Daniel Gbɔŋku 11

1 «Úǹ ní mama m-ba nìn bɔ́ ŋŋal ki tútúǹ-u Daariyusi, umeedija nín kāl̀ dibeelee bimpeepeekaal poon. 2 Kɔŋkɔnnee, m làá tùkù-si mbaamɔn.

Ŋgan nì ŋgiil pú bɔtiibi jaaku

«Bibɔtiibi bita láa gíti kàl̄ Peeriisi tiŋki pu dibeel. Bíǹ boonee, unanaati làá kàl̄ ní kí kóoǹ tigaajati tikpil kí kpāafì kí jītíǹ bipeepeekaabee kɔkɔ. U-gaajatee yaa láa yāntì u ká mpɔnee, u làá dāá yīkì kí bóob́ Greesi tiŋki pu dikɔ̀ndi. 3 Ama ubɔti un cáá dibaatandee làá dāá kàl̄ Greesi tiŋki pu. Kitiŋ kin u làá dāá nīn kpòotēe làá dāá nīn wāā, ní u dāa ŋáań u nín là puee. 4 Nì míǹ kɔkɔee, u yaa láa kāl̀ dibeel ki cúú mpɔnee ní u-beel gbanti ń dāá wīī kí yàkatī minaa pu kitiŋ jannaatiliŋ kɔkɔ pu. U-naantiibi kaa làá dāá fōō u-yil kí kàl̄ dibeel. Bi làá dāá fōō dibeel u-ŋaan kí tīī biba fám, ama bíǹ kaa làá dāá ká u-pɔŋŋu juti.

5 «Ŋgan pú tiŋki bɔtiu làá dāá ká mpɔn. Ama u-janjakpilib kansikin ubɔ làá dāá nīn cáá mpɔn ki jítiǹ-u ní u-beel ń dāá nīn jítiǹ úǹ yal. 6 Abin aba boonee ní bí dāá ŋá mpèé. Ŋgiil pú tiŋki bɔtiu bisal làá dāá mɔ̄ǹ ŋgan pú tiŋki bɔtiu kí dàkà mpèé ŋun bí bi-kansikinee, ama waa làá ŋmā kí ká mpɔn kí tin kátí-ku. U-cal u-ba kaa làá ŋmátí, kibiki kin bi màl̄ee mun làá kpú. U làá kpú kí kpáaǹ u-baa nì u-cal nì bin cūnnì-u niinee. 7 U-dicaŋku poon ubɔ làá dāá fōō u-baa yil ní kí bóob́ ŋgiil pú tiŋki bɔtiu pu dikɔ̀ndi. U làá dāá ŋmā kí kɔ́ ubɔtee tiŋki kin bi máń digundi ki māntìi túee poon kí já kí pɔ̄ɔkiǹ-u. 8 U làá dāá yòon̄ bi-waaŋi nì bi-gaajawammɔntiiti tin sá animbil kúti nì sindaariyee kí kpáàá cùnnì Eejipiti tiŋkin. Míǹ boon abiŋkaaŋkaa poonee, waa làá ti táká ŋgan pú tiŋki bɔtiu. 9 Ŋgiil pú tiŋki bɔtiu làá dāá cù ŋgan pú tiŋkin ní boonee kí dāá fàtīí gítí úǹ u-ba tiŋkin.

