Daniel Gbɔŋku 8

An lēē upìja nì uŋɔja ki dàkā Daniyeel

1 «An nín nìn lēē ki dàkā-mi mpeepeekaam puee, boonee ní an tí fātìi lēē ki dàkā mama Daniyeel, ubɔti Baltasaar nín jíń dibeel dibintataatiil poonee. 2 M bíi kpèé an nín bíi lèekī pu ki dàkà-mee ní an ŋá-mi kii m bí Suusi tiŋkinee. Kitiŋ gbanti nìn bí Eelam tiŋgbaŋkin ní. M gbíntìi bíi kpèé an nín bíi lèekī pu ki dàkà-mee ní m gíti ká yii m yú Ulayii buŋŋu caŋin. 3 M yáatì m-yil ki kpēēyee, upìja yú mbunee caŋin. Upìjee cáá iyin ili. Iyinee fɔ̀kɔ̀ ama ŋubɔ fɔ̀kɔǹ ŋun kíǹee ní ŋun fɔ̀kɔ̀ gbantee mun di nyáń ki lúŋkì. 4 Míǹ boonee, m ká upìjee dū u-yiŋyi ki bìl̄ ki cūtì ŋwìiń jeetilaŋki pú nì ŋgan pú nì ŋgiil pú, ama báà upeel kaa ŋúń ki yúl̀ u-nimbiinaaa, ubɔ mun kaa ŋūǹ kí fōō u-juti u-ŋaan. U yaa là puee, míǹ ní u ŋáań ní ki mɔ̀tīi kāntí mpɔn ki cá.

5 «Ŋyunti ŋun m pée bíi dàkafī tin m kée puee, kpalaayee uŋɔja ubɔ nyánní ŋwìiń nyalaŋki pú ki bāań. U nìn bíi yìiǹ kitiŋ kɔkɔ pu, ama ní u-taaŋi kaa gbèetī kitiŋ. Uŋɔja gbanti nìn cáá ŋyiŋkpaan ŋubɔ u-nimbiliŋ kansikin. 6 U nìn nín cá upìja un cáá iyin ili m bàà ká u yú mbun caŋinee cee. U nìn sáǹ mpɔn ní ki nín cá u-cee. 7 M ká u sáǹ ki tóob́ upìjee nín yú puee ní ki fōō mbum u-pu. U nìn gūū-u ní upìjee yiŋyi ilee cúu gíì. Upìjee kaa nìn ká mpɔn ki yúl̀ u-nimbiin. U nìn yōoǹ upìjee ki yá kitiŋ ki tàn̄ tàn̄. Ubɔ kaa nìn bí kí ŋmā kí fīī upìjee u-ŋaan. 8 Uŋɔjee nìn mɔ̀tīi kāntí mpɔn ki cá. Ama ŋyunti ŋun u bàà ká mpɔn páaayee ní ŋyiŋkpaanee cúu gíì, ní iyiŋkpaan inaa nyáń ki téeǹ ŋun béeyee yil pu ki túĺ kitiŋ jannaatiliŋ.

9 «Ní ŋyin ŋubɔ cɔ́tì iyinee kansikin ŋun sá kiwaayee pu ní ki fɔ̄kɔǹ ki túĺ ŋgiil pú nì ŋwìiń nyalaŋki pú nì kitinnyaaŋŋi^a watil pú. 10 Ní ŋu mɔ̄tìi wíiǹ ní ki yíkìi bíi jáà nì yilpu janjakitil. Ŋu nìn téé dijanjakitilee dijandi nì iŋmalbijaa ki lúkú kitiŋ ní ki tàn̄ tàn̄-bi^b. 11 Ŋu nìn yōoǹ ŋu-ba ki dūu ŋmāntiǹ dijanjakitilee kpiliu, ní ki kúntì saraa un bi ŋáań baabadalee ní ki kɔ́ǹ circir kɔŋkooŋŋu tijɔkɔndi^c. 12 Atuŋkpiti gbanti puee, bi dū dijanjakitilee nì saraa un bi ŋáań baabadalee ki ŋá ŋu-ŋaan. Ŋyinee líì fookiimɔnti, ní tin kɔkɔ u ŋáańee bútí-u.

