Yeereemii 22

1 Ti-Dindaan bí Yeereemii yii: «Sìntī Juuda bɔtiu beecindin. A yaa bàn̄ee, á sòoǹ tibɔti nee. 2 Á sòoǹ yii: <Sii Juuda bɔtiu un kā Daafiidi beejal puee, pīlifì ti-Dindaan bɔti nee. Tì sá ki tīī a-kàliŋkpilib nì a-nibul yab bin jītí kipunyɔkɔ nee puee ní.> 3 Ti-Dindaan nín sòon̄ puee sɔ̀. Ní dàkà ibaamɔn kí sòoǹ tibɔti ti-pú. Ní fōō bin bi mùul̄ee bimuuliliibi ŋaan. Ní taa sàaǹ unicaan nì ditaŋkpiibil nì ukpiipu, kí taa dàkà-bi tipɔmbɔti. Ní taa ti kpɔ̀ maanyiiba mpaan nee pu. 4 Ni yaa lafun ŋá míǹ, ni làá nīn pée cáá bibɔtiibi bin làá nīn kàal̀ Daafiidi beejal puee ní. Bi làá nīn gbíntìi kàal̀ itaamu àá janjatɔrɔkub pu ki jītí kipunyɔkɔ nee pu ki kóò dibeecindin, bi nì bi-kàliŋkpilib nì dinibul nee. 5 Ama ni yaa kaa pílifì tin m sòoǹee, man ni-Dindaan, m pūtì yii m làá yàntī dibeecindi nee ń kpántí adigbun^a.

6 «Ti-Dindaan nín sòon̄ tibɔti tin Juuda bɔtiu cindi puee sɔ̀.

«Min kamaa a ŋān̄ kii Galaadi bambaŋku,

àá kii Leebanɔn jooŋŋi yilpu kúntí kuntee,

m làá yàntī á kpántí kuteeu,

kitiŋ kin báà ubɔ kaa ti kóòyee.

7 M làá bɔ́ntí binib bí nàan̄-si,

báà ŋma làá nīn ŋúb́ u-tɔntɔŋwanti.

Bi làá gàatì a-jaantalkunyaambi

bin sá seedir dɔyee kí tɔ̄ ŋŋmin.

8 «Atimbun kupaau nib làá dāá jītí Jeerusaleem tiŋki caŋin. Bi làá dāá bàlifì tɔb yii: <Ba pu ní ti-Dindaan ŋá kitiŋkpaaŋŋi nee míǹ ní?> 9 Ní bí dāá kíí-bi yii: <Kun yì-tèe di sá yii bi fá mpèé ŋun nìn bí bi nì ti-Dindaan bi-Nimbɔtiu kansikinee, ki cūtìi gbāaǹ awaa nimbiin ki jáam̀-ŋi.>»

Bí sɔ̄ ubɔti Saaluum pu

10 Ní taa sɔ̄ un kpíìyee pu,

kí taa yāliŋkì u-pu.

Ama ní sɔ̄maan un bi cúú ki cáa cée pu,

kun puee waa ti làá fàtīí gítiń,

ní kaa nín fātìi ká u-tiŋki kin poon bi màl̄-uee.

11 Ti-Dindaan nín sòon̄ Joosiyaasi jipɔɔn Saluum, Juuda bɔtiu un fōō u-baa Joosiyaasi yil ki kāl̀ dibeel, ki dáá nyáń kitiŋ nee poonee puee sèé. «U kpá kí gíti gítiń. 12 Bi nín cúú-u ki cūnnì kitiŋ kin poon kuyuŋuee, niin ní u làá tin kpú, waa làá ti ká u-tiŋki.»

Ti-Dindaan nín sòon̄ ubɔti Yoowakiim pu miŋyee

13 An sá mbusu ní ki tīī unil

un máń u-diiku an kaa tɔ́kɔ́ mbaamɔn pu,

ki māā adiin ki tɔ̄kɔntí tɔb pu kaa dī maree.

U yàntī bin kíǹee tūǹ u-tundi fám

ní waa pà-bi bi-paati.

14 U lì u-ban yii:

<M làá mā kudikpaaŋŋu

kí mā adiin kí tɔ́kɔń ku-yilpu.

M làá lèekì tɔkɔlab,

ní kí dū seedir dɔi kí nákań agun pu

ní kí dū peentaman kí ŋmìtī-ku.

15 A dàkafī yii a nín néeń seedir dɔyee pu

ní a sá ubɔtaaa?

