Daniel Gbɔŋku 10

Dileedakal ditataatiil: Uninja un pēē ŋŋaabu ŋun bí fálfalee

1 Peeriisi bɔtiu Siirusi nín kāl̀ dibeel dibintataatiil poonee, ní an lēē ki dàkā Daniyeel un bi gíti páaǹ diyindi yii Baltasaaree. Dinyɔɔbundee nìn sá mbaamɔn ní ki nìn sòoǹ agìŋ́kpaan pu. Daniyeel nìn dākafì tibɔtee pu tikpil ní án lēē ki dàkā-u ní u gbìl̄ taapu^a.

2 «Ŋyunti gbantee, mama Daniyeel, m nìn kɔ́ kunimbaaun nnyɔmu muta ní. 3 Maa nìn jíń tijimmɔntiil tibaaa, tinan nì ndaam kaa nìn kɔ́ m-nyɔkɔnaaa, maa nìn càatī mun gba áli nnyɔmu muta gbanti dāa jítì. 4 Dibindi ŋmapeekaau, iwiin mmuŋku nì inaa dalee, m nìn bí dimɔɔl din bi yíì Tiigiree gbandi. 5 M yáatì ki kpēēyee, uninja ubɔ dee. U pēē ŋŋaabu ŋun bí fálfalee bɔkutil ki gbìn̄ sindaariyamɔnti dambalau. 6 U-wunti nìn bí kii ditaŋkpamɔntiil disɔndi din bi yíì kriistooliitee, ní u-nimbiin jìl̀ kii utaa nín ŋmóò puee. U-nimbiliŋ nìn bí kii iŋminaapoolee, ní u-ŋalii nì u-taaŋi bí kii tasa kúti tin bi jɔ̄lifèe nín bí puee. U yaa sòoǹee, an bí kii kunipaauee ní^b. 7 Mama, Daniyeel baba ní an nìn pée lēē ki dàkā. Binib bin nìn bí m-ceeyee kaa nìn wál̀ tiba, ama tifaandi nìn kɔ́-bi ní bi sáǹ ki bál̀. 8 M nìn gbíntì niin m-baba ní an lēē ki dàkā-mi míǹ. M-wunti nìn kpíì ní m-nimbiin cúu kpántì ní maa ti cáá mpɔn. 9 M nìn gbìl̄ kijapaayee bíi sòoǹ. Ŋyunti ŋun m gbìl̄ u-nyɔkɔ puee ní m fìkī ní ki lítì kitiŋ dicincibil. 10 Niinee ŋŋal ŋubɔ gbēē-mi ní m-wunti kíĺ ki bíi jìkì, ní u yōoǹ-mi ki gbāaǹ m-tabiŋyiliŋ pu m-ŋalii nyīī kitiŋ. 11 Míǹ boonee ní u tùkū-mi yii: <Daniyeel, sii un ní Unimbɔti néeńee, gbìl̄ tibɔti tin m làá tùkù-si nee taapu. Yīkìí yūĺ, kun puee sii cee ní bi túnní-mi.> Ŋyunti ŋun u sòon̄ nì mi mimmee, ní m yíkìi yúl̀ tiwun gbíntìi jìkì. 12 Ní u gíti bí-mi yii: <Daniyeel, taa fàŋkì, di sá yii kí yòon̄ ŋwimpeekaa dal ŋun ní a lēē a-pɔbilin kí sìntī a-ba taapu kí tīī Unimbɔti kí gbìl̄ tin bíi jītée taapuee, Unimbɔti nìn gbìl̄ a-wimmeem, ní a-wimmeem gbanti pu ní m dɔ́miń. 13 Ama ntuun ŋun sá Peeriisi tiŋki ciitiliuee jáń nì mi iwiin mmuŋku nì ŋubɔ, ní Miikayeel un sá ituun kpilib kansikin ubɔee dɔ́miń ki tútúǹ-mi, ní m gbíntì niin Peeriisi yab bɔtiibi cee^c. 14 Too, kɔŋkɔnnee m dɔ́miń kí yàntī á gbìl̄ tin làá bàń a-nibul pu fool boonee taapu ní, di sá yii iyunti gbanti pu leedakal diba gíti bí.>

15 «Ŋyunti ŋun u bíi sòoǹ nì mi mimmee ní m tīntì m-yil ki kíǹ ki kpèé kitiŋ ki ŋmí. 16 Ama unaaciin ubɔ, u bí kii unilee dɔ́miń ki gbēē m-nyunculiŋ. Niinee m wāaǹ m-nyɔkɔ ní ki kíĺ ki bíi sòoǹ. Ní m bí un yú m-nimbiinee yii: <M-dindaan, dileedakal nee puee, kunimbaau kɔ́-mi ní m-wunti kpíì. 17 Mana ní mama, a-tɔntɔnliu ŋūǹ kí sòoǹ nì si, m-dindaan, ŋyunti ŋun ní maa ti cáá mpɔnaaa, kaa ti cáá ŋfam muee?> 18 M lī mimmee ní un bí kii unilee tí fātìi gbēē-mi ní ki tīī-mi mpɔn, 19 ní ki bí-mi yii: <Taa fàŋkì, sii un ní Unimbɔti néeńee. Ŋgbansɔŋfi ń nīn bí a-cee! Pɔ́ɔǹ a-ba kí ká kunyannyaau.> Ŋyunti ŋun u bíi sòoǹ nì mi mimmee ní m ká mpɔn ní ki bí-u yii: <M-dindaan, a ŋūǹ kí sòoǹ kɔŋkɔnnee, di sá yii a tīī-mi mpɔn.> 20 Ní u bí-mi yii: <A nyí kun pu m dɔ́miń a-ceeyeeee? M làá fàtīí gítí kɔŋkɔnnee ki já nì ntuun ŋun cí Peeriisi tiŋkee. M yaa búntèe, ntuun ŋun cí Greesi tiŋkee mun làá dāan̄. 21 Ama m làá tùkù-si tin bi ŋmàn̄ an kā ibaamɔn gbɔŋku poonee. Ubɔ kaa pée bí kí bɔ̄-mi ŋŋal ḿ já nì bi, asee Miikayeel, ntuun ŋun cí-nee baba.