Daniel Gbɔŋku 9

Daniyeel wimmeem

1 Asuweerusi jipɔɔn Daariyusi, Umeedeesja un bi dūu kāaǹ Babiloon tiŋki pu dibeelee bimpeekaalee, 2 mama Daniyeel, m nyàab̄ tigbɔn poon kí béé abin ŋin nyɔkɔm Jeerusaleem làá nīn gbíntìi sá adigbuŋkati, kii ti-Dindaan nín nìn sòon̄ nì u-bɔnaatiliu Yeereemii puee. An nìn nyáń abin imuŋku ita nì saalaa ní^a. 3 Niinee ní m fātì m-nimbiin ki túĺ m-Dindaan Unimbɔti kí mèè-u. M nìn gbāam̀-u, ki bóob́ kinyɔkɔ, ki dū kutuku ki pēeǹ ní ki dū ŋfantam^b ki pùkū m-yil. 4 M nìn mēē ti-Dindaan m-Nimbɔtiu ní ki nìn bīitì ti-kpitii pu ki lī yii:

«Áù, ti-Dindaan, Unimbɔti un sá ukpaan ki sá kuwambiiuee, a ŋúb̀ a-poondi din a pōoǹ bin ŋúb́ a-marabee, ki néeń bin néeń-see. 5 Ti ŋá ikpiti, ti yīntì, ti ŋá tin kaa kítèe ki jáń nì si. Ti fātì ti-boon ki tīī a-marab nì a-bɔkpaaŋi. 6 Taa pílifiǹ a-tɔntɔnliibi, a-bɔnaatiliibi. Bi sòon̄ ti-bɔtiibi nì ti-kpilib nì ti-baabi nì ti-tiŋki pu nib kɔkɔ a-yindi pu. 7 Sii, ti-Dindaanee, a sá deedeedaan ní, ama timbee, icoo jíń-ti. Tiŋman, díǹ pu nee, icoo jíń Jeerusaleem yab nì Juuda tiŋkin yab, ki kpáaǹ Isirayeel yab bin pìl̄ee nì bin bí ndandatee kɔkɔ. Di sá yii ti-yab bí ntimu mun a jìn̄-bi bi yàl̄ ki cūtìi kɔ́ee tikpil poon, kun puee baa nìn yúl̀ nì si deedee. 8 Ti-Dindaan, icoo jíń ti nì ti-bɔtiibi nì ti-kpilib nì ti-baabi, kun puee ti yīntiǹ-si. 9 Ama sii ti-Dindaan ti-Nimbɔtiu poon mɔ̄ ní a pūǹ ti-kpitii, min kamaa ti yíkì ki jáń nì see. 10 Taa pílifiǹ sii ti-Dindaan ti-Nimbɔtiu nyɔkɔ kí nóó a nín dī a-tɔntɔnliibi bibɔnaatiliibi pu ki tīī-ti marab biŋyee. 11 Isirayeel nibul kɔkɔ yīntì a-marau. Bi fātì bi-boon ki tīī-si kaa pílifiǹ-si. Ti yīntiǹ sii ti-Nimbɔtiu. Niinee mbusub bin kɔkɔ bi nìn ŋmàn̄ ki ŋá a-tɔntɔnliu Mooyiisi marabinee jéetì ti-pu^c. 12 Unimbɔti, a yāntì tin a nìn pée sòon̄ yii án làá bàń ti nì ti-kpilib bin kpòotī-tee bāań. A yāntì nnaabukpaan jéetì ti-pu Jeerusaleem tiŋkin. Ubɔ kaa láá pée ká nnaabu gbanti juti kitiŋ pu doo laaba. 13 Kii an nín pée ŋmàn̄ Mooyiisi marab poon puee, míǹ ní nnaabu nee jéetì ti-pu. Ama timbi kaa gbāam̀ sii ti-Dindaan ti-Nimbɔtiu yii á sɔ̀ŋkì a-pɔbil, tí bàà dū ti-kpitii kí fá kí nyàab̀ kí nīn nóó ibaamɔn. 14 An pu ní sii ti-Dindaan yāntì nnaabu nee jéetì ti-pu, di sá yii sii ti-Dindaan ti-Nimbɔtiu bí deedee a-tuuŋŋi kɔkɔ poon ní, ama timbi kaa pílifiǹ-si.

