Eeseekiyeel 46

Abɔkpaa ŋin sá ki tīī dibɔtibilee

1 Ti-Dindaan Unimbɔti nín sòon̄ puee sèé: «Kunimbɔtidii poon cindi punyɔkɔki kin bí ŋwìiń nyalaŋki púee máaǹ kí nīn pīī iwiin iluu in binib tūǹ ditundee, ama ŋwiŋŋuŋfikaa dal nì uŋmapɔɔn jiŋaalibee, bí pìitī-kì. 2 Dibɔtibil làá nyānní kunimbɔtidii boon cindi ní kí dī kudii kun bí ki pìl̄ kipunyɔkɔee kí kɔ́. Ú yūĺ idɔ in pu punuu sàkēe poon ŋyunti ŋun ní bisaraaŋaliibi bíi ŋáań bisaraawɔkaabi nì mpèé saraabee. Kipunyɔkɔpu niinee, ú tàtīí gbàan̄ kí dū u-yigbeel kí tūū kitiŋ ní kí fàtīí nīn gítí. Baa máaǹ kí pìin̄ kipunyɔkɔee kí cáá sāā kujoou. 3 Di sá yii iwiŋŋuŋfikaa dal nì uŋmapɔɔn jiŋaalibee, kitiŋ nee pu nib máaǹ kí dāan̄ kipunyɔkɔee caŋin kí jāam̀ man ni-Dindaan.

4 «Ŋwiŋŋuŋfikaa dalee, dibɔtibil ń dū apibil aluu nì uŋɔja un laaba kaa wɔ̀b̄ee kí ŋá saraawɔkaa. 5 Ú dū bilee kiiloobi mmuŋku nì saalaa kí ŋá saraa kí kūtì upìja kamaa pu ní kí dū bilee un u yaa lèe kí ŋá saraa kí kūtì ipii pu. Ú dāá dū ŋkpam liitirib biluu kí kūtì bilee kiiloobi mmuŋku nì saalaayee pu. 6 Uŋmapɔɔn jiŋaaliu wiiŋyi dalee, ú dū unaja un laaba kaa wɔ̀b̄ee nì apibil aluu ŋin laaba kaa wɔ̀b̄ee nì upìja un laaba kaa wɔ̀b̄ee kí ŋá saraa. 7 Unaja kamaa nì upìja kamaa puee, ú dū bilee kiiloobi mmuŋku nì saalaa kí kūtì kí ŋá saraa nì bilee min nyɔkɔm u lèe kí kūtì apibil pu kí ŋá saraa. Ú dāá dū ŋkpam liitirib biluu kí kūtì bilee kiiloobi mmuŋku nì saalaa kamaa pu. 8 Nsan ŋun dibɔtibil yaa dī ki kɔ́ee, ú fàtīí dī nsan gbanti kí nyānní kí jītí kuditaakaau kun pìlīǹ kipunyɔkɔee. 9 Ama kitiŋ nee nib yaa dòoń kí jāam̀ man ni-Dindaan jiŋaakpaambi wiiŋyi poonee, bin dī ŋgan pú punyɔkɔki ki kɔ́nnée ń dī ŋgiil pú punyɔkɔki kí nyā. Bin dī ŋgiil pú punyɔkɔki ki kɔ́nnée ń dī ŋgan pú punyɔkɔki kí nyā. Ubɔ ń taa fàtīí dī kipunyɔkɔ kin u dī ki kɔ́nnée kí nyā, ama báà ŋma ń dī kipunyɔkɔ kin bíitiǹ kin u dī ki kɔ́nnée kí nyā. 10 Dibɔtibil yaa kóòyee, samaa mun ń kɔ́, u yaa nyēēyee, samaa mun ń nyā.»

Saraabi bin kíǹee marab

11 «Jiŋaalib nì iwiŋkpaan dalee, bí dū bilee kiiloobi mmuŋku nì saalaa kí kūtì unaja àá upìja kamaa pu kí ŋá saraa, ní kí dū bilee un nyɔkɔm bi yaa lèe kí kūtì apibil pu kí ŋá saraa. Bilee kiiloobi mmuŋku nì saalaa kamaa puee, bí dū ŋkpam liitirib biluu kí kūtì kí ŋá saraa.