10 «Ŋgiil pú tiŋki bɔtiu jipɔmbi làá dāá bɔ́ntí kujaau ní kí dāá kóoǹ ajanjakiti tikpil kí kpāfì. U-jipɔmbee kansikin ubɔ làá dāá yīkì u nì u-janjakitil kí jītí kitiŋ kpaanyɔkɔ kii mbun ŋun gbée. U yaa fàtīi kùǹee, u làá já nì unannanli timmu mun bi máń digundi ki túee kiba. 11 Niinee ŋgiil pú tiŋki bɔtiu làá gíí diŋuul ní kí cùú já nì ŋgan pú tiŋki bɔtiu. Ubɔti gbanti làá dāá kóoǹ ajanjakiti kupaau kí kpāfì, ama ŋgiil pú tiŋki bɔtiu làá dāá já kí pɔ̄ɔkiǹ-ŋi. 12 U yaa láa pée jáń ki pɔ́ɔkiǹ-bee, ní ú dāá kɔ́ dilambilin. U làá dāá kpɔ̀ bijanjaliibi kutukub kutukub, ama waa làá já kí jī. 13 Ŋgan pú tiŋki bɔtiu làá dāá fàtīí kóoǹ ajanjakiti ŋin wīikí ki jítiǹ apeepeekaayee kí kpāfì. Abiŋkaaŋkaa aba boonee, u làá fàtīí gítiń nì dijanjakitikpaandi gbanti nì tijanjawan tikpil. 14 Ŋyunti gbantee, binib tikpil làá dāá yīkì kí já nì ŋgiil pú tiŋki bɔtiu. Daniyeel, ki kpáaǹ a-nibul kansikin, binib bin néeń tipɔmbɔtee làá dāá já nì u. Bi làá nyàab̀ kí bàà ŋá kii an nín sòon̄ dileedakal diban puee, ama baa làá dāá ŋmā-u. 15 Ŋgan pú bɔtiu làá dāá já nì kitiŋ kin bi máń digundi ki túee. Bi làá dāá cáań ntam kí kpúkuń digundi boon kí ŋmā kí tɔ́kɔń kí já nì kì. Ŋgan pú bɔtiu janjaliibi kaa làá dāá ŋmā kí yūĺ u-nimbiin, ki kpáaǹ u-janjaliibi bin tòó kaa lántée. Baa làá dāá ká mpɔn kí yūĺ kí já. 16 Ŋgan pú bɔtiu gbantee dāa ŋáań u nín là puee ní, ní ubɔ mun kaa dāa bí kí yūĺ u-nimbiin. U dāa bí kitinnyaaŋŋin ní ki ŋúb́ dinàandi pɔŋŋu u-ŋaan. 17 U làá dāá cù ŋgiil pú tiŋki bɔtiu cee nì u-beel pɔŋŋu kɔkɔ. U làá dāá dū u-bisal kí tīī-u ticati ki bàà dàkafī yii án nàan̄-u, ama án kaa làá ŋá kii u nín bàà dàkafī puee. 18 Niinee ní ú fàtī u-nimbikpeeŋu kí túĺ ntimu mun dɔ̄ dimɔɔgbandee ní kí já kí fōō mu-kansikin tikpil. Ama ujanjakpil ubɔ un sá unicaanee làá dāá kúntí u-lambil, ní kí yàntī u-bimbim gìŋ́ŋi ń lítí u-pu. 19 Niinee ní ú dāá fàtīí gítí u-timmu mun bi máń agun ki túee poon, ama u làá dāá gbéetí kí lítí ní baa ti làá ká-u. 20 Un làá dāá fōō u-yilee làá dāá tɔ̄ń ubɔ ú fūkul̀ dibeel poon kudii kun pée ŋān̄ee. Ama iwiŋkaaŋkaa boonee, bi làá dāá kpɔ̀ ubɔti gbanti, an kaa dāa sá kujaaun, ama dibalin.

21 «Un baa pée dūu yíiń tiba baa kāaǹ dibeelee làá dāá fōō u-yil. Ŋgbansɔŋfi yuntiŋu ní u làá dāan̄ kí dū biibii kí fōō dibeel. 22 Dijanjakitil diba kaa dāa ŋūǹ kí já kí pɔ̄ɔkiǹ-u. U làá dāá nà bi-kɔkɔ ní kí kpáàa kpɔ̀ dipoondi nibul kpiliu ubɔ. 23 U làá dāá dī mpèé ŋun u nì bin kíǹee ŋée pu kí ŋmàtiǹ binib, ní u-pɔŋŋu dāa wīintí ki cá, min kamaa binib bin dī u-boonee kaa náaǹee. 24 Ŋyunti ŋun ní kitiŋ bí ŋgbansɔŋfinee, u làá dāá cù ntimu mun cáá ntiŋkpamee poon kí ŋá tin ní u-baabi nì u-naanjab kaa nìn pée ŋá ki kée. U làá dāá fūkul̀ kitiŋee ní kí dū tin u fúkúl̀ee nì tigaajawan kí yàkatī u-naacimbi. U làá dāá màkan̄ gba kí já nì ntimu mun bi máń digundi ki túee. Ama tíǹ kaa làá yúntí.

