Eeseekiyeel 44

Bi dū ŋwìiń nyalaŋki pú punyɔkɔki ki tīī dibɔtibil

1 Uninjee nìn cūnnì-mi kipunyɔkɔ kin bí boon ŋwìiń nyalaŋki púee. Kì nìn pīī. 2 Ti-Dindaan nìn bí-mi yii: «Kipunyɔkɔ nee làá nīn pée pīī ní, baa máaǹ kí pìitī-kì. Ubɔ ń taa dī ki-poon kí jītí, di sá yii man ni-Dindaan Isirayeel Nimbɔtiu dī niin ní ki kɔ́nní. Ŋú nīn pée pīī. 3 Ama dibɔtibil din kā dibeelee díǹ ŋūǹ kí kàl̄ niin kí jī circir jinti m-nimbiin. Ú dāá dī kipunyɔkɔee kí jītí kuditaakaau kun bí niinee kí kɔ́ ní kí fàtīí dī niin kí nyā.»

Binicambi kaa máaǹ kí kɔ́ kunimbɔtidiin

4 Uninjee nìn dū-mi ki dī ŋgan pú punyɔkɔki ki cūtìi nyáń kunimbɔtidii nyɔkɔpu. M nìn ká yii ti-Dindaan nyooti nìn gbí kunimbɔtidii. Niinee ní m tātìi gbāaǹ m-nimbiin tūū kitiŋ. 5 Ti-Dindaan nìn bí-mi yii: «Nisaaleen, ŋá ŋká. Kpítí a-nimbiliŋ kí ŋátí a-tafaliŋ. Á pīlifì marab nì akoobil ŋin m cáá kí tīī-si m-Diiku puee. Á cúú marab bin sòoǹ bi nín máaǹ kí kɔ́ circir laŋki pu kí fàtīí nyā puee tiŋan.

6 «Á tùkù Isirayeel yab, pɔɔgaatib nee tin man ni-Dindaan Unimbɔti bíi sòoǹee. Isirayeel yab, m gīī nì ntimbiil tuuŋŋi ŋin ni ŋáańee. 7 Ŋyunti ŋun ni cáá m-jandi, ni-saraabi kpam nì bi-fatikuu ki tìì-mee, ni cáá binicambi bin kaa gíí dikpancandi kaa tɔ́-mee ki kɔ̄ntí circir laŋki. Ni ŋáań míǹ ní ki kɔ̄ntí m-Diiku tijɔkɔndi. Ni ŋá ntimbiil tuuŋŋi gbanti ki kpītì mpèé ŋun bí man nì nimbi kansikinee. 8 Nimbi ni-ba kaa túń m-tundi m-circir paaŋŋu pu, ama ní ki yāntì binicambi fōō ni-paaŋŋu ki túń. 9 Man ni-Dindaan Unimbɔti nín sòon̄ yii báà unicaan yaa kóò Isirayeel yab kansikin, ní kaa gíí dikpancandi kaa tɔ́-mee, ú taa kɔ́ m-circir kɔŋkooŋŋun.»

Marab bin sá ki tīī Leefii yabee

10 «Ŋyunti ŋun Isirayeel gáatì ki cūtìi nóó awaayee, Leefii yab nìn fātì bi-boon ki tīī-mi ní ki dū-mi ki fá. An puee, m làá dáaĺ bi-tafal bi-kpitii pu. 11 Bi làá nīn gbíntìi bí m-tundin circir kɔŋkooŋŋun kí nīn cīití m-Diiku punyɔmmu ki tūǹ atuun nín pée bí pu a-ba a-ba m-Diikunee. Bi ŋūǹ kí làntì tiwaŋkuti tin bi làá dūú ŋá bisaraawɔkaabee nì saraabi bin kíǹee. Bi làá nīn tūǹ ditundi ki tìì m-nibul. 12 Ŋyunti ŋun m-nibul nìn bí ki tòotī awaayee, bi nìn túń ditundi ki tīī-bi ní ki yāntì Isirayeel yab kɔ́ ikpitin. An puee man ni-Dindaan Unimbɔti nín sòon̄ puee sɔ̀. M làá jáǹ-bi ní bi-kpitii tafadaaldi ń gítí bi-pu. 13 Baa làá ti ŋmā kí sútí kí pìl̄-mi kí tɔ̄ disaraaŋal tundi, kaa làá ti sútí kí pìl̄ tiwan tin bi dūu sú-mee. Baa máaǹ kí sútí kí pìl̄ circir páaa laŋki. Min ní bi làá túń icoo tuuŋŋi nì ntimbiil tuuŋŋi ŋin bi ŋée tafadaaldee dee. 14 M làá dū kunimbɔtidii poon tundi kí ŋá bi-ŋaan ní bí nīn tūǹ atuun ŋin kɔkɔ bí ku-poon bí tɔ̄ee.»

