Yeereemii 27

Yeereemii dū diwaŋgul ki páaǹ u-gbigbipati pu

1 Joosiyaasi jipɔɔn Seedeesiyasi, Juuda bɔtiu beel kíltam ní ti-Dindaan sòon̄ nì man Yeereemii tibɔti nee^a. 2 Ti-Dindaan bí-mi yii: «Nyàab̀ iŋmii nì idɔ kí bóob́ kii bi nín bōob̀ pu kí dūú kpàl̄ inaa in kù tikpaalee. Míǹ boonee, á dūú páań a-gbigbipati pu. 3 A yaa ŋá míǹ ki dóòyee, á dūú tīī ituun in Eedoom yab bɔtiu nì Moowaab yab bɔtiu nì Amɔn yab bɔtiu nì Tiir yab bɔtiu nì Siidɔn yab bɔtiu túnní Jeerusaleem bi dɔ́miń Juuda bɔtiu Seedeesiyasi ceeyee. 4 Á tīī-bi mara bí cùú tùkù bi-kpilib yii ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé:

5 «Man di náań kitiŋ nì binib nì tiwaŋkuti tin bí kitiŋ puee. M dū m-pɔŋkpaaŋŋu nì m-kpabil ní ki náań tíǹ kɔkɔ ní ki tìì un ní m yaa lèe. 6 Kɔŋkɔnnee, m lēē kí dū ntimu kɔkɔ kí ŋá m-tɔntɔnliu Neebukadineesaar, Babiloon yab bɔtiu ŋaan. Áli gba m dū ipeel ki ŋá u-ŋaan í nīn bí u-tundin. 7 Atimbun kɔkɔ làá dāá nīn bí u nì u-jipɔɔn nì u-naantiiu taapu, kí tin sāā ŋyunti ŋun ní úǹ u-ba tiŋki làá dāá sìntī kí nīn bí atimbun ŋin pɔ̄ɔǹ-kèe nì bibɔtikpaambi taapuee.

8 «Ditimbundi diba àá dibeel diba yaa yíì kaa sīntì di-ba ki tīī Neebukadineesaar, Babiloon bɔtiu, kaa dū u-kpancikiliu ki léeǹee, m làá dū kujaau nì ŋkùm nì bìlbil kúm ní kí tɔ̄ di-pu. M làá dī Babiloon bɔtiu pu ní kí nàan̄ ditimbundi gbanti, man ni-Dindaan di lī míǹ.

9 «Míǹ puee, nimbi ń taa pīlifì ni-bɔnaatiliibi nì ni-bɔɔbi nì bin lèekī tidamintiil taapuee nì bin kpèé kutagbɔŋu ki būū tibɔɔlee nì bikpaŋkpantiibi. Bi tùkù-ni yii ni kpá kí kɔ́ Babiloon bɔtiu taapu. 10 Ama tin bi nàatī-nee sá tinyimɔmbɔti ní. Ni yaa pílifiǹ-bee, bi làá jà-ni ní búntí kí wàatī ni-tiŋki. Tiŋman ní, m làá jà-ni ní yàl̄ kí túĺ an kɔkɔ pu, ní kí kpú.

11 «Ama ditimbundi diba yab yaa kíí ki sīntì biba taapu ki tīī Babiloon bɔtiu ki fōō u-kpancikiliu ki léeǹee, m làá yàntī bí nīn bí bi-tiŋkin, kí kpɔ̀ ki-pu tikpaal ní kí nīn kóò ki-pu, ti-Dindaan di lī míǹ.»

12 «Mama Yeereemii, m sòon̄ nì Juuda bɔtiu Seedeesiyasi tibɔbaantiil gbanti. M tùkū-u yii: <Sii nì a-nibul, ní kíí kí sìntī ni-ba taapu kí nīn bí Babiloon bɔtiu taapu ní kí fōō u-kpancikiliu kí léeń. Ní sìntī ni-ba taapu kí nīn bí u nì u-nibul taapu, niinee ni làá nīn bí dimaŋfalin. 13 Ba pu ní sii nì a-nibul là kujaau nì ŋkùm nì bìlbil kúm ń kpɔ̀-ni ní? Di sá yii ti-Dindaan nín sòon̄ yii tin làá bàń atimbun ŋin nib kaa làá sìntī bi-ba taapu kí tīī Babiloon bɔtiuee dee. 14 Ní taa pīlifiǹ bibɔnaatiliibi bin lì-ni yii ni kpá kí kɔ́ Babiloon bɔtiu ŋaanee. Tin bi sòoǹ nì nee sá tinyimɔmbɔti ní.> 15 Ti-Dindaan bí yii: <Man kaa túnní-bi. Bi lì yii bi nàatī m-bɔti, ama an sá inyimɔn ní. Ni yaa pílifiǹ-bee, m làá jà-ni doo, ní ni nì bibɔnaatiliibi bin nàatī an bɔtee ń kpú.>»

16 Yeereemii nìn gíti sòon̄ nì bisaraaŋaliibi nì bin kɔkɔ nìn bí niinee. U nìn bí-bi yii: «Ti-Dindaan nín sòon̄ puee sèé: <Ní taa pīlifì Unimbɔti bɔnaatiliibi bin bí ki nàatī-ni yii an kaa ti làá yúntí bi làá gíiǹní tiwan tin bi nìn yōoǹ kunimbɔtidiin ki cáa cūnnì Babiloon tiŋkinee^b. Tin bi sòoǹee sá inyimɔn ní. 17 Ní taa pīlifiǹ-bi, sìntīmaan ni-ba taapu kí tīī Babiloon bɔtiu ní kí nīn bí dimaŋfalin. Ba pu ní ni làá yàntī kitiŋ nee ń kpántí adigbun ŋma ní?>»

18 «Binib gbanti yaa lafun sá Unimbɔti bɔnaatiliibi, bi yaa lafun nàatī ti-Dindaan bɔti, bí gbàam̀ ti-Dindaan Mpɔŋkɔdaan ú taa yàntī bí yòon̄ kí púntí tiwan tin kíǹ kunimbɔtidiinee nì tin bí Juuda bɔtiu beecindinee nì tin bí Jeerusaleem tiŋkinee kí cùnnì! 19 Di sá yii ti-Dindaan Mpɔŋkɔdaan sòon̄ jaantalkub^c nì kusampeekpaaŋŋu nì tin pu ku tɔ́kɔ́ee nì tiwammɔntiil tin kíǹ ki bí Jeerusaleem tiŋkinee pu. 20 Di sá yii Babiloon bɔtiu Neebukadineesaar kaa nìn yōoǹ tiwan kɔkɔ Jeerusaleem ki cūnnì Babiloon tiŋkin ŋyunti ŋun u nìn cúú Yooyakiim jipɔɔn Yeekooniya nì Juuda bɔtiu nì Juuda timmu nì Jeerusaleem tiŋki bɔtibiliŋee. 21 Ti-Dindaan Mpɔŋkɔdaan, Isirayeel Nimbɔtiu nín sòon̄ tiwammɔntiil tin kíǹ kunimbɔtidiin nì Juuda bɔtiu beecindin nì Jeerusaleem tiŋkinee puee sèé: 22 <Bi làá yòon̄ tiwan gbanti kɔkɔ kí cùnnì Babiloon tiŋkin. Tì làá nīn bí niin kí cáá sāā ŋyunti ŋun ní m làá dāá tɔ̄ m-tundi kí gíiǹní-tèe.>» Ti-Dindaan di sòon̄ míǹ.