Yeereemii 21

Yeereemii kíí ubɔti Seedeesiyasi

1 Tibɔti tin ti-Dindaan nìn sòon̄ nì Yeereemii ú dūú nàatī ubɔti Seedeesiyasee sɔ̀. Ubɔti nìn tú Maalkiya jipɔɔn Paasuur nì usaraaŋal Seefaniya, Maaseeyawuu jipɔɔn bí tùkù-u yii: 2 «Bàlifì ti-Dindaan kí kpèè ti-yil pu bɔti, di sá yii Babiloon bɔtiu Neebukadineesaar bíi jáà nì ti. An yaa yíì ti-Dindaan làá tí ŋá u-maamaacikpaambee ubɔ kí yàntī ú búntí kí wàatī-ti.» 3 Ní Yeereemii bí-bi yii: «Ní tin tùkù ubɔti Seedeesiyasi yii: 4 Ti-Dindaan Isirayeel yab Nimbɔtiu nín sòon̄ puee sèé: <Ni bí ki jáà nì Babiloon bɔtiu nì u-janjaliibi bin bíi jáà nì nee. M làá ŋá bijanjaliibi bin bin nyáń agun boon ki jáà nì bee mpɔn bí fàtīí gítí kitiŋ poon. 5 Man m-ba di làá dū m-pɔŋŋu nì m-kpabil kí já nì ni nì m-ŋuul nì m-bum nì m-biim poon. 6 M làá yàntī bìlbil kúm ń kpɔ̀ kitiŋ nee pu nib nì ki-waŋkuti. 7 Ti-Dindaan nín sòon̄ puee sɔ̀. Míǹ boonee, m làá dū Juuda bɔtiu Seedeesiyasi nì u-kàliŋkpilib kí ŋá Babiloon bɔtiu ŋaan. M làá dū kitiŋ nee nib bin kaa kpíì bìlbil kúmin àá kujaaun àá ŋkùm yuntiŋuee mun kí ŋá u-ŋaan. M làá dū-bi kí ŋá bi-nannanliibi bin nyàab̀ kí kpɔ̀-bee ŋaan. Neebukadineesaar làá yàntī bí pɔ̀fì-bi. Waa làá sɔ̄ bi-saai, kaa làá kíń ubɔ, kaa làá dàkà ubɔ mun kulaŋŋaŋfitiiu.>»

8 Ti-Dindaan nín sòon̄ nì Yeereemii tibɔti tin ú dūú nàatī samaayee sèé: «Ti-Dindaan nín sòon̄ puee sɔ̀. M dū dimaŋfal saŋŋu nì ŋkúm saŋŋu ki bíl̀ ni-nimbiin. 9 Bin kɔkɔ làá gbíntí Jeerusaleem tiŋkinee, kujaau nì ŋkùm nì bìlbil kúm di làá kpɔ̀-bi. Ama bin làá nyā kí cáá bi-ba kí tīī Babiloon yab bin bíi jáà nì nee làá ŋmátí. Tin an nibee páatèe di sá bi nín kaa kpíìyee. 10 Ti-Dindaan nín sòon̄ puee sɔ̀. M làá fàtī kí já nì Jeerusaleem tiŋki kí ŋá-kì tikpitil, kaa sá tiŋan. M làá dū kitiŋ nee kí ŋá Babiloon bɔtiu ŋaan ní úǹ ń tūū-kì ŋŋmi.»

Tin làá bàń Juuda yab bɔtiu dicaŋku puee

11 Tibɔti nee sá ki tīī Juuda bɔtiu dicaŋkun yab ní.

Ní pīlifìmaan ti-Dindaan nyɔɔbundi,

12 Daafiidi dicaŋkun yab!

Ti-Dindaan nín sòon̄ puee sɔ̀.

Ní kíĺ kutaafaau kí sòoǹ tibɔti ibaamɔn.

Ní fōōmaan bin bi mùul̄ee bimuuliliibi ŋaan.

An yaa kaa sá míǹ, m-ŋuul làá pōō kí yàaǹ ni-pu kii ŋŋmee.

Di làá wà tikɔkɔ

ní ubɔ kaa làá ŋmā kí gbíntí-dì.

13 Ti-Dindaan nín sòon̄ puee sɔ̀.

Nimbi bin kóò ditantakalin

ki bí kii ditaŋkpal din cɔ́ kitimpiliŋ puee,

man nì ni di cáá tibɔti.

Di sá yii ni lì yii:

«Ubɔ kaa ŋūǹ kí sìntīń doo kí já nì ti,

àá kí kɔ́ ti-balilaŋkin.»

14 Ti-Dindaan bí yii: «M làá dáaĺ ni-tafal

kí nóó nì ni-tuŋkpitiŋ nín sá puee.

M làá tūū Jeerusaleem bambaŋku ŋŋmi

ní an wà tin kɔkɔ māntìi tú-kuee.»