Marab bin sá ki tīī bisaraaŋaliibee

15 Ŋyunti ŋun Isirayeel yab nìn fātì bi-boon ki tīī man ni-Dindaanee, Leefii yab bisaraaŋaliibi bin sá Saadooki maaliŋunee nìn túń ditundi m-circir paaŋŋu pu an nín máaǹ puee. Bíǹ baba di ŋūǹ kí yūĺ m-nimbiin kí tɔ̄ m-tundi kí dū tiwaŋkuti tin bi dūu ŋá saraabee kpam nì ti-fatikuu kí ŋá-mi saraa. Man ni-Dindaan Unimbɔti di sòon̄ míǹ. 16 Bíǹ baba di làá kɔ́ m-circir kɔŋkooŋŋun ní kí sútí kí pìl̄ m-teebiliu un pu bi tūǹ m-tundee. Bi làá nīn ŋúb́ m-tundi koobiliŋ. 17 Kí wàatī bí kɔ́ kunimbɔtidii poon cindinee, bi máaǹ kí dū bi-wampeeŋkaati tin bi dū iŋaabu in bí fálfal ki jàkēe kí pèen̄. Bí taa dū ipii kuti wampeeŋkaati kí pèen̄ ŋyunti ŋun bi bí kunimbɔtidiin nì ku-cindi poon ki tūǹ ditundee. 18 Bí dū ŋŋaabu ŋun bí fálfalee kí yíĺ ní kí dū fálfal ŋaabuŋu kí cúú kicaŋ. Kutuntuŋu puee, bí taa cúú dambala. 19 Kí wàatī bí nyā kí kɔ́ boon pú cindin, laakin samaa bée, bí pèetī tiwan tin bi pēeǹ ki túń ditundee. Bí dū tiwampeeŋkaal gbanti kí síiń adiin ŋin bí circir laŋkee, ní kí kpántí tiwan, kí taa nín pēē tiwan tin bí circiree kí gbēē samaa.

20 «Bisaraaŋaliibi kaa máaǹ kí kòol̀ diyibaakpandi, kaa tí máaǹ kí yàntī bi-yikpiti ń wíiǹ tikpil, ama bí cā bi-yikpiti tiŋan. 21 Usaraaŋal ubɔ kaa máaǹ kí nyɔ̀ ndaam kí kɔ́ poon cindin. 22 Usaraaŋal kaa máaǹ kí cáab́ ukpiipu àá unimpu un bi jìn̄ee. Ú cáab́ Isirayeel sapɔmbiki kin kaa nyí uninja ki kée kiba àá usaraaŋal ubɔ kpiipuu.

23 «Bisaraaŋaliibi máaǹ kí dàkà m-nibul bí béé kí gàntī tin bí circiree nì tin kaa bí circiree, tin sá tijɔkɔndee nì tin kaa sá tijɔkɔndee. 24 Bíǹ di làá nīn sòoǹ binib bɔti ní kí sòoǹ kí nóó nì m-marab. Bí nīn jīǹ jiŋaalib kí nóó nì akoobil nì abɔkpaa ŋin m tīī-bee. Bi máaǹ kí dū m-wiŋŋuŋfikaai kí sú-mi.

25 «Usaraaŋal kaa máaǹ kí sútí kí pìl̄ dinikpil kí kɔ́ǹ u-ba tijɔkɔndi. Ama an yaa sá u-baa àá u-na àá u-biyaamu kansikin kiba àá u-naal àá u-maan àá u-niisal un kaa láá mɔ́ǹee, u ŋūǹ kí sútí kí pìl̄. 26 Míǹ boonee, ú ŋá u-ba circir ní kí cīití iwiin iluli ní kí nín kíĺ ditundi. 27 Ŋwiin ŋun u yaa fātìi gítì kunimbɔtidii poon cindinee, ú ŋá u-kpitii pɔ̄tam saraau. Man ni-Dindaan Unimbɔti di sòon̄ míǹ. 28 Bisaraaŋaliibi làá nīn cáá diyimɔɔl kí nīn bí m-tundin. Bí taa tīī-bi tikpaatan Isirayeel tiŋkin. Man di sá bi-fakal. 29 Bi làá nīn jīǹ saraabi nì tiwaŋkuti tin bi cáa ŋáań ikpiti pɔ̄tam saraabee. Isirayeel tiŋkin tin kɔkɔ bi dūu sú-mee kpántì bi-wanti ní. 30 Bisaraaŋaliibi di tí yì tijincɔ̀fikaal kɔkɔ nì tin kɔkɔ Isirayeel yab lèekī bi-gaajawanti pu ki tìì-mee. Binib yaa púĺ kpɔnɔee, bí lēē un ŋān̄ ki jítiǹ bi-kɔkɔee kí tīī-bi ní ḿ bìin̄ bi-dicaŋŋi pu. 31 Ama bisaraaŋaliibi kaa máaǹ kí ŋmɔ́ unoon àá kuwaŋkuluu kun kpíì àá upeel ubɔ cúúyee nanti.»