Eeseekiyeel 25

Ti-Dindaan sòon̄ ki bíikì Amɔn yab pu

1 Ti-Dindaan sòon̄ nì mi yii: 2 Nisaaleen, fàtī a-ba kí túĺ Amɔn yab cee kí sòoǹ kí tɔ̄ bi-pu. 3 Tùkù-bi yii bí pīlifì tibɔti tin man ni-Dindaan Unimbɔti cáá kí sòoǹ nì bee. Ŋyunti ŋun ní bi kɔ́ǹ m-circir kɔŋkooŋŋu tijɔkɔndi, ki nāaǹ Isirayeel tiŋki ní ki cúú Juuda yab ki cūnnì kuyuŋuee, ni nìn láń. 4 An puee, m làá yàntī ŋwìiń nyalaŋki pú yab ń fōō ni-tiŋki. Bi làá gāā bi-janjanaapaaŋi ni-tiŋki pu ní kí cóoń bi-tantib niin. Bíǹ di làá ŋmɔ́ ni-sufii biliŋ ní kí nyɔ̀ ni-waŋkuti naabiim. 5 M làá yàntī ni-tiŋyil Raaba ń kpántí kunaakpaapɔɔu kí tīī igutaamu, ní kí yàntī Amɔn tiŋki ń kpántí ipii naabakati. Niinee ni làá béé yii man di sá ni-Dindaan.

6 «Man ni-Dindaan Unimbɔti nín sòon̄ puee sɔ̀. Ni nín gbìl̄ nnaabu ŋun jéetì Isirayeel puee, an mɔ́ɔkiǹ-ni tikpil ní ni kpáafì abaal. Ni ŋá míǹ ki dàkā ni nín kpèé m-nibul fám puee ní. 7 An puee m làá dàkà-ni m-pɔŋŋu ní kí dū-ni kí líiǹ atimbun ŋin kíǹee nib bí fūkul̀-ni pílpil. M làá kúntí-ni anibul kansikin, naa ti làá nīn cáá kitiŋ ní kí kúntí-ni múb. Niinee ni làá béé yii m sá ni-Dindaan.»

Ti-Dindaan làá jáǹ Moowaab yab

8 «Man ni-Dindaan Unimbɔti nín sòon̄ puee sɔ̀. Moowaab yab lī yii Juuda yab kpántì kii atimbun ŋin kíǹee nib nín bí puee ní. 9 An puee m làá yàntī bí jáǹ ntimu mun wúń Moowaab tiŋkpaanyɔmmuee. Binannanliibi làá nàan̄-mu kiba kiba ki kpáaǹ ntinnyaammu kii Beeti-Yeesimooti nì Baal-Meeyɔn nì Kiiriyatayiimee. 10 M làá yàntī ŋwìiń nyalaŋki pú yab ń já kí fōō Moowaab tiŋki kii bi nín jáń ki fōō Amɔn tiŋki puee. An yaa ŋá mimmee, baa ti làá téetí Amɔn yab pu atimbun kansikin. 11 M làá dáaĺ Moowaab yab tafal ní bí béé yii man di sá bi-Dindaan.»

Ti-Dindaan sòon̄ ki bíikì Eedoom yab pu

12 «Man ni-Dindaan Unimbɔti nín sòon̄ puee sɔ̀. Eedoom yab tɔ̀n̄ Juuda yab ipɔntoon, an pu ní bi fōō dibɔkpil. 13 An puee man ni-Dindaan Unimbɔti nín sòon̄ puee sɔ̀. M làá dàkà Eedoom yab m-pɔŋŋu. M làá kúntí kitiŋ gbanti nib nì ki-waŋkuti. M làá yàntī kí kpántí kuteeu kí yòon̄ Teeman tiŋki kí cáá sāā Deedan tiŋki. Bi làá kpɔ̀ bin kóò Eedoom tiŋkinee kujaaun ní. 14 M làá yàntī m-nibul Isirayeel yab nín tɔ̀ m-pɔntooŋyi Eedoom yab pu. M-ŋuukpaandi nín bàlifī puee, míǹ ní Isirayeel yab làá ŋá-bi. Mimmee, Eedoom yab làá béé kun di sá m-pɔntooŋyee. Man ni-Dindaan Unimbɔti di sòon̄ míǹ.»

Ti-Dindaan sòon̄ ki bíikì Fiiliistii yab pu

15 «Man ni-Dindaan Unimbɔti nín sòon̄ puee sɔ̀. Fiiliistii yab tɔ̀n̄ ipɔntoon. Bi dū nnimbidiki ki tɔ̀n̄ bi-nannanliibi bin sá talku nannanliibee ipɔntoon ní ki céetì-bi. 16 An puee, man ni-Dindaan Unimbɔti nín sòon̄ puee sɔ̀. M làá dàkà-bi m-pɔŋŋu. M làá kúntí-bi, bíǹ bin kɔkɔ nyánní Kafitoor ki dɔ́miń ki kāl̀ ditiŋkugbandee. 17 M làá tɔ̀-bi ipɔntoon in sá ikpaanee ní kí dáaĺ bi-tafal ŋkpitim pu. Niinee bi làá béé yii man di sá bi-Dindaan.»