A-baa nìn jīǹ ki nyù kii báà ŋmee ní.

U nìn nóó mara saŋŋu

ki nìn dàkà mbaamɔn

ní tikɔkɔ nìn còom̄-u tiŋan.

16 Ti-Dindaan nín sòon̄ puee sɔ̀.

A-baa nìn mɔ́tí binandambi nì bisoodambi pu

ní tikɔkɔ nìn còom̄-u tiŋan.

Unil un ŋáań mimmee dàkà yii u lafun nyí-mi ní.

17 Ama tin sii nyàab̀ee di sá a-baba paatii

kaa dàkafī bin kíǹee pu.

A pée nyàab̀ kí nīn kù maanyiibab ŋma ní

ki dàkà binib tipɔmbɔti ki mùul̄-bi.

18 An pu ní ti-Dindaan sòon̄ Joosiyaasi jipɔɔn Yoowakiim, Juuda bɔtiu pu yii:

«U yaa láa kpíìyee, bí taa sɔ̄ u-pu.

Ubɔ ń taa láa lì yii:

Ubɔ ń taa láa sɔ̄ u-pu kí lì yii:

19 Bi làá dāá síb́-u kii kimaŋee ní.

Bi làá dāá fù-u kí nyāntí kí fá

ú nīn dátiǹ Jeerusaleem punyɔmmu.»

Ti-Dindaan sòon̄ Jeerusaleem yab pu

20 «Jeerusaleem, jɔ̄m̀ Leebanɔn jooŋŋi pu

kí nīn tátí.

Cù Baasan tantakalin kí nīn kūuntí.

Tɔ́kɔń Abariim jooŋŋi yilpu kí nīn tátí,

kun puee an dóò a-bɔmbi kɔkɔ pu.

21 Ŋyunti ŋun a nìn bí nsɔŋfinee,

m nìn sòon̄ nì si,

ama ní a kíí-mi yii:

Tin a ŋá doooo a-sapɔntinee dee,

aa pée pílifíǹ-mi dalba dalba.

22 Kubuŋu làá yòon̄ a-kpootiliibi kɔkɔ.

An yōoǹ a-bɔmbi ki cūnnì kuyuŋu.

Ikpiti in kɔkɔ a ŋée puee,

a làá fá a-jilmau ní icoo ń cúú-si gbòooo.

23 Kɔŋkɔnnee, a kóò Leebanɔn bambaŋkun,

ki máń a-diiku kii kunɔndii di pá seedir sufii puee.

Ama iween yaa láa túuǹ-see,

a làá dāá yāliŋkì,

ní kí dāá jī falaa kii unimpu di kā imatiŋween puee.»

Ti-Dindaan sòon̄ nì Yoowakiim jipɔɔn Yeekooniya pu

24 Á sòoǹ nì Yoowakiim jipɔɔn Yeekooniya Juuda bɔtiu yii: «Ti-Dindaan nín sòon̄ puee sèé: <M bí dimaŋfalin, m pūtì yii báà a yaa bàà sá kii kibɔmbiki ki fúuń m-ŋambiki m cáa nyìitī m-daaŋkuee, m làá fúutí-si kí fá. 25 M làá dū-si kí ŋá bin nyàab̀ kí kpɔ̀-si a fàŋkí yɔ́kɔ́ yɔkɔee ŋaan, an dàkà yii Babiloon bɔtiu Neebukadineesaar nì u-janjaliibi ŋaan. 26 M làá dū si nì a-na un màl̄-see kí tɔ̄ ndandati, kitincaŋ kin poon baa màl̄-nee. Niin ní ni làá tin kpú. 27 Ni làá dāá nyàab̀ nì ni-pɔŋŋu kɔkɔ kí gítiń, ama naa làá dāá ŋmā.>»

28 Binib bàlifī yii: «Kooniya gbanti kpántì kii disambil din wīī kaa ti bí tibanee, àá tiwan tin kaa ti kèetēe níii? Ba pu ní bi jìn̄-u ki cáań kitiŋ kin poon ní u nì u-biyaamu kaa nyée poon ní?»

29 M-tiŋki, m-tiŋki, pīlifì ti-Dindaan nyɔɔbundi! 30 Ti-Dindaan nín sòon̄ puee sèé: «Bí ŋmà Kooniya nee pu kii unil un kaa màl̄ ki kée. U bíil̀ u-maŋfal. U-dicaŋkun ubɔ kaa làá ŋmā kí kàl̄ Daafiidi beejal pu kí kpòotī Juuda tiŋki.»