12 «Dibɔtibil yaa là kí ŋá nlammɔntiim saraau kí tīī ti-Dindaan ní an yaa sá saraawɔkaa àá mpèé saraauee, bí pìitī-u ŋwìiń nyalaŋki pú punyɔkɔki ú dī kí kɔ́. Ú ŋá u-saraabi kii bi nín ŋáań ŋwiŋŋuŋfikaa saraabi puee. U yaa nyánnée, bí fàtīí gíiǹ kipunyɔkɔee kí pìin̄.

13 «Ŋwiin kamaayee, bí dū dibindi diba pibil din laaba kaa wɔ̀b̄ee kí ŋá saraawɔkaa kí tīī ti-Dindaan. Kutaafaau ní bi máaǹ kí ŋá saraa gbanti. 14 Kutaafaau kamaa muee, bí dū ŋkpam liitirib bili kí búuń ŋyim kiiloobi biŋmoo kí ŋá saraa kí tīī ti-Dindaan. Baabadal saraau marab gbanti làá nīn bí ní ki cá jaanjaan. 15 Bi máaǹ kí dū dipibil nì ŋyim nì ŋkpam kí ŋá saraawɔkaa kutaafaau kamaa kí tīī ti-Dindaan, bí nīn ŋáań míǹ ki cá talku.»

Dibɔtibil jipɔmbi fakal

16 Ti-Dindaan Unimbɔti nín sòon̄ puee sèé: «Dibɔtibil yaa lēē u-tinjandi poon dijandi ki pú u-jipɔmbi kansikin ubɔee, dijandi gbanti kpántì u-jipɔɔnee fakal dee. U-jipɔɔn gbanti biyaamu di dāa yì kí jī ditinjandi gbanti difakal. An kpántì bi-wanti, kun puee bi fōō-dì difakal ní. 17 Ama dibɔtibil yaa dū u-tinjandi dijandi ki tīī u-tɔntɔnliibi kansikin ubɔee, dijandi gbanti làá nīn sá ki tīī utɔntɔnlee kí cáá sāā dibatɔl bindi^a, ní dibɔtibil ń fàtīí fōō u-wanti. Di sá yii dibɔtibil u-ba biyaamu di yì u-wanti kí jī difakal. 18 Dibɔtibil kaa máaǹ kí fìkì binib bin pu u kā dibeelee ubɔ wanti tiba kí gbākal̀-u kí fōō u-kpaatanti. U yaa làá tīī u-jipɔmbi ubɔ difakalee, ú lēē u-tinjandi poon, án nín làá ŋá pu bí taa jà m-nibul poon ubɔ u-kpaatanti puee.»

Kunimbɔtidii samɔndiiŋŋi

19 Míǹ boonee ní uninjee dū-mi ki dī kipunyɔkɔ kin bí ŋgan pú punuu caŋinee ki cáá-mi ki cūnnì bisaraaŋaliibi diiŋŋi ŋin bí circir kɔŋkooŋŋu caŋinee. U dàkā-mi mpaan ŋubɔ, ŋu bí poon niin ŋwìiń jeetilaŋki pú. 20 Niinee ní u bí-mi yii: «Bi yaa kūū kuwaŋkuluu ki ŋá ikpiti pɔ̄tam saraauee, niin ní bisaraaŋaliibi làá nīn tɔ̄kɔntí tinan. Niin mun ní bi làá nīn tɔ̄kɔntí saraabi jinti. An yaa ŋá mimmee, tiba kaa làá nyā kunimbɔtidii boon cindin ní samaa kaa nín gbēē tin bí circiree.»

21 Míǹ boonee ní u cáá-mi ki cūnnì kunimbɔtidii boon cindin ní ki dū-mi ki dī dicindee kpiŋŋi anaatil. Dikpindi kamaa puee, dicindi nìn bí. 22 Acin anaatilee kaa nìn wāā ní ŋi-kɔkɔ nìn ŋmà. Diba púuŋŋu nìn sá ndɔŋmantikaayee imuŋku ili pu, ní ŋwaan sá mmuŋku nì saalaa pu. 23 Bi nìn dū ataŋkpee ki máń digundi ki tú dicindi kamaa ní bi máń ifan digundee taapu. 24 Uninjee nìn bí-mi yii: «An sá asamɔndiin ŋin poon bininjab bin tūǹ ditundi kunimbɔtidiinee làá nīn tɔ̄kɔntí tiwaŋkuti tin samaa cāabìń ki ŋáań saraayee nantee ní.»