Yeereemii 25

Yeereemii dū abin mmuŋku nì ata ki sòon̄ Unimbɔti bɔti

1 Joosiyaasi jipɔɔn Yoowakiim nín kāl̀ Juuda tiŋki pu dibeel dibinnanaatiil poonee, ti-Dindaan nìn sòon̄ nì Yeereemii Juuda nibul kɔkɔ pu. An nìn sá Babiloon bɔtiu Neebukadineesaar beel bimpeepeekaal poon ní. 2 Unimbɔti bɔnaatiliu Yeereemii nìn sòon̄ nì Juuda yab kɔkɔ nì bin kɔkɔ kóò Jeerusaleemee yii: 3 «Amɔn jipɔɔn Joosiyaasi, Juuda bɔtiu nín kāl̀ dibeel abin saalaa nì ata poon kí dāá sāā díǹee, an ŋá abin mmuŋku nì ata dee. M bí ki sòoǹ nì ni ti-Dindaan bɔti kaa gbèentí, ama naa pílifí. 4 Ti-Dindaan túnní u-tɔntɔnliibi u-bɔnaatiliibi ni-cee kaa gbēeǹ, ama naa kpōoǹ ni-tafal ki pílifì-bi. 5 Bi nìn tùkū-ni yii: <Báà ŋma ń fá u-bimbikpitim nì u-tuŋkpitiŋ. Niinee ni làá ŋmā kí kàl̄ kitiŋ kin man ni-Dindaan tīī ni nì ni-naanjabee poon kí nīn cá jaanjaan. 6 Ní taa nín̄ jòó ki pá awaa boon kí nīn jáaḿ-ŋi, kí taa gbàan̄ ŋi-nimbiin kí tòotī-ŋi. Ní taa mā àá kí kpítí awaa kí gbítí m-ŋuul. Mimmee maa làá ŋá-ni tikpitil tiba. 7 Ama ní naa pílifiǹ-mi, ní ki kpítì àá ki mɔ́ɔ́ awaa ŋin sá ni-naabuŋuee ki gbítì m-ŋuul. Ti-Dindaan di lī míǹ.>

8 «An pu ní ti-Dindaan Mpɔŋkɔdaan bí yii: <Ni nín kaa pílifì m-bɔtee puee, 9 m làá tɔ̄ bí cáań ŋgan pú nibuliŋ. M làá yíiń m-tɔntɔnliu Neebukadineesaar, Babiloon bɔtiu. M làá cáań bíǹ gbanti kɔkɔ kí tɔ̄ kitiŋ nee nì ki-nib nì ntimu mun māntìi tú-kèe pu. M làá nàan̄ ni nì bi kɔkɔ. M làá yàntī kitiŋ nee ń kpántí ntimbiil paaŋŋu, adigbun kí nīn cá jaanjaan. Binib làá dāá nīn gbáà inimɔɔn biilii, man ni-Dindaan di lī míǹ. 10 M làá kúntí ifaal nì dipɔɔpindi kuŋkuuntii nì inimpucanlan bi-cee. M làá kúntí tinàti tin nà idee wooku ní kí kpɔ̀ fitila ŋmiŋu. 11 Kitiŋ kɔkɔ làá kpántí adigbun, mpaan ŋun kaa làá nīn bí ŋkpèéyee. Anibul nee kɔkɔ làá nīn bí Babiloon bɔtiu taapu abin imuŋku ita nì saalaa ní^a>.»

12 Ti-Dindaan bí yii: «Abin imuŋku ita nì saalaayee yaa láa jítèe, m làá dāá dáaĺ Babiloon bɔtiu nì u-yab tafal ikpiti in bi ŋée pu. M làá kúntí Babiloon tiŋki ní kí yàntī kí kpántí kuteeu kí nīn cá jaanjaan. 13 M làá cáań inaabu in kɔkɔ m nìn sòon̄ bi ŋmàn̄ ki ŋá tigbɔn poonee kitiŋ nee pu. Tíǹ ní m nìn yāntì Yeereemii sòon̄ ki nāatì atimbun kɔkɔ pu. 14 Di sá yii ntimu mun cáá mpɔnee nì bibɔtikpaambi mun làá dāá nyīī Babiloon yab kí gùl̄ bi-taapu. Niinee ní ḿ pà-bi bi-tuŋkpitiŋ nì bi-ŋáaǹtam paati.»

Unimbɔti làá dáaĺ atimbun tafal

15 Ti-Dindaan Isirayeel yab Nimbɔtiu bí-mi yii: «Fōō ndamam kɔŋkɔnnyɔkaau un poon m-ŋuul kā nee, kí cáá nyùntī atimbun ŋin kɔkɔ cee m làá tɔ̄-si nee yab. 16 Bi yaa láa ká m tú binib bi dū kitàataajiki ki pɔ̄fì binib bi-kansikinee, bi làá dāá nyɔ̀ kí gbí ní ki kíǹ ki kpìntī, ní bi-yiliŋ ń lábití.»

17 Ní m fōō ndamam kɔŋkɔnnyɔkaauee ti-Dindaan ŋaan ki cáa nyūntì atimbun ŋin kɔkɔ cee u tú-mee nib. 18 M nyūntì Jeerusaleem yab nì Juuda timmun yab nì bibɔtiibi nì bikàliŋkpilib, ní ntimu gbanti kpántì adigbun, ki kíǹ ki fàantí. An yāntì binib gbáà mu-pu ibiil ní ki yāntì mu kpántì ŋabika bi cáa tòó mbusu.

