Yeereemii 18

Kuyɔkɔu nì uyɔɔmaati bɔti

1 Ti-Dindaan sòon̄ nì Yeereemii tibɔti nee yii: 2 «Yīkìí sìntī uyɔɔmaati cee. Niin ní m làá sòoǹ nì si tin m cááyee.»

3 Niinee ní m nín sìntī uyɔɔmaati cee. M bàn̄ee u bíi māā dibool kupiliŋu kun pu bi māā abookuŋkunee. 4 Ama dibool din u nìn bíi māāyee kaa nìn kāl̀ kii iyunti iba án nín pée bàń uyɔɔmaati puee. Niinee ní u fātìi máń dibool diba din fáatiǹ-uee. 5 Niinee ní ti-Dindaan sòon̄ nì mi tibɔti nee yii: 6 «Mimmee Isirayeel yab, maa ŋūǹ kí ŋá-ni kii uyɔɔmaati nee nín ŋá pueeee? Man ni-Dindaan di sòon̄ míǹ. Kii kuyɔkɔu nín kā uyɔɔmaati ŋaan puee, míǹ ní nimbi Isirayeel yab mun kā m-ŋaan. 7 Iyunti ibee m sòoǹ yii m làá cóotí ditimbundi àá dibeel diba kí lábití-dì kí cìb̄ ní kí nàan̄-dì. 8 Ama ditimbundi gbanti yaa fá di-tuŋkpitiŋee, ma mun kpántí m-landɔkɔŋu ní kí taa ti ŋá-dì tin m bàà bɔ́ntì kí ŋá-dèe. 9 Iyunti ibee m tí sòoǹ ditimbundi àá dibeel diba pu yii bí fàtīí náań-dì kí mā-dì. 10 Ama ditimbundi gbanti yab yaa kaa pílifì m-nyɔkɔ ní ki bíi ŋáań min maa lèe, m kpántí m-landɔkɔŋu ní kí taa ti ŋá-bi tiŋan tin m bàà bɔ́ntì kí ŋá-bee.

11 «Kɔŋkɔnnee, Yeereemii, á tùkù Juuda nì Jeerusaleem yab yii: <Ti-Dindaan nín sòon̄ puee sɔ̀. M bíi bɔ́ntí nnaabu kí tɔ̄ ni-pu, m bíi dàkafī min m làá ŋá-nee. An puee báà ŋma ń fá u-saŋkiŋkpitil. Ní ŋāŋkì ni-bítam nì ni-ŋáaǹtam.>»

12 Ama bi làá lì-si yii: «Tin a sòoǹ nee sá fám ní! Ti nín pée lēē kí ŋá puee, míǹ ní ti làá ŋá, ti làá nóó ti-landɔkɔkpitii ní.»

Isirayeel yab súntì bi-Dindaan pu

13 An pu ní ti-Dindaan sòon̄ yii:

«Ní bàlifìmaan atimbun ŋin kíǹee yab.

Ni pée gbìl̄ tibɔti nee juti ki káaa?>

Isirayeel un bí kii usapɔɔn un kaa nyí uninjee

túń ntimbiil tuuŋŋi tikpil.

14 Ntaayim kaa bìintí Leebanɔn jooŋŋi taŋkpeeŋi puɔɔɔ?

Ibun in nyim sìntī ajoon pu ki sɔ̀m̀ee

ŋūǹ kí gbèen̄ kí taa ti pùub̀aaa? Aayee!

15 Ama man nibul súntì m-pu!

Bi tòotī awaa ŋin kaa bí tibanee.

Awaa gbanti di líikí-bi bi-saŋŋu poon.

Ŋi yàntī bi féeń dooooyee saŋyi

kí cùú nóó nsan ŋun baa cátèe.

16 M-nibul yāntì di-tiŋki kpántì ataŋkpakpuku,

ki yàntī binib gbáà inimɔɔn biilii kaa gbèentí.

An ŋáań bisanjitiliibi bitii,

ní bi gbēentí bi-yiliŋ.

17 Binannanliibi yaa láa bāańee,

m làá gbá kí yàaǹ m-nibul

kii ŋwìiń nyalaŋki buŋku nín kpàá ntam ki féeń puee ní.

Bi-nimbinaamandi dalee,

án nín bàà sá ḿ fàtī m-nimbiin kí tīī-bee,

m-boon ní m làá fàtī kí tīī-bi.»

Binib bíi bɔ́ntí kí kpɔ̀ Yeereemii

18 Binib biba bí yii: «Tí cùmaan kí bɔ́ntí kí jáǹ Yeereemii! An kaa sá ti lóò bisaraaŋaliibi bin làá dàkà-ti marabee àá biciŋfitiibi bin làá tīī-ti isaŋkee. Taa tí lóò bibɔnaatiliibi bin làá nàatī-ti Unimbɔti bɔtee. Tí cùmaan kí jáǹ-u kí sòoǹ kí bīil̀-u. Ti taa pīlifì tin u sòoǹee.»

19 Ama sii m-Dindaan, gíiǹní a-landɔkɔŋu m-cee,

pīlifì tibɔti tin bin bíi kɔ́kɔĺ-mee sòoǹee.

20 Bi dù tikpitil kí pà tiŋan puɔɔɔ?

Bi gbìn̄ mbòó ḿ jēetí poon.

Ti-Dindaan, téetí yii m yúl̀ a-nimbiin

ki gbāam̀-si binib nee pu

yii á páatí a-ŋuul bi-pu.

21 Míǹ puee yàntī ŋkùm ń kpɔ̀ bi-biyaamu,

bí dū ntàataajimu kí kpɔ̀-mu!

Bi-nimpoobi ń kpántí biŋmaŋŋmantiibi nì bikpiipoobi!

Bìlbil kúm ń kpɔ̀ bi-calib!

Bi-naacimpɔmbi ń kpúń kujaaun.

22 A yaa láa dū binannanliibi ki tɔ́ bi-puee,

bí dāá gbìl̄ ibiil pu bi-dumpui!

Di sá yii bi gbìn̄ mbòó ḿ jēetí poon,

ki píĺ-mi titalindi kí sàl̄-mi.

23 Ama sii ti-Dindaanee,

a nyí tin kɔkɔ bi bíi búkù m-pu

ki là kí kpɔ̀-mee.

Á taa dū bi-kpitii kí pɔ̄-bi!

Taa kpìtī bi-yìntitam a-nimbiin!

Bí lítí a-nimbiin.

A-ŋuul wiiŋŋu dalee,

á dāá jáǹ-bi.