Yeereemii 17

Ti-Dindaan bīitì Juuda yab kpitii pu

1 «Juuda yab kpitiiyee,

bi dū kigaai ní ki cáká ki ŋmàn̄,

àá ataŋkpanyaan ní bi dūu ŋmàn̄-i.

Bi ŋmàn̄-i ki ŋá bi-pɔbiliŋin,

ní ki ŋmàn̄-i ki nákáǹ nsaraafan kpiŋŋi^a pu.

2 Kii bi nín dàkafī bi-jipɔmbi pu puee,

míǹ ní bi dàkafī bi-saraafaŋyi nì bi-windɔi

nì isufi in cáá tifaasɔn ki bí ŋgbantamu puee pu.

3 Nimbi Juuda yab,

nimbi bin tòotī awaa

ajoon pu nì tisatinee,

m làá dū ni-gaajati nì ni-gaajawanti

nì ni-waatootipaaŋyi kí tīī bí fūkul̀.

Ikpiti in ni ŋá ni-tiŋki kɔkɔ poonee pu

ní m làá ŋá míǹ.

4 Ni làá yīkì kí dū kitiŋ kin m nìn tīī-ni

ní nīn kíǹ ki yèe kí fá.

M làá yàntī ní kpántí ni-nannanliibi yumbui

kitiŋ kin naa nyée poon.

Di sá yii ni tūū m-ŋuul ŋmiŋu,

ní ŋu làá nīn pée wù míǹ ní ki cá jaanjaan.

Ibaamɔn wundi nì inyimɔn wundi

5 Ti-Dindaan nín sòon̄ puee sèé:

«An sá mbusu ní ki tīī unil un máká nisaal pu,

ki nyàab̀ dijòońdi nisaaleen cee,

ní ki fàtī u-boon ki tìì ti-Dindaanee.»

6 U bí kii kisubiki kin cɔ́ kitiŋkuliŋŋi puee ní,

kì pée kpá kí ká mmɔn.

Kì làá nīn cɔ́ kuteeu taŋkpeeŋi kansikin,

kitiŋ kin cáá ŋyaam ubɔ kaa kóò ki-puee ní.

7 Ama unil un di máká man pu

ki fōō-mi ki kíí nì u-pɔbil kɔkɔee,

man u-Dindaan làá bìin̄ u-pu.

8 Udaan bí kii busubu bun yú mbun caŋin,

bu-nyaaŋyi lālim̀ ki kɔ́ mbunee ní.

Kutuntuŋu yuntiŋuee,

buaa fàŋkí tiba,

ní bu-faati pée sɔ̀m̀ ŋma.

Báà ŋweel yaa yúl̀ dibimmɔndi,

bu pée lòoǹ abil ní kaa gbèentí.

9 Unil pɔbil ŋmàtíǹ ki jítiǹ tikɔkɔ!

Ubɔ kaa ŋūǹ kí cáaǹ-dì.

Ubɔ mun kaa ŋūǹ kí béé-dì.

10 «Man ni-Dindaanee,

m wāĺ tin kā unil pɔbil poon poon kábuee,

ní ki nyí u-landɔkɔi kɔkɔ nín sá puee.

An pu ní m ŋūǹ kí pà báà ŋma bimbim

nì u-tuuŋŋi paati.

11 Kii ujikpal nín nākantí ajin ŋin waa tɔ́ee puee,

míǹ ní unil un dī isaŋkpiti pu ki ká tigaajatee bí.

U-maŋfal wiiŋyi kansikin nì kansikinee

ní u-gaajati ń wāŋkì,

ní ú dūú kpántí kii kinaatuuyee.»

Ti-Dindaan baba di sá dimaŋfal nyeel

12 Tinyool beejal din tɔ́kɔ́ yilpu doooo ŋkilkaaminee,

míǹ ní ti-circir kɔŋkooŋŋu bí.

13 Ti-Dindaan, sii un pu Isirayeel mákée,

icoo ń cúú bin kɔkɔ dū-si ki fée!

Bin kɔkɔ fātì bi-boon ki tīī-see,

bí nīn bí kii ayin ŋin bi ŋmàn̄ ntaminee.

Di sá yii bi dū sii ti-Dindaan

un sá dimaŋfal nyimbuliŋuee ki fá.

Yeereemii bíi mèé ti-Dindaan

14 M-Dindaan, cáaǹ-mi ní ḿ ká dicáaǹdi,

fīī-mi ní ḿ ká difiil.

Di sá yii sii di sá m-nyɔŋkii.

15 Bi lì-mi yii:

«Ti-Dindaan bɔti tin u sòon̄ee bí la?

Tibɔti gbanti ń ŋá míǹ tí kpèèyaa!»

16 Ti-Dindaan, man di kaa páb́-si á cáań nnaabu.

Maa tí mēē kí ká nnaabu wiiŋŋu,

sii a-ba nyí míǹ.

Tin m sòon̄ee, a-nimbiin ní m sòon̄-tì.

17 Taa kpántí dinyoondi kí tīī-mi,

sii ní m sáń ki kóò dinimbinaamandi yuntiŋu.

18 Icoo ń cúú bin sàantí-mee

kí taa cúú man.

Tifaandi ń cúú-bi, ama kí taa cúú man.

Cáań nnaabu kí tɔ̄ bi-pu,

kí nàan̄-bi dúsi dusi.

Ti-Dindaan wiŋŋuŋfikaaŋu bɔti

19 Ti-Dindaan nín sòon̄ nì mi puee sèé: «Cùú yūĺ kipunyɔɔkpaaŋŋi caŋin. Niin ní Juuda yab bɔtiibi dì ki kóò ki dì ki nyēē Jeerusaleem tiŋkin. Míǹ boonee, á cùú yūĺ kitiŋee punyɔmmu kɔkɔ caŋin. 20 Á tùkù Juuda yab bɔtiibi nì Juuda yab kɔkɔ nì Jeerusaleem yab bin kɔkɔ dì mpunyɔmu gbantee yii: <Pīlifìmaan ti-Dindaan nyɔɔbundi. 21 U nín sòon̄ puee sɔ̀. Ní nīn nyíǹ ni-ba tiŋan kí taa túń diwaŋgul ŋwiŋŋuŋfikaa dal kí dī Jeerusaleem punyɔmmu nee kí kɔ́ àá kí nyā^b. 22 Ní taa nyāntiń ni-diiŋŋin diwaŋgul ŋwiŋŋuŋfikaa dal, kí taa tɔ̄ ditundi báà diba yaadal. Ama ní dū ŋwiin gbanti kí sú-mi kii m nín nìn yóoǹ ni-naanjab mara puee^c. 23 Baa nìn kpōoǹ bi-tafal ní kaa nín pílifì. Bi nìn ŋá ŋyipɔn kí taa pīlifì ní kaa nín fōō isaŋki.

24 «<