɔ́ un là kí ŋmɔ́-ŋee nyɔkɔn.

13 Kpèè a-janjaliibi bí kii binimpoobee ní,

a-nannanliibi yaa páaǹnée,

a-tiŋki punyɔmmu cútí kí pìitī ní bàaa bí kɔ́,

di sá yii ŋŋmi wùn̄ mu-kpàlkaati.

14 Niiniifi yab, lúḿmaan nnyim kí yóoń,

di sá yii binannanliibi làá màntīí tū ni-tiŋki.

Mɔ̀tīí ŋāŋkìmaan ni-sintil difɔkɔŋi,

tāāmaan kuyɔkɔu,

ní kí yòon̄ ni-brikisi gaŋgammu!

15 Ama niin ní ŋŋmi làá wà-ni ní kpú,

kujaaun ní ni làá kpú kí céetí.

Bi làá kpɔ̀ kí céetí-ni kii inaakitoon

nín ŋmóò ki céetí tikɔkɔ puee ní.

Báà ubɔ kaa ti kóò Niiniifi tiŋkin

Niiniifi, a-nib nìn wīikí kii inaakitoonee ní!

16 Ni-nyampoobi nìn wīikí ki jítiǹ

iŋmalbijaa in bí kutaa puee.

Kɔŋkɔnnee bi wáŋkì kii inaakicaan

nín yíkí kí búntí puee.

17 A-ciitiliibi nìn būtì kii inaakicaanee ní,

ní a-kàlimbi mun nìn wīikí kii kunaakicikuee.

An yaa dá láá sɔ̀m̀ee,

inaaki náká an pu.

Ama ŋwìiń yaa nyáńee, i yíkí ní kí búntí

ní ubɔ kaa nyí laakin i túĺee.

I nín bí la dee?

Asaluu un baa ŋūǹ kí ŋāŋkèe

18 Asuur bɔtiu,

a-kpootiliibi gèen̄ kaa fīntì!

A-baatandambi kaa ti bíi cìŋkī bi-ba!

A-janjaliibi yàl̄ ki gbí ajoon pu,

ní ubɔ kaa bí kí kóoǹ-bi kí kpāfì.

19 Asaluu un gbáń-see kaa ti cáá diŋaŋkil.

Nnyɔkɔ kaa bí kí cáaǹ tiweendi tin a fōōyee.

Bin kɔkɔ gbìl̄ tin bāań-see

kpáafí bi-ŋalii nnaabu ŋun bāań-see pu,

di sá yii a ŋá ntoom ki kíǹ ŋma?

A-toom kaa cáá kikuntilaŋ.