Eeseekiyeel 27

Tiir tiŋki kpiisilaŋyi

1 Ti-Dindaan bí-mi yii: 2 «Nisaaleen, gāā Tiir tiŋki ŋkpiisilan. 3 Kitiŋ gbanti bí ditiŋkugbandi ní ki bàntī nì atimbun ŋin timmu tiŋku nyim māntìi túee. Nàatī-kì tin man ni-Dindaan Unimbɔti sòon̄ee yii:

Sii, Tiir tiŋki, a lì yii:

4 A-tiŋki wāā ki tin bàn̄ tiŋku kansikin.

Bi máń-si a ŋān̄ tikpilku.

5 Bi máń-si kii meelee.

Bi dū Seeniir tiŋkin subu bun bi yíì siipreesee

ki dūu kpáá a-wunti boon.

Bi dū Leebanɔn tiŋkin subu bun bi yíì seediree

ní ki cóoǹ ki sàkantí a-ŋaabiki.

6 Bi dū Baasan tiŋkin subu bun bi yíì seenee

ki kpítì a-laalii in a cáa kùtī nnyiminee.

Bi dū Siipiri tiŋkin subu bun bi yíì seedir

bi dū akuntinyin ki nyūntèe

ki máń a-kadulkau.

7 Bi dū fálfal ŋaabui in nyánní Eejipiti bi gbáńee

ki lùn̄ a-ŋaabui in bi cáa sàkantí iŋaliŋfi puee.

Iŋaabu gbanti di yàntī a yaa páaǹní ndanee bí béé-si.

Satab bin máǹ wèeee ki máń cínciŋ

ki nyánní Siipiri tiŋkinee

ní a nìn cáa bìintí a-wannyafikaati pu.

8 Bin nìn ŋàal̀ a-meelauee

nìn nyánní Siidɔn nì Arfaadi timmun ní,

Tiir yab bin yáb̀ee

di nìn ŋàal̀ meela gbanti.

9 Biibiloosi tɔntɔnliibi

bin nìn nyí ditundi ki yáb̀ee

di nìn ŋáŋkí meelee.

Meelab bin kɔkɔ nìn bí tiŋku puee

nìn yūlifí a-cee ní,

ní bin nìn kā u-poonee dāā a-wanti tin a nyáfée.

10 Peersi nì Luudi nì Puuti yab janjaliibi

di nìn bí a-janjakitilin.

Bi nìn cáá bi-gbampɔɔŋi nì bi-janjafuulimmu

ki sīintí a-cee ní.

Bíǹ di nìn tìì-si tinyool.

11 Arfaadi yab nìn kútí a-janjaliibi pu ní bí jɔ̄m̀ a-guŋŋi pu ki cí kitiŋ, ní Gamaadi yab nìn yūlifí a-sintil difɔkɔŋi pu sintil. Bi nìn dù bi-gbampɔɔŋi ní kí lúntí agun ŋin māntìi tú-see pu. Bíǹ di nìn gíti kútí-si kunyaaŋŋu.»

12 «Taarsiisi yab nìn cáá tigaajati kɔkɔ nì ti-bulifi ki kpántí a-wanti. Bi nìn cáá animbil nì tikúti nì tikúnyuntikaal nì tikúbɔn tin nyìm̀ee ki dāā a-wanti. 13 Greeki yab nì Tuubaal yab nì Meeseeki yab nìn bàntī a-cee ní. Bi nìn cáá iyumbu nì tasa kúti ki kpántí a-wanti. 14 Beeti Toogarma yab nìn nyáfíǹ-si itaamu in tūǹ ditundee nì itaamu in pu bi kàal̀ ki jáà kujaauee nì imamboon. 15 Deedan yab mun nìn bàntī a-cee. Ntimu tikpil nib nìn dòoń ki dāā a-wanti. Bi nìn cáá kunti nyiŋŋi nì busubu bun bi yíì eebeenee dɔi ní ki pà-si. 16 Eedoom yab nìn dāā a-cee tiwan tikpil ní ki nìn cáá ataŋkpamɔnti nì satab bin bi dū nnyim min bí gùŋgumee ki nyūntèe nì satab bin bi gbáńee nì iŋaabu in bí fálfalee nì ataŋkpamɔnti ŋin bi yíì kooraai nì rubiisee ki kpántí-si tiwan. 17 Juuda yab nì Isirayeel yab nìn dāā a-cee tiwan ní ki nyáfíǹ-si Miiniiti tiŋki bileeu nì idi nì tisiil nì ŋkpam nì talaalu un bi dū digbumbitiki ki ŋée. 18 Damaasi yab nìn dāā a-cee tiwan tin a ŋáańee tikpil nì tigaajawan yíri yiri. Bi nìn cáá Eelbɔn tiŋki damam nì ipii kuti tin nyánní Sawaar tiŋkinee ki pà-si. 19 Daani nì Yafan naakɔti nìn cáá tikúti tin bi mɔ́ɔ̀yee nì talaalub ki pà tin bi dāā a-ceeyee Uusal tiŋkin. 20 Deedan yab nìn nyáfíǹ-si igban in bi cáa pāantí itaamu puee. 21 Bilaalibub nì Keedaar tiŋki yab cáá apibil nì ipii nì iŋɔsal ki pà tiwan tin bi dāā a-ceeyee pu. 22 Saba nì Ragima nyampoobi nìn bàntī a-cee. Bi nìn cáá talaalumɔntiibi nì ataŋkpamɔnti kɔkɔ nì ŋi-bulifi nì sindaariya ki kpántí nì tiwan tin a nyáfée. 23 Karan nì Kanee nì Eedeen timmun yab nìn bàntī a-cee. Míǹ mbaantiim ní Saba nì Asuur nì Kilmad timmun yab nìn bàntī. 24 Bi nìn nyáfíǹ-si tiwampeeŋkaal tin pɔ̄ɔ̄ kudaau ki máń wèeeeyee nì tiwampeeŋkaal tin bi gbáńee nì satab bin cáá inyiŋfi kupaauee nì iŋmii in bi lùn̄ i dàfì tiŋanee. 25 Taarsiisi tiŋkin meelab di nìn tūntí a-wanti.»

