Eeseekiyeel 45

Ntimu mun sá ki tīī ti-Dindaanee

1 «Ni yaa làá yàkatī Isirayeel tiŋki kí tīī tinaakɔtee, ní lēē kitiŋ dijandi diba kí dūú sú ti-Dindaan. Kitiŋ dijandi gbanti púuŋŋu ń nīn sá ndɔŋmantikaayee kutukub mmuŋku nì biŋmoo pu ní ki-waaŋŋu ń nīn sá ndɔŋmantikaayee kutukub mmuŋku. Ditinjandi gbanti làá nīn sá circir tiŋki ní. 2 Ditinjandi gbanti poonee, bí lēē kunimbɔtidii paaŋŋu ŋu-jannaatiliŋ ń nīn ŋmà ní dijandi diba ń nīn sá ndɔŋmantikaayee alaataa aŋmoo pu. Mpaan ŋubɔ ń nīn dɔ̄ fám kí màntīí tū, ní mpaanee waaŋŋu ń nīn sá ndɔŋmantikaayee imuŋku ili nì saalaa pu. 3 Kunimbɔtidii tinjandi poonee, bí ŋmàntī dijandi diba mpúun nì ŋwaan ń nīn ŋmà. Mpúun ń nīn sá ndɔŋmantikaayee kutukub mmuŋku nì biŋmoo pu ní ŋwaan ń nīn sá kutukub saalaa pu. Niin ní circir kɔŋkooŋŋu, <circir páaa laŋki> làá nīn bí. 4 Ditinjandi gbanti làá nīn sá circir wanti ní. Bí dū-dì kí tīī bisaraaŋaliibi bin bí ti-Dindaan nimbiin circir kɔŋkooŋŋun ditundee. Bi dāa cáá kí mā bi-diiŋŋi niin ní an dāa sá circir paaŋŋu ki tīī circir kɔŋkooŋŋu. 5 Bí dāá gíti lēē ditinjandi diba di-púuŋŋu ń nīn sá ndɔŋmantikaayee kutukub mmuŋku nì biŋmoo pu, ŋwaan ń nīn sá kutukub saalaa pu kí tīī Leefii yab bin bí kunimbɔtidii tundinee. Bi làá dāá ká niin ntimu kí nīn kóò. 6 Kí nóó ditinjandi din bi dūu sú ti-Dindaanee púuŋŋu puee, bí ŋmàntī mpúun ń nīn sá ndɔŋmantikaayee kutukub mmuŋku nì biŋmoo pu, ní ŋwaan ń nīn sá kutukub biŋmoo pu. Bi làá mā kitiŋ kiba niin, ní Isirayeel yab un yaa pée lèe ŋūǹ kí kɔ́ niin. 7 Bí dāá lēē ditinjandi laakin bi lēē ki sú ti-Dindaanee jandi pú nì kitiŋ jandi pú kí tīī dibɔtibil din kā dibeel puee. Ŋwìiń jeetilaŋki púee, ditinjandi gbanti ń bà Meediiteeranee tiŋkuu, ní ŋwìiń nyalaŋki púee, dí bà Isirayeel tinnyɔkɔ. Di-púuŋŋu nì kunaakoou kamaa kpaatanti púuŋŋu ń nīn ŋmà. 8 An yaa ŋá mimmee abɔtibil làá nīn cáá kitiŋ Isirayeel tiŋkin. Baa làá ti mùul̀ ti-Dindaan nibul, ní kí dū kitiŋ kin kíǹee kí tīī Isirayeel naakɔti.»

Dibɔtibil nín cáá nsan kí ŋá tiŋyee nì di-tundi

9 Ti-Dindaan Unimbɔti nín sòon̄ puee sèé: «Nimbi abɔtibil ŋin kā Isirayeel beel puee, ni gíti ŋá an jítì mara pu! Fámaan tipɔmbɔti nì diwɔ́bil, kí nóómaan tin tèen̄ee nì tin bí deedeeyee. Ní taa ti fìkì m-nibul gaajawanti. Man ni-Dindaan Unimbɔti di sòon̄!

10 «Ni-saniyab ń nīn sá deedee saniyab ní ni-waŋŋmantikaati ń nīn sá deedee yab. 11 Ni-sambiliŋ ŋin ni cáa ŋmàntī tijimpin ni yíì eefa nì ni-wanti tin ni cáa ŋmàntī inyiŋfi bi yíì baatee ń nīn ŋmà, an dàkà yii bi yaa yākatì oomeer saalaa puee, diba pu. Ni-waŋŋmantikaati ń nīn nóó nì oomeer gbanti. 12 Bí nīn kpántí animbil kuluku jitɔmbi mmuŋku, ní dinimbikundi ń kpántí jitɔmbi imuŋku ita.