13 «Niinee ní m gbìl̄ ntuun ŋubɔ bíi sòoǹ. Ní ntuun ŋubɔ mun bālifì-ŋu yii: <Tibɔti tin ní dileedakal nee sòoǹee làá yúntí kí cáá sāā ŋyunti ŋulɔŋu ní? Kí dāá sāā ŋyunti ŋulɔŋu ní saraabi bin bi ŋáań baabadalee làá gbèen̄ ní? Atuŋkpiti ŋin bíiĺ tikɔkɔee làá nīn bí kí cáá sāā ŋyunti ŋulɔŋu? Bi làá tāā tāā yilpu janjakitil nì circir kɔŋkooŋŋu kí cáá sāā ŋyunti ŋulɔŋu ní?> 14 Ní ntuun mpeepeekaayee kíí-ŋu yii: <Kí cáá sāā iwiin kutukub bili nì alaataa ata kujoou nì kutaafaau. Míǹ boonee ní bí fàtīí ŋāŋkì circir paaŋŋu.>»

Dileedakal dililiitiil taapu

15 «Ŋyunti ŋun mama Daniyeel, m bíi kpèé an nín lèekī pu ki dàkà-mi m nyàab̀ kí gbìl̄ taapuee ní ubɔ, u náań nì unil yam, dɔ́miń ki yúl̀ m-nimbiin^d. 16 Ní m gbìl̄ unil ubɔ téeń Ulayii buŋŋu poon yii: <Gabriyeel, tùkù uninja nee dileedakal nee taapu.> 17 Ní u nín dòoń laakin m sée. U tóobiń-mee ní m-pɔbil bíil̀ ní m tātìi dōoǹ kitiŋ dicincibil. Ní u tùkū-mi yii: <Nisaaleen, á béé yii dileedakal nee sá ŋyuntijoolkaa bɔti ní.> 18 Ŋyunti ŋun u bíi sòoǹ nì mee, ní m fìkī ki gbíntìi dɔ̄ dicincibil. Ní u gbēē-mi ní ki yōoǹ-mi kí síiǹ m-taaŋi pu. 19 Míǹ boonee ní u tùkū-mi yii: <M làá yàntī á béé tin làá dāá dāan̄ Unimbɔti ŋuul boonee, di sá yii bi síiǹ ŋyunti ŋun ní tikɔkɔ làá kúntée. 20 Upìja un a ká u cáá iyin ilee sá Meedeesi nì Peeriisi yab bɔtiibi ní. 21 Uŋɔja un bàà cáá tikuti sùuuyee, Greesi bɔtiu dee. Ŋyiŋkpaan ŋun bí u-nimbiliŋ kansikinee, ubɔtipeekaa dee. 22 Ŋyinee nín gíìyee, inaa in nyáń ki téeǹ ŋu-yil puee sá abee anaa ŋin làá dāá nyā ditimbundee poonee ní, ama ŋaa làá dāá ká ŋu-pɔŋŋu juti. 23 Abee gbanti yaa láa kúntì ní binikpitib mun kpitii yaa láa wíiǹee, ubɔti un dāa cáá dilambil ki nyí diŋmatindee làá dāá nyā. 24 U-pɔŋŋu làá dāá nīn wīintí ní ki cá, ama mpɔnee kaa dāa nyēeń u-cee. U làá dāá ŋá asaluu tikpil ní tin kɔkɔ u dāa ŋáańee dāa bútí-u. U làá dāá kpɔ̀ kí céetí bipɔndambi nì circir nibul gba. 25 U nín dāa ŋūǹ ki yáb̀ puee, u làá dāá ŋmàtiǹ binib tikpil. U-lambil poonee, u làá dāá kpɔ̀ binib bin dàkafī yii bi bí ŋgbansɔŋfinee, ní kí dāá yīkì kí já nì abɔtibil kɔkɔ kpiliu. Ama ubɔ kaa làá dāá gbēē-u ní án nàan̄-u. 26 An yaa sá bi nín sòon̄ kujoou nì kutaafaau leedakal poon puee, an sá tiŋman ní. Siiyee, kpāafì dileedakal gbanti dibalin, kun puee dì sòoǹ ŋyunti ŋun dá láá dátèe pu ní.> 27 Niinee, mama Daniyeel, m-wunti kpíì ní m búŋkì iwiin kupaau. Míǹ boonee ní m yíkì ki bíi tūǹ ubɔti tundi. Dileedakalee bɔti nìn páb́-mi tikpil, di sá yii maa nìn gbìl̀ di-taapu.»