Tiir kpiisilaŋŋuee di gbíntìi nìkì

«Bi dū tiwannyafikaal ki gbéeǹ-si

an nyìm̀ a bí tiŋku kansikin.

26 Bin ŋàal̀-see cáá-si ki cūnnì laakin nnyim nyóòyee.

A bàn̄ tiŋku kansikinee ní ŋwìiń nyalaŋki buŋku yāntì a wīī.

27 A-gaajati nì a-wanti tin a nyáfée nì a-gaajawanti kɔkɔ,

nì bin kɔkɔ bí meela poon ki tūǹ ditundee,

nì bin nìn ŋáŋkí a-meelabee,

nì binyampoobi bin bàntī a-ceeyee,

nì bijanjaliibi bin bí a-tundinee,

nì samaa un bí a-ceeyee kɔkɔ

tɔ́ nnyimin ŋwiin ŋun a wīī ki gbíntì nnyiminee.

28 Bin bí meela poon ki tūǹ ditundee nín fáá mbiilee,

atiŋkugbán cīŋkì ní.

29 Niinee bin kɔkɔ ŋúb́ buŋalimbu laaliiyee

yíkì ki yāntì bi-meelab.

Bin bí meelabinee kpákatì kitiŋ.

30 Bi kíĺ ki bíi sūǹ a-pu,

ki bíi yáliŋkí ŋkpitim pu.

Bi kāfì ntam ki sītì bi-yiliŋ pu

ki dɔ̄ ki bíntí ŋfantamin.

31 A-puee, bi kōol̀ diyibaakpandi

ki dū kpɔsata ki lōoǹ.

Bi bíi sūǹ a-pu nì kunimbaau

ki yáliŋkí ŋkpitim pu.

32 An nín wù-bi puee, bi bíi gà-si iyaliŋki laŋŋu,

bi bíi gà-si ŋkpiisilan nee yii:

<Ŋma di nìn bí kii Tiir tiŋkee,

ama kɔŋkɔnnee, kì nāaǹ múb tiŋku kansikin.>

33 Bi yaa nìn nyāntí a-bantil wanti a-meelabinee,

anibul tikpil nìn jīǹ ní kí díkí.

A-gaajawanti nín nìn wīikí puee nì tiwan tin a nyáfée

nìn yàntī kitiŋ pu bɔtiibi kpántí bigaajab.

34 Kɔŋkɔnnee, tinyiŋgban yá ki wīī-si,

a múĺ tiŋku taapu.

Tiwan tin a túee nì bin bí a-poon ki tūǹ ditundee

kútì a-pu ki múĺ tiŋkun.

35 Bin kɔkɔ kóò atiŋkugbánee

bí kunimbaakpaaŋŋun sii pu.

Bi-bɔtiibi kɔ́ dinyoondin,

a yaa kpēē-bee, a béetí yii bi-bɔbiliŋ bíil̀.

36 Anibul ŋin kíǹee nyampoobi

fátí dipɔɔbiildi biilii a-pu,

di sá yii a kpántì tiwan tin fàantée,

a wáŋkì kí nīn cáa cá jaanjaan!»