15 «Ti-Dindaan ti-Nimbɔtiu, a nín nìn dū a-pɔŋkpaaŋŋu ki nyántì a-nibul Eejipiti tiŋkinee, a nyáń diyindi ki dāa sāā díǹ. Ama ti ŋá ikpiti, ki ŋá tin kaa kítèe. 16 Ti-Dindaan, a-deedeeu puee, páatí a-ŋuukpaandi Jeerusaleem, a-tiŋki, a-circir jool pu. Di sá yii ti-kpitii nì ti-baabi yìntitam puee, bin kɔkɔ māntìi tú-tee sìí Jeerusaleem nì a-nibul. 17 Kɔŋkɔnnee, m-Nimbɔtiu, á pīlifì man a-tɔntɔnliu wimmeem nì u-gbaamii. Sii a-ba yindi puee, m-Dindaan, sɔ̄ a-circir kɔŋkooŋŋu ŋun bi bíil̀ee saai. 18 M-Nimbɔtiu, kpòon̄ a-tafal kí pīlifì! Ŋúbití a-nimbiliŋ kí kpèè ti-tiŋki kin bi nāaǹ dúsi dusee, kitiŋ kin sá a-yakee nín bí tin poonee. Di sá yii ti yaa bíi gbàam̄-see, an kaa sá ti-deedeetuuŋŋi pu, ama an sá a-poon nín mɔ̄ tikpil puee pu. 19 Ti-Dindaan, pīlifì-ti! Ti-Dindaan, dūú pɔ̄-ti! Ti-Dindaan, pīlifì soooo! A-yindi puee, m-Nimbɔtiu, jòoń a-tiŋki nì a-nibul.»

Nnyɔmu imuŋku ita nì saalaa taapu

20 «M nìn gbíntìi bíi mèé m-kpitii nì m-nibul Isirayeel yab kpitii pu, ki gbàam̄ ti-Dindaan m-Nimbɔtiu ú sɔ̀ u-circir jool saai. 21 Ŋyunti ŋun m gbíntìi bíi mèéyee, ntuun Gabriyeel^d un m bàà pée ká dileedakal poonee, ŋàan̄ní malaa malaa ki bāań m-cee. An nìn sá ŋyunti ŋun bi ŋáań kujoou saraauee ní. 22 Ní ŋu sòon̄ nì mi ki bí-mi yii: <M dɔ́miń kí yàntī á ŋmā kí gbìl̄ tibɔti taapu ní. 23 Ŋyunti ŋun a kíĺ ki bíi gbàam̄ Unimbɔtee ní u sòon̄ tibɔti tiba ní m dɔ́miń kí dūú tùkù-si, di sá yii u néeń-si. Míǹ puee á gbìl̄ tin m làá tùkù-si nee tiŋan kí béé dileedakal nee taapu. 24 Bi síiǹ a-nibul nì a-circir tiŋki pu abin imuŋku ita nì saalaa miluli pu kí kúntí diyìntil. Ŋyunti gbanti làá yàntī ikpiti ń gbèen̄, án nín làá ŋá pu Unimbɔti ń dū ikpiti kí pɔ̄ee. Ŋyunti gbanti làá bà kí yàntī deedee un làá nīn bí jaanjaanee ń nyā kí páań mpaampiin pu, ní án ŋá kii aleedaka nì tibɔnaatikaal nín sòon̄ puee, ní bí fàtīí gíiǹ kunimbɔtidii circir páaa laŋki kí sú Unimbɔtee. 25 Á béé tin bí nee kí gbìl̄ ti-taapu tiŋan. Kí yòon̄ daliŋkin dinyɔɔbundi nyáń yii bin nìn bí kuyuŋunee ń fàtīí gítí kí mā Jeerusaleemee, kí cáá sāā ŋyunti ŋun ukpil un Unimbɔti lēēyee ń dāá nyēe, án làá nyā abin aluli miluli pu. Míǹ boonee, abin aluli imuŋku ita nì mili pu poonee, bi làá dāá fàtīí mā kitiŋee nì ki-guŋŋi kí tū, ama án làá dāá nīn sá iyunti in pɔ̄ɔ̄yee ní. 26 Abin imuŋku ita nì ali miluli pu boonee, bi làá dāá kpɔ̀ un Unimbɔti lēēyee, ama ubɔ kaa làá dāá mɔ̄tì u-pu. Míǹ boonee, ukpil ubɔ nì u-janjakitil làá dāan̄ kí nàan̄ kitiŋee nì ki-circir paaŋŋu. Ama Unimbɔti ŋuul làá dāá jēetí u-pu kí kúntí-u. Kí cáá sāā ŋyunti ŋun u làá kpúee, u làá nàan̄ tikɔkɔ kii an nín sòon̄ pu ki síiǹee. 27 Ukpilee làá dāá dū mpɔn kí ŋá mpèé nì binib tikpil abin aluli. Abin ata nì dijandee, u làá dāá kúntí tiwaŋkuti nì tijimpin saraabi. Unàanlee làá dāá tɔ̄ ntimbiil tuuŋŋi malaa kí cáá sāā ŋyunti ŋun án làá nàan̄ úǹ u-bee, kii an nín sòon̄ pu ki síiǹee.>»