Eeseekiyeel 26

Ti-Dindaan sòon̄ kí bíikì Tiir yab pu

1 Bi nín cúú Isirayeel yab ki cūnnì kuyuŋu abin saalaa nì diba boon, uŋmal^a wimpeekaaŋuee, ti-Dindaan nìn bí-mi yii: 2 «Nisaaleen, pīlifì, Tiir yab bíi bèel̄ Jeerusaleem yab ki lì yii: <An nāaǹ Jeerusaleem, kitiŋ kin pu báà ŋma nìn jītée. An māaǹ-kì! Ti mun yuntiŋu bāań tí kpántí bigaajab deeyaa! Di sá yii kì kpántì adigbuŋkati ŋma ní!> 3 An puee man ni-Dindaan Unimbɔti di sòon̄ yii m làá jáǹ sii Tiir tiŋki. M làá cáań atimbun kupaau kí léeń a-pu kii tiŋku nín yòontí u-nyiŋgbanti yilpu puee. 4 Bi làá kpēelikì agun ŋin a máń ki tú a-tiŋkee ní kí wìil̀ a-sintil difɔkɔŋi. M làá kɔ́tí kitiŋ tam ní kí pée kíń ditaŋkpal dí nīn dɔ̄ fám. 5 Tiir làá kpántí tiŋku kansikin mpaan ŋun pu bijɔncuuliibi làá nīn díntí bi-laantee ní. Man ni-Dindaan Unimbɔti di sòon̄ ní ki làá ŋá míǹ. Atimbun aba làá dāan̄ kí fūkul̀ Tiir tiŋki. 6 Bi làá kpēelikì ki-timbilimmu mun bí ditiŋkugbandee. Niinee báà ŋma làá béé yii man di sá ni-Dindaan.

7 «Di sá yii man ni-Dindaan Unimbɔti di sòon̄ yii: <M làá cáań ŋgan pú bɔtiu un pɔ̄ɔ̄yee, an dàkà yii Babiloon bɔtiu Neebukadineesaar ú jáǹ-si. U làá cáań itaamu nì janjatɔrɔkub nì bitanjakaliibi nì dijanjakitikpaandi kí jáǹ-si. 8 U làá kpēelikì a-timbilimu mun bí ditiŋkugbandee. Míǹ boonee, bijanjaliibi bin dɔ́miń kí jáǹ-see làá gbà gɔtab bin poon bi làá nīn kàal̀ ki jáà nì see ní kí mā ŋgumu mun boon bi làá nīn bí ki jáà nì see, ní kí mā digundi din làá nīn sá kii digbampɔɔlee kí jáǹ-si. 9 Bi làá dū bi-janjamasiimbi kí gbá kí wìil̀ a-guŋŋi ŋin māntìi tú-see ní kí dū jikab kí kpēelikì a-sintil difɔkɔŋi. 10 Bi-taamui nín làá nīn wīikí puee kpɔŋkpɔŋku di làá bìin̄ a-pu, ní bi-tanjakaliibi wooku nì bi-tɔrɔkub taaŋi nín màntī puee làá yàntī a-guŋŋi ń cìŋkì. Di sá yii bi làá dī a-punyɔmmu kí kɔ́ kii bi nín wìil̄ digundi pu kí dī kí kɔ́ puee ní. 11 Bi-taamui taaŋi làá tāā tāā a-daŋŋi kɔkɔ pu ní bí dū ntàataajimu kí kpɔ̀ a-nib ní kí téé a-jantalkukpaambee kí lúkú. 12 Bi làá yòon̄ a-gaajati ní kí fūkul̀ a-wanti. Bi làá wìil̀ a-guŋŋi ní kí kpēelikì a-dinyaaŋŋi. Bi làá yòon̄ ŋi-taŋkpeeŋi nì ŋi-dɔi nì ŋi-tam kí cáá tɔ̄ tiŋkun. 13 M làá kúntí ilan in a gèe, baa ti làá gbìl̄ a-bati pu. 14 M làá yàntī á kpántí kii ditaŋkpal din pu tiba kaa bīīyee ní bijɔncuuliibi ń nīn díntí bi-laanti di-pu. Baa ti làá fàtīí náań kitiŋ gbanti dalba dalba. Man ni-Dindaan Unimbɔti di sòon̄ ní tin m sòon̄ee, tíǹ ní m làá ŋá.>

15 «Man ni-Dindaan Unimbɔti nín sòon̄ Tiir pu tiŋyee sɔ̀. Bi yaa láa nāaǹ sii Tiir tiŋki ki kūū a-nib ní ki gbìl̄ bin fōō tiweendee yaliŋkii puee, bin kóò ntimu mun poon nnyim māntìi túee wunti làá dāá fōō dijinjikil. 16 Atimbun ŋin kóò atiŋkugbánee bɔtiibi làá kpákatí bi-beejaliŋ pu kí pèetī bi-bɔkutikpaaŋŋi nì bi-bɔkutiŋ ŋin bi gbáńee. Bi làá nyɔ̀ ŋkpatim ní kí kàl̄ kitiŋ. Bi-wunti làá nīn gbíntìi jìkì, ní bí kɔ́ dinyoondin a-pu. 17 Bi làá dāá gāā-si ŋkpiisilan nee yii:

<Bi nāaǹ kitiŋ kin nyáń diyindee,

bi kúntì-si tiŋkub kansikin!

Ki-nib nìn cáá tiŋkub pu mpɔn,

ní báà ŋma nìn fàŋkí-bi.

18 Ama kɔŋkɔnnee, bi nín nāaǹ-kì nee

atimbun ŋin bí tiŋkub kansikinee wunti bíi jìkì,

bin kóò atiŋkugbánee nyùn̄ ŋkpatim,

kun puee aa ti bí.>

19 «Man ni-Dindaan Unimbɔti di sòon̄ yii m làá yàntī á kpántí kii ntimu mun kpántì adigbuŋkati ubɔ nì ubɔ kaa ti kóò mu-poonee. M làá yàntī tiŋku taapu nyim ń yīkì kí bìin̄ a-pu. 20 M làá yàntī á cùú ŋàl̄ taapu taŋkpiibi pu, bin bí niin cannaakuee. M làá yàntī á cùú nīn kóò kitiŋ taapu taapu, kí nīn bí kii jaanjaan digbuŋkatiŋ ŋin bí niinee. Sii nì bitaŋkpiibi bin līntiǹ-see di làá nīn bí. Aa ti làá ŋmā kí jɔ̄mìń kaa ti làá nīn cáá mpaan binifoobi tiŋki pu. 21 Tin làá bàń a-puee làá kɔ́ǹ báà ŋma dinyoondi, di sá yii aa ti làá nīn bí. Bi làá dāá nyàab̀-si, ama ubɔ kaa ti làá ká-si jaanjaan. Man ni-Dindaan Unimbɔti di sòon̄ míǹ.»