25 «U làá dāá nīn máká u-pɔŋŋu nì u-nyannyaaku pu ní kí dāá yòon̄ dijanjakitikpaandi diba kí cùú já nì ŋgiil pú tiŋki bɔtiu. Ubɔtee mun làá dāá yīkì kujaau pu nì dijanjakitil din sá dikpaandi ki pɔ̄ɔ̄ tiŋanee, ama waa làá dāá ŋmā kí yūĺ ŋgan pú tiŋki bɔtiu nimbiin, di sá yii bi làá dāá bɔ́ntí u-pu kí já nì u. 26 U nì bin dāa kpáfí ki jīǹ disambibaantiilinee di làá dāá dū-u kí nyāfì. Bi làá dāá já kí pɔ̄ɔkiǹ u-janjakitil ní u-janjaliibi tikpil ń dāá kpú. 27 Bibɔtiibi bilee làá dāá nīn kā ki jīǹ disambibaantiil poon, ama, bi-pɔbiliŋ poonee, bi dāa nyàab̀ kí ŋá tɔb tikpitil. Bi dāa kā ní ki mɔ́ntí tɔb. Bi nín kāl̀ ki bóob́ puee kaa làá tɔ̄ ditundi, di sá yii ŋyunti ŋun bi síiǹee kaa láá bàn̄. 28 Ŋgan pú tiŋki bɔtiuee làá dāá kpáaǹ tigaajawan tikpil kí gítí u-tiŋkin. U yaa kùǹee, u làá já nì dinibul din nì Unimbɔti ŋá dipoondee, kii u nín lēē u-pɔbilin puee. Míǹ boonee ní ú nīn nín kùǹ.

29 «Ŋyunti ŋun bi síiǹee yaa bàn̄ee, ŋgan pú tiŋki bɔtiu làá dāá gítí ŋgiil pú tiŋkin kí já nì kì, ama min bí nee, an kaa làá ŋá kii mpeepeekaaminee. 30 Binib làá nyānní ŋwìiń jeetilaŋki pú ki kāń meelabin kí já nì u. U-wunti làá yɔ̀tī ní ú fàtīí nīn kùǹ. U làá dāá gíí diŋuul ŋkpitim pu ní kí dū u-ŋuul kí nyìntī dinibul din nì Unimbɔti ŋá dipoondee. U làá gbìl̄ kí tīī nì bin fá Unimbɔti poondee. 31 U làá dāá tɔ̄ń u-janjaliibi bí dāá yūĺ digundi din māntìi tú kunimbɔtidiiyee. Bi làá dāá kɔ́ circir páaa laŋki kí kɔ́ǹ-kì tijɔkɔndi. Bi làá dāá kúntí saraa un bi ŋáań baabadal ki tìì Unimbɔtee ní kí dāá dū kuwaŋkpitiu kun cāabìń ntimbiilee kí síiń circir paaŋŋu pu^a. 32 Ubɔti u-ba làá dāá dū biibii kí ŋmàtiǹ binib bí fá dipoondi. Ama dinibul poon bin nyí bi-Nimbɔtiuee làá dāá nīn ŋúb́ an píkí ní kí já nì u. 33 Bíǹ gbanti kansikinee, bin yaa láa cáá dinyilee di dāa dàkà binib tikpil. Ama iwiŋkaaŋkaa poonee, bi làá dāá kpɔ̀ biba ní kí wà biba mun ŋŋmi, ní kí cūtì biba kí tɔ̄ sarkan ní kí dāá gbākal̀ biba mun bi-gaajawanti kɔkɔ. 34 Agìń yuntiŋu gbanti poonee, bi làá dāá pée ká dijòońdi fiii ní. Di sá yii binib tikpil làá dāá kūtì bi-pu nì mili mili pɔbil. 35 Biciŋfitiibi gbanti kansikin biba làá dāá kpú, án nín làá ŋá pu bi-kúmee ń fíntí Unimbɔti nibul kí ŋá-bi circir bí pīil̀ káŋkaŋ kí cáá sāā ŋyunti ŋun ní tikɔkɔ làá kúntée, di sá yii ŋyuntijoolkaa kaa láá bāań.

