Yeereemii 19

Kulɔŋŋu kun bi wīīyee

1 Ti-Dindaan nín sòon̄ puee sèé: «Cù uyɔɔmaati cee kí dā kulɔŋŋu. A yaa cée, á kpáaǹ bitindaŋkpilib biba nì bisaraaŋaliibi kpilib. 2 Á dī abɔkati punyɔkɔki kí cù Inɔɔm tantakalin. Niin ní á bāakì tibɔti tin m làá sòon̄ nì si nee. 3 Á dāá lì yii: <Juuda yab bɔtiibi nì Jeerusaleem yab, pīlifìmaan ti-Dindaan nín sòon̄ puee. Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. M làá cáań nnaabukpaan ŋubɔ kí tɔ̄ mpaan nee pu. Bin yaa láa gbìl̄-tèe làá fàŋkì. 4 Di sá yii Juuda yab dū-mi ki fá. Bi-puee, baa ti béetí mpaan nee. Bi tūutì niin talaalutuukaabi ki tīī awaa. Bíǹ bi-baaa, bi-naanjabaaa, Juuda yab bɔtiibi kaa nìn nyí-ŋi. Bi yāntì maanyiibab fatikuu gbí mpaan nee pu. 5 Bi ŋātì iwaatootipaan kí nīn tòotī diwaal Baal. Niin ní bi cáǹ bi-jipɔmbi ki tòotī diwaal Baal ki wù ŋŋmi. Maa tīī-bi mara yii bí nīn ŋáań míǹ, maa sòon̄ an pu, kaa dākafì míǹ pu gba.>

6 «An pu ní ti-Dindaan bí yii: Ŋwiin ŋubɔ bí ki dòoń, baa làá dāá ti yíiń mpaan nee yii <Toofeeti> àá <Been-Inɔɔm tantakal>, ama bi làá dāá nīn yíì-ŋu yii <Dipɔ̀fil tantakal>. 7 Mpaan nee puee, m làá dāá nàan̄ Juuda yab nì Jeerusaleem yab nín bɔ́ntì kí ŋá tiŋyee. M làá yàntī bi-nannanliibi ń kpɔ̀-bi kujaaun. M làá dūú dī bin nyàab̀-bi ŋkúmee pu ní kí ŋá míǹ. M làá dū bi-nikpiliŋ kí tīī inoon ń jī ní ipeel ń ŋmɔ́. 8 M làá yàntī kitiŋ nee ń kpántí adigbun ŋma kí yàntī báà ŋma ń nīn gbáà ki-pu ibiil. Bin kɔkɔ làá dāá jītí niinee làá dāá fàŋkì ní kí nīn búǹ ifoon tin bāań-kèe pu. 9 Binannanliibi bin là kí kúntí-bee làá dāá màntīí tū bi-tiŋki kí jáǹ-bi. Bi làá dāá nīn bí falaakpaan poon áli kí dāá ŋmɔ́ bi-jipɔmbi nì bi-bisalib nanti ní kí dāá ŋmɔ́ tɔb.

10 «Míǹ boonee ní á gbá kí wīī kulɔŋŋuee bin nóó-see nimbiin, 11 ní kí tùkù-bi yii: Ti-Dindaan Mpɔŋkɔdaan nín sòon̄ puee sɔ̀. M làá wīī dinibul nee nì kitiŋ nee kii bi nín wìil̄ uyɔɔmaati lɔŋku puee ní. An kaa dāa gíti cáá diŋaŋkil.

«Bi làá dāá síb́ anikpil Toofeeti tantakalin gba, kun puee mpaan kaa dāa gíti bí laaba bí síb́-ŋi.» 12 Ti-Dindaan nín sòon̄ puee sɔ̀. M làá yàntī kitiŋ nee nì ki-nib ń kpántí kii Toofeeti tantakalee ní. 13 Jeerusaleem diiŋŋi nì Juuda bɔtiibi diiŋŋi làá kɔ́ tijɔkɔndi kii Toofeetee ní. Di sá yii bi tūutì talaalub adiin kɔkɔ yilpu bi nín bɔ̀b̄ puee ki tīī iŋmalbijaa in bí kutaa puee, ki fá awaa ndaam.

14 Míǹ boonee ní Yeereemii nyánní Toofeeti tantakalin, laakin ti-Dindaan nìn tú-u ú cù kí sòoǹ u-bɔtee. U nìn cūtì ki kɔ́ kunimbɔtidii cindin, ní ki bí samaa kɔkɔ yii: 15 «Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <M làá cáań nnaabu ŋun m nìn sòon̄ ki tɔ́ kitiŋ nee nì ki-timbilimmu kɔkɔ puee. Di sá yii kitiŋ nee nib yiliŋ pɔ̄ɔ̄, ní bi yíì kaa pílifì m-nyɔkɔ.>»