19 Míǹ boonee ní m tīī Eejipiti yab bɔtiu Faaroo nì u-kàliŋkpilib nì u-bɔtibiliŋ nì u-nibul kɔkɔ bi nyùn̄, 20 nì nyaaŋmaliŋku nibuliŋ ŋin kóò Eejipiti tiŋkinee,

nì Uusi tiŋki bɔtiibi

nì Fiiliistii yab bɔtiibi an dàkà yii Asikeelɔn yab bɔtiibi nì Gaasaa yab bɔtiibi nì Eekrɔn yab bɔtii nì Asidoodi yab bin kíǹee.

21 M nìn tīī Eedoom yab nì Moowaab yab nì Amɔn yab,

22 nì Tiir yab bɔtiibi nì Siidɔn yab bɔtiibi nì ntimu mun bí tiŋku gbandee,

23 nì Deedan yab nì Teema yab nì Buusi yab nì bin kòol̄ bi-gatikiiyee,

24 nì Bilaalibub tiŋki bɔtiibi kɔkɔ nì nyaaŋmaliŋku nibuliŋ ŋin kóò kuteeunee kɔkɔ.

25 M nìn tí tīī Simrii yab bɔtiibi kɔkɔ nì Eelaam yab bɔtiibi nì Meedi yab bɔtiibi,

26 nì bibɔtiibi bin kɔkɔ bí ŋgan púee, bin pìl̄ee nì bin bí ndandatee kɔkɔ.

Abee ŋin kɔkɔ bí duulinyanee máaǹ kí nyɔ̀ kɔŋkɔn gbanti kí kíǹ kí tīī tɔb. Bíǹ kɔkɔ yaa láa nyùn̄ ki dóòyee ní Seesaki bɔtiu ń nín nyɔ̀.

27 Á tùkù-bi yii ti-Dindaan Mpɔŋkɔdaan, Isirayeel Nimbɔtiu nín lī puee sèé: «Nyɔ̀maan! Gbímaan kí wùliŋkì! Lítímaan kí taa yīkì kí kpèè kitàataajiki kin m làá dūú pɔ̀fì binib ni-kansikinee. 28 Biba yaa yíì kaa làá fōō a-ŋaan ndamam kɔŋkɔnnyɔkaauee kí nyɔ̀ee, á tùkù-bi yii: <Ni làaa, naa làaa, ni làá fōō-u kí nyɔ̀, ti-Dindaan Mpɔŋkɔdaan di lī míǹ. 29 Di sá yii m dū nnaabu ki tɔ́ mama m-ba tiŋki pu, ní nimbi dàkafī yii m làá yàntī-naaa? Aayee, maa làá yàntī-ni fám. M làá dū kujaau kí tɔ̄ kitiŋ nee nib kɔkɔ pu, man ni-Dindaan Mpɔŋkɔdaan di lī míǹ.>»

30 Ní ti-Dindaan gíti bí-mi yii: «Dū tibɔti nee kí nàatī kí tùkù-bi yii:

«Ti-Dindaan kāl̀ yilpu ki téenní.

U kāl̀ u-circir kɔŋkooŋŋun ki yāntì bi gbìl̄ u-neen pu.

U tátí u-tiŋki pu,

u bíi kūuntí kí jáǹ kitiŋ nib kɔkɔ,

kii bin bí ki tà fiinyi biliŋ

kí nyāntí ndaamee.

31 Kuwoou kun u ŋáańee bàn̄ kitiŋgbeennyɔkɔ.

Ti-Dindaan di bíi sòoǹ anibul bɔti,

u yíiń inifunaan kɔkɔ u-bɔsoondiikun.

U làá yàntī bí pɔ̀fì bikpitiŋaliibi.»

Ti-Dindaan di lī míǹ.

32 Ti-Dindaan Mpɔŋkɔdaan nín sòon̄ puee sèé:

«Nnaabu ŋubɔ jéetì ditimbundi diba pu

ki tin póotì din kíǹ pu,

kubuŋkpaaŋŋu nyánní kitiŋgbeennyɔkɔ ki bíi jītí.»

33 Ŋwiin gbantee, bin ti-Dindaan làá dāá kpɔ̀ee làá dāá nīn bí kitiŋ gbeennyɔkɔ kiba kí tin sāā kin kíǹee. Tíǹ gbanti kɔkɔ yaa láa bāańee, ubɔ kaa dāa sūǹ bi-pu, kaa dāa kōontí bi-nikpiliŋ ki dāa nín nyàab̀ kí síb́-ŋi. Ŋi làá dāá dòon̄ kitiŋ ní kí kpántí ntiŋkpam.

34 Bikpootiliibi, gāāmaan ikpiisilan,

nín̄ gbáàmaan ibiil

kí dòon̄ kitiŋ kí nīn bíliŋkí.

Di sá yii ŋyunti bāań bí kpɔ̀ ni mun dee.

Ni làá lítí ní kí wīī

kii disambil din pɔ̄ɔ̄ kudaauee.

35 Bikpootiliibi kaa làá ká kibalilaŋ,

ní bipikpaaliibi kaa làá ŋmā kí sāǹ kí ŋmátí.

36 Bi gbìl̄ bikpootiliibi biilii pu

nì bipikpaaliibi yaliŋkii pu.

Di sá yii ti-Dindaan nāaǹ bi-pikpaapɔɔku.

37 Ti-Dindaan ŋuukpaandi puee,

kunaakpaapɔɔu ŋmíl̀ díkí diki fɔ́ŋfɔŋ.

38 Gbikinti nyáń u-mɔgbaakin.

Kujaau kun poon baa sūǹ ubɔ saayee

nì ti-Dindaan ŋuukpaandi puee,

bi-tiŋki kpántì kuteeu.