36 «Ubɔti làá dāá nīn ŋáań min ní u lèe. U làá dāá yòon̄ u-ba yilpu ní ki dāa dàkafī yii u jítiǹ awaa kɔkɔ gba. U làá dāá sòoǹ nì inimbɔti kɔkɔ Nimbɔtiu tibɔti tin baa máaǹ kí sòoǹee. Án làá dāá bútí-u kí cáá sāā Unimbɔti ŋuul dal. Niinee ní Unimbɔti ń ŋá tin u sòon̄ ki síiǹee^b. 37 Ubɔtee kaa dāa fātìi tɔ́ awaa ŋin u-baabi nìn tòotēeyaaa, kaa dāa fātìi tɔ́ ŋin binimpoobi néeń ki jáaḿee. Waa dāa pée fātìi tɔ́ diwaal dibaba gba, di sá yii u làá dāá pée yòon̄ u-ba kí tɔ́kɔń tikɔkɔ nì tikɔkɔ pu ní. 38 Awaa gbanti paaŋŋuee, u làá dāá nīn tìì diwaal din cí ntimuee tinyool, diwaal din u-naanjab kaa pée nyí ki kée. U dāa dù sindaariya nì animbil nì ataŋkpamɔnti nì tiwan tin cáá kudapɔɔuee ní kí ŋá-dì saraa. 39 U làá dāá já nì ntimu mun bi máń digundi ki túee nì diwaacandi gbanti tūtuntam. U làá dāá tīī bin kíí kí jāam̀-dèe tinyool, ní kí dāá dū-bi kí kàan̄ binib tikpil pu bí nīn sá bi-kpootiliibi, ní kí dāá pɔ̄-bi ntimu án nīn sá bi-paatii.

40 «Ŋyuntijoolkaa poonee, ŋgiil pú tiŋki bɔtiu làá dāá yīkì kí já nì ŋgan pú tiŋki bɔtiu. Ama úǹ dāa yíkí kí bīikì u-pu nì kujaau tɔrɔkub nì u-janjaliibi bin jàkà itaamuee nì meelab tikpil. U làá dāá kɔ́ ntimun ní kí kpátíí gbí an kɔkɔ. 41 U làá dāá kɔ́ kitinnyaaŋŋi poon ní binib tikpil làá dāá kpú. Bin làá dāá ŋmátí kí nyā u-ŋaanee di sá Eedoom yab nì Moowaab yab nì Amɔn yab kpilib. 42 Ntimu mubɔ mun làá dāá kɔ́ u-ŋaan, ki kpáaǹ Eejipiti tiŋki gba kaa làá ŋmátí kí nyā u-ŋaan. 43 U làá dāá fōō Eejipiti gaajawanti kɔkɔ, an dàkà yii sindaariya nì animbil nì tin kɔkɔ pée pɔ̄ɔ̄ kudaauee. Liibii yab nì Eetiiyoopii yab làá dāá nīn bí u-taapu. 44 Ama u làá dāá gbìl̄ tin bíi jītí ŋwìiń nyalaŋki pú nì ŋgan púee ní tifaandi ń cúú-u. U làá dāá gíí diŋuul ŋkpitim pu ní kí búntí kí cùú kpɔ̀ kí céetí binib tikpil. 45 U làá dāá gāā u-beecindi tantib tiŋku nì kitinnyaaŋŋi circir jool kansikin. Niin ní u làá kpú, ní ubɔ dāa kpá kí jòoń-u.>»