Eeseekiyeel 24

Jeerusaleem bí kii daansee un dámintèe ní

1 Bi nín cúú Isirayeel yab ki cūnnì kuyuŋu abin awa boon, iŋmal saalaa poon iwiin saalaa dalee ní ti-Dindaan sòon̄ nì mi yii: 2 «Nisaaleen, ŋmà díǹ wiiŋŋu nín sá ŋwiin ŋuŋyee kí bíĺ. Di sá yii díǹ ní Babiloon bɔtiu làá jáǹ Jeerusaleem tiŋki. 3 Dū tibɔŋmantikaal nee kí ŋmàntī m-nibul yab yii man bi-Dindaan Unimbɔti di bíi sòoǹ nì bi yii:

<Bɔ́ntí daansee.

Jōō nnyim kí gbéeǹ.

4 Dū anaŋkún kí ŋá poon,

anaŋkún ŋin ŋān̄ee, ditaal nì kugbigbipeeu.

Dū akpamɔnti kí gbéeǹ kí púntí.

5 Yòon̄ upii nammɔntiiti,

kí dū akpab kí ŋá daansee taapu.

Yàntī an kɔkɔ ń nùuǹ dicilpu,

di sá yii bi máaǹ kí tɔ́kɔń akpab mun.

6 Man ni-Dindaan Unimbɔti nín sòon̄ puee sɔ̀.

Nnikpaakoon tiŋki, nnaabu dɔ̄ ki cí-kèeee!

Kì náań nì daansee un dámintì

baa ŋūǹ kí fíntí-uee ní.

Kpáatí anaŋkúnee daansee poon kí bíĺ diba diba

kí taa tɔ̄ kasi.

7 Fatiku un Jeerusaleem kpáatìi fée

dáá gbíntìi bí kitiŋ nee poon.

U kpáatì-u ki fá ditaŋkpal pu ní,

waa kpáatì-u ki fá kitiŋ,

kaa ti dū ntam ki bīiǹ u-pu.

8 M yāntì fatikuee bí ditaŋkpal pu,

laakin ní baa ŋūǹ kí dū-u kí báĺee,

án nín làá ŋá pu ú gbítí m-ŋuul

ḿ ŋmā kí tɔ̀ ipɔntoonee.

9 Man ni-Dindaan Unimbɔti di sòon̄ yii:

Nnikpaakoon tiŋki, nnaabu dɔ̄ ki cí-si,

di sá yii m làá kpāā ŋŋmikpaan kí bíĺ!

10 Nyàab̀ idɔ kí ŋá poon kí pàà ŋŋmi.

Púntí kí tɔ́kɔń tinanee,

nyàab̀ tikpàntikaal kí ŋá

ní kí yàntī akpab ń wà kɔkɔ múb.

11 Dū daanseekulimee kí tɔ́kɔń amɔsiŋkoon pu

ú píĺ kí mántí cínciŋ.

An yaa ŋá mimmee, tijɔkɔndi

tin bí u-poonee làá wāŋkì

ní an wà an nín dámintì puee.>

12 Ama dipɔ́ɔǹdi kɔkɔ sá fám ní. Ŋŋmi kaa làá wà an nín dámintì pu nee kɔkɔ. 13 Jeerusaleem, a ŋá alaakpaatuun nee kɔkɔ ki kɔ́ǹ a-ba tijɔkɔndi. M bàà nyàab̄ kí ŋá-si circir ama ní a yíì kaa kpántì circirdaan. Too, aa làá ŋmā kí kpántí circirdaan kí cáá sāā ŋyunti ŋun ní m-ŋuul làá tɔ̄ a-pu di-tundi kí cáá kátée. 14 Man ni-Dindaan nín sòon̄ ní án làá bàń míǹ. Maa làá gítí m-boon kaa làá sɔ̄ isaa mun. Án kaa làá nīn páb́-mi gba. M làá sòoǹ a-bimbim nì a-tuuŋŋi bɔti. Man ni-Dindaan Unimbɔti di sòon̄ míǹ.»

Eeseekiyeel kāl̀ dikpool

15 Ti-Dindaan sòon̄ nì mi yii: 16 «M làá yòon̄ un tìì-si dipɔɔpindee. Aa làá ŋá u-kpool, kaa làá sɔ̄ u-pu ní a-nyinnyim kaa làá nyā. 17 Nín̄ nìiǹ diŋmiŋŋmilin kí taa kàl̄ dikpool. Dū a-ŋaabuŋu kí yíĺ kí dū a-naatakaŋ kí táká. Taa dū tiba kí bìin̄ a-nimbiin kí taa jī bukpɔsaa.»

18 M sòon̄ nì samaa kutaafaauee, ní m-nimpuu kpíì kujoou. Kutaa wúntì ní m ŋá kii ti-Dindaan nín kpáafì-mi yii ḿ ŋá puee. 19 Ní binib bālifì-mi ḿ tùkù-bi kun ní m ŋée taapu. 20 Ní m kíí-bi yii: «Ti-Dindaan tīī-mi dinyɔɔbundi nee 21 ḿ dūú nàatī nimbi Isirayeel yab yii: <Man ni-Dindaan Unimbɔti di sòon̄ yii m làá kɔ́ǹ m-circir kɔŋkooŋŋu ŋun pu ni fàal̀, an mɔ̄ǹ-ni ni kpèé an tìì-ni dimákalee tijɔkɔndi. Bi làá dū ntàataajimu kí kpɔ̀ ni-jipɔmbi nì ni-bisalib bin kíǹ Jeerusaleem tiŋkinee. 22 Ni làá ŋá kii Eeseekiyeelee. Naa làá dū tiba kí bìin̄ ni-nimbiin kaa làá jī bukpɔsaa. 23 Ní dū iŋaabu kí fìn̄ ni-yiliŋ kí nīn táká anaataka. Ní taa yāliŋkì kí taa sɔ̄. Ama, ni-kpitii puee, ni làá dúntí ní báà ŋma làá nīn yáliŋkí u-juti pu. 24 Eeseekiyeel làá nīn sá kudaaŋŋu ní ki tīī-ni. Tin bi sòon̄ ki síiǹ yii án làá bàńee yaa láa bāańee, ní dāá ŋámaan kii úǹ nín ŋá puee deedee. Niinee, ni làá béé yii man di sá ni-Dindaan Unimbɔti.>»

25 «Sii nisaaleen, pīlifì, m làá yòon̄ bi-kansikin circir kɔŋkooŋŋu ŋun di sá bi-balilaŋki, ki sá bi-pɔɔpindi bi kpèé, ŋkɔŋkoon ŋun pu bi fàal̀ ní ki dū bi-mákal ki páaǹee. M làá dāá yòon̄ bi-jipɔmbi nì bi-bisalib. 26 Ŋwiin gbantee, un ŋmátì ki nyáń nnaabu gbantinee làá dāá māafì-ni tin jítèe. 27 Ŋwiin gbantee, a làá dāá ŋmā kí sòoǹ. A làá dāá ká kinyɔkɔ kí sòoǹ nì un ŋmátì ki nyáń nnaabun ki dɔ́mińee. A làá dāá nīn sá kudaaŋŋu ní ki tīī m-nibul ní bí dāá béé yii man di sá bi-Dindaan.»