Yeereemii 26

Bi sòon̄ Yeereemii bɔti kí kpɔ̀-u

1 Joosiyaasi jipɔɔn Yoowakiim, Juuda bɔtiu beel nín kíĺ puee ní ti-Dindaan sòon̄ nì Yeereemii tibɔti nee yii: 2 «Man ni-Dindaan nín sòon̄ puee sɔ̀. Cùú yūĺ kunimbɔtidii cindin. Á sòoǹ nì bin kɔkɔ nyēeń Juuda yab timmun ki dòoń ki jáaḿ-mee. Tibɔti tin kɔkɔ m tīī-si mara á tùkù-bee, dūú tùkù-bi, á taa báĺ-bi báà tiba. 3 An yaa yíì bi làá pīlifiǹ-si ní báà ŋma ń fá u-bimbikpitim. Bi-tuŋkpitiŋ puee, m bàà lēē kí dū nnaabu kí tɔ̄ bi-pu. Ama bi yaa pílifì, m làá kpántí m-landɔkɔŋu. 4 Á dāá tùkù-bi yii, ti-Dindaan nín sòon̄ puee sèé: <Nín̄ nóómaan marab bin m tīī-nee. 5 Ní pīlifìmaan m-tɔntɔnliibi m-bɔnaatiliibi. M pée tūǹ-bi ni-cee ní kaa gbèentí ama ní naa pílifíǹ-bi. 6 Ni yaa kaa pílifèe, m làá wīī kunimbɔtidii nee kii m nín nìn wīī Siiloo^a yɔkɔ puee. Niinee atimbun ŋin kɔkɔ bí duulinyanee poonee, m làá dū Jeerusaleem ní kí ŋá ŋabika bí nīn cáa tòó tɔb mbusu.>»

7 Bisaraaŋaliibi nì Unimbɔti bɔnaatiliibi nì samaa kɔkɔ gbìl̄ tibɔti tin Yeereemii sòon̄ kunimbɔtidii cindinee. 8 Yeereemii nín sòon̄ tin kɔkɔ ti-Dindaan tīī-u mara ú sòoǹee ní bisaraaŋaliibi nì bibɔnaatiliibi nì samaa kɔkɔ cúú-u ní ki bí yii: «A máaǹ ŋkúm! 9 A cáá dipɔbil ki nāatì ti-Dindaan bɔti yii: <Bi làá wīī kunimbɔtidii nee kii Siiloo yɔkɔee! Bi làá kpēelikì Jeerusaleem tiŋki ní ubɔ ń taa nín̄ gíti kóò ki-ni!»

Ní bin kɔkɔ nìn bí kunimbɔtidiinee kóoǹ ki múkuǹ Yeereemii pu. 10 Juuda yab kàliŋkpilib nín gbìl̄ an bɔtee, ní bi yíkì dibeecindi ki nín cá kunimbɔtidii laŋki. Míǹ boonee ní bi kóoǹ ki kpáfì kunimbɔtidii punyɔkɔki Kipɔŋ nyɔkɔpu. 11 Niinee ní bisaraaŋaliibi nì Unimbɔti bɔnaatiliibi bí bikàliŋkpilib nì samaa kɔkɔ yii: «Kijapaai nee máaǹ ŋkúm, di sá yii u sòon̄ ki tɔ́ Jeerusaleem pu, nimbi ni-ba tafal gbìl̄ míǹ.»

