Yeereemii 20

Bi bóob́ Yeereemii ki nákáǹ ndɔ

1 Usaraaŋakpil Pasuur, Imeer jipɔɔn, di nìn sá ti-Dindaan Diiku pilisikpiliu. U nìn gbìl̄ Yeereemii nín nāatì ti-Dindaan bɔti puee. 2 Niinee ní u fáá Yeereemii ntampa ní ki yāntì bi bóob́-u ki nákáǹ ndɔ Beenjameen punyɔkɔki yilpu pú yaka kin bi dì ki kóò ti-Dindaan Diikunee. 3 Kutaa wúntì Pasuur yāntì bi bútì Yeereemiiyee, ní Yeereemii bí-u yii: «Ti-Dindaan kaa ti làá yíiń-si Pasuur, ama u làá nīn kíǹ ki yíì-si yii: <Tifaandi bí an kɔkɔ pu.> 4 Di sá yii ti-Dindaan nín sòon̄ puee sèé: <M làá kɔ́ǹ sii a-ba nì a-bɔɔbi tifaandi ní fàŋkì yɔ́kɔ́ yɔkɔ. A-nimbilaaliyin ní bi-nannanliibi làá kpɔ̀-bi. M làá dū Juuda yab kɔkɔ kí líiǹ Babiloon yab bɔtiu. U làá cúú-bi kí cùnnì u-tiŋkin kuyuŋu ní kí kpɔ̀ bin kíǹee. 5 Jeerusaleem tiŋki gaajati kɔkɔ, kì nín túń ditundi ki ká tiŋyee kɔkɔ nì ki-gaajawammɔntiiti nì Juuda yab bɔtiibi gaajati kɔkɔee, m làá dūú ŋá bi-nannanliibi ŋaan. Bi làá fūkul̀ tíǹ gbanti kɔkɔ pílpil kí yòon̄ kí cáá cùnnì Babiloon tiŋkin. 6 Sii Pasuur nì a-dicaŋkun yab kɔkɔee, bi làá cúú-ni kí cùnnì kuyuŋu. A yaa láa bàn̄ Babiloon tiŋkinee, a làá kpú. Bi làá síb́-si niin, ki kpáaǹ a-bɔɔbi bin a nì bi nāatì tinyimɔmbɔtee kɔkɔ.>»

Yeereemii timinsii

7 M-Dindaan, a kíil̀-mi

ní ma mun lafun fōō ki kíí míǹ.

A cúú-mi mpɔn, ní ki pɔ́ɔkiǹ-mi.

Binib lāā-mi baabadal,

báà ŋma bèel̄-mi ní.

8 Ŋyunti kamaa m yaa làá sòoǹee,

see ḿ téeń kí bāakì yii:

Tipɔmbɔti nì dinàandi!

Tiŋman baabadalee,

sii ti-Dindaan nyɔɔbundi puee,

binib sìí-mi ki bèel̄-mi.

9 M yaa bí yii:

«Maa làá ti dàkafì ti-Dindaan pu,

maa làá ti nàatī u-nyɔɔbundi.»

Ama ní m-pɔbil poonee,

an wù kii ŋŋmee.

M bíi pɔ̄ɔntí fám kí pɔ̄ɔkiǹ-u,

ama ní kaa ŋūǹ.

10 M gbìl̄ binib tikpil sòoǹ ki bíiĺ-mi.

Bi yíì-mi yii: «Tifaandi bí an kɔkɔ pu».

Biba lì yii: «Tí bìitī u-pu!»

ní bin kíǹee kíikí yii: «Tiŋman,

tí lafun bìitī u-pu.»

M-bɔɔbi gba kā ki cí yii ḿ lítí ní.

Bi lì yii:

«An yaa yíì u làá yàntī án túuǹ-u.

Niinee ti làá pɔ̄ɔkiǹ-u

ní kí tɔ̀-u ipɔntoon.»

11 Ama ti-Dindaan un sá ubaatandaan

ki cáá mpɔnee bí m-cee.

Bin bíi sàantí-mee làá lítí,

baa làá ŋmā kí ŋá-mi tiba.

Icoo làá cúú-bi,

kun puee baa làá ŋmā kí já kí pɔ̄ɔkiǹ-mi.

Bi-cooi làá nīn bí ní ki cá jaanjaan

ní ubɔ kpá kí súntí i-pu.

12 Ti-Dindaan Mpɔŋkɔdaan,

a nyí unil un yú nì si deedeeyee.

A nyí kun ti lèe nì ti-landɔkɔi.

M cí kí ká a nín làá tɔ̀-bi ipɔntoon puee,

di sá yii sii ŋaan ní m dū m-bɔti ki ŋá.

13 Tí gāāmaan ilan kí pàkà ti-Dindaan!

Tí nyɔ̄ŋkìmaan ti-Dindaan,

di sá yii u fìil̄ uwɔfi ki nyāntí binikpitib ŋaan!

14 Mbusu ń kɔ́ ŋwiin ŋun bi màl̄-mee^a!

Ŋwiin ŋun m-na núuĺ-mi ki bíl̀ee

ń taa ká diyimɔɔl!

15 Mbusu ń kɔ́ un di nìn cūtìi tùkū m-baa yii:

«Bi màl̄-si kibininjabiki!»

ní ki yāntì an mɔ́ɔkiǹ-uee!

16 An niliuee ń nīn bí kii ntimu mun

ti-Dindaan lábitì ki cìb̄ kaa súń isaayee.

Udaan làá nīn bí iyaliŋki pu kutaafaau

ní kí nīn gbìl̀ ijanjakuŋkuunti pu ŋwiimpu.

17 Ba pu ní Unimbɔti kaa yāntì m kpíì m-na poon ní?

Kéè m-na poon bàà kpántì m-kaakul deeyaa!

M bàà làá nīn pée kā u-poon míǹ ní

kí nīn pée cá jaanjaan.

18 Ba pu ní m nyáń m-na poon

ki jéetì kunimbaau nì falaa poon,

kí kúntí m-maŋfal wiiŋyi icoo poon míǹ?