13 «Ni nín làá nīn lèekī ni-saraabi puee sɔ̀. Ni yaa cáń ni-bileeu àá ni-ɔɔjiuee, ní cúú kí yàkatī imuŋku ita pu 14 ní kí yàkatī ni-kpam dilaataal pu kí dū diba pu kí tīī. Ní dū ni-wanti tin bi yíì bati bi yaa yākatì oomeer saalaa pu an sá diba puee kí ŋmàntī ŋkpam. Oomeer nì kɔɔr ŋmà ní. 15 Isirayeel yab naakpaapɔɔkunee, ní lēē ipii kulaafaau poon àá iŋoobu kulaafaau poonee ubɔ kí ŋá tijimpin saraau àá saraawɔkaa àá mpèé saraau. Ni yaa ŋá mimmee, ni làá ká ni-kpitii pɔ̄tam. Man ni-Dindaan Unimbɔti di sòon̄ míǹ.

16 «Bin kɔkɔ kóò Isirayeel tiŋkinee máaǹ kí cáań bi-jandi kí tīī dibɔtibil din kā Isirayeel beel puee. 17 Di sá yii dibɔtibil nín máaǹ kí tīī tiwan tin bi làá dūú ŋá bisaraawɔkaabee nì tijimpin saraabee nì ndaam min bi féeń jiŋaalib yuntiŋuee, cilinjee uŋmapɔɔn jiŋaaliu nì iwiŋŋuŋfikaa nì iyunti in kíǹ Isirayeel yab kpáfée. Dibɔtibil di làá nīn ŋáań ikpiti pɔ̄tam nì tijimpin saraabi nì bisaraawɔkaabi nì mpèé saraabi. U yaa ŋá mimmee, Isirayeel nibul làá ká bi-kpitii pɔ̄tam.»

18 Ti-Dindaan Unimbɔti gíti sòon̄ yii: «Uŋmapeekaa wimpeekaaŋuee, ní dū unaja un laaba kaa wɔ̀b̄ee kí ŋá saraa kí ŋá circir kɔŋkooŋŋu circir. 19 Usaraaŋakpil ń yòon̄ kuwaŋkuluu kun bi dūu ŋá saraayee fatikuu kí dūú ŋmìtī idɔ in pu kunimbɔtidii punuu sàkēe pu nì nsaraafan kpiŋŋi anaatil pu nì idɔ in pu kunimbɔtidii poon cindi punuubi sàkēe. 20 Iwiin iluli dalee, bí fàtīí ŋá tiwambaantiil kí tīī un kaa là àá kaa nyí ki ŋá ikpitee. Bi yaa ŋá mimmee, bi làá ŋá kunimbɔtidii circir.

21 «Ŋwiin ŋubɔ kpá saalku dalee, ní kíĺ kí jī Dilákatil jiŋaaliu. Jiŋaal gbanti làá fōō iwiin iluli, ní iwiin iluli gbanti poonee, ní taa ŋmɔ́ kpɔnɔb bin cáá ŋkpɔnɔnyɔkɔee. 22 Dilákatil jiŋaaliu wimpeekaaŋuee, dibɔtibil ń dū unaja ubɔ kí ŋá saraa úǹ u-ba nì samaa kɔkɔ kpitii pɔ̄tam pu. 23 Iwiin iluli in bi làá dūú jī jiŋaalee kamaayee, ú dū inajaa iluli nì ipijaa iluli in laaba kaa wɔ̀b̄ee kí dūú ŋá saraawɔkaa. Ŋwiin kamaayee, ú dū uŋɔja ubɔ kí ŋá ikpiti pɔ̄tam saraau. 24 Kí kúntée, bi yaa dū unaja ubɔ nì upìja ubɔ ki ŋá saraayee, ú dū bilee kiiloobi mmuŋku nì saalaa nì ŋkpam liitirib biluu kí kūtì.

25 «Uŋmaluluúti poon iwiin saalku dal, bi yaa bíi jīǹ tibìń jiŋaaliuee, dibɔtibil ń pée ŋá kii u nín ŋá Dilákatil jiŋaaliu puee. Iwiin iluli in bi làá dūú jī jiŋaal gbanti kɔkɔee, ú ŋá saraabaantiibi kí ká ikpiti pɔ̄tam, nì bisaraawɔkaabi bibaantiibi nì bilee nì ŋkpam saraabi bibaantiibi.»