12 Ama ní Yeereemii bí bikàliŋkpilibee nì samaa kɔkɔ yii: «An sá ti-Dindaan di túnní-mi ḿ dāá sòoǹ tin ni gbìl̄ nee kí tɔ̄ kunimbɔtidii nee nì Jeerusaleem tiŋki pu. 13 Kɔŋkɔnnee, ní kpántí ni-bimbim kí nīn ŋáań min kítèe, kí pīlifì ni-Dindaan ni-Nimbɔtiu nyɔkɔ. Niinee u làá kpántí u-landɔkɔŋu. Waa làá ti dū nnaabu kí tɔ̄ ni-pu kii u nín sòon̄ puee. 14 Mamee, m bí ni-ŋaan. Ŋámaan-mi min ni ká yii an máaǹee. 15 Ama ni máaǹ kí béé yii nimbi nì Jeerusaleem tiŋki nì ki-nib yaa kūū-mee, maanyiiba fatikuu kpuulool làá lítí ni-pu. Di sá yii ti-Dindaan di lafun túnní-mi ni-cee ḿ sòoǹ nì ni tibɔti nee kɔkɔ ní gbìl̄.»

16 Niinee ní bikàliŋkpilib nì samaayee bí bisaraaŋaliibi nì Unimbɔti bɔnaatiliibi yii: «Kijapaai nee kaa máaǹ ŋkúm, di sá yii tin ti-Dindaan tùkū-uee ní u dūu nāatì-ti.»

17 Míǹ boonee ní bitindaŋkpilib kansikin biba yíkì ki bí samaa kɔkɔ yii: 18 «Ŋyunti ŋun Eeseekiyaasi nìn sá Juuda bɔtiuee, Unimbɔti bɔnaatiliu ubɔ nìn bí bi yíì-u Miisee, u sá Mooreeseeti tiŋkin. U nín tùkū Juuda nibul kɔkɔ puee sɔ̀. Ti-Dindaan Mpɔŋkɔdaan nín sòon̄ puee sèé:

<Siiyɔn tiŋki làá dāá kpántí kii bukpaa bun bi kùn̄ee ní,

Jeerusaleem làá dāá kpántí adigbun ŋma,

ní kunimbɔtidii gbantaŋki ń kpántí kimɔgbaai^b.>

19 Mimmee Juuda bɔtiu Eeseekiyaasi nì Juuda yab nìn kūū Miiseeee? Aayee, ama bi nìn fāŋkì ti-Dindaan ní ki nìn pɔ́ɔǹ kí ŋá min fáatiǹ-uee. Niinee ní ti-Dindaan nìn yāntì kaa ti cáań nnaabu ŋun u nìn sòon̄ kí cáań kí tɔ̄ bi-puee. Too timbi yaa kūū uninja nee, timbi ti-ba ní ti làá ŋá tikpitil.»

Yooyakiim yāntì bi kūū Unimbɔti bɔnaatiliu Uriya

20 Ŋyunti gbantee, uninja ubɔ mun nìn bí ki sá Unimbɔti bɔnaatiliu ki nàatī ti-Dindaan bɔti. Úǹ di nìn sá Seemayawuu jipɔɔn Uriya. U nìn sá Kiiriyati-Yeeyariim tiŋkin ní. U mun nìn sòoǹ ki tòó Jeerusaleem tiŋki nì Juuda nibul pu kii Yeereemii nín nìn ŋáań puee ní deedee. 21 Ubɔti Yooyakiim nì u-janjakpilib kɔkɔ nì u-kàliŋkpilib nìn gbìl̄ tin Uriya sòon̄ee. Niinee ní ubɔti nyàab̄ kí kpɔ̀-u. Uriya nín gbìl̄ mimmee ní ki fāŋkì ki sáǹ ki cūtìi bál̀ Eejipiti tiŋkin. 22 Ama ní ubɔti Yooyakiim dū Akibɔɔr jipɔɔn Eelnatan nì bininjab biba mun ki tú Eejipiti. 23 Bi nìn cūtì Eejipiti tiŋkin ki cúuń Uriya ki cáań ubɔti cee. Yooyakiim nìn yāntì bi kūū-u, ní ki yāntì bi dū u-wunti ki tɔ́ mbòó ŋun poon bi síb̀ báà ŋmee.

24 Ama Safan jipɔɔn Ayiikaam nìn wúń Yeereemii pu. Úǹ puee, baa nìn dū Yeereemii ki ŋá samaa un nìn nyàab̀ kí kpɔ̀-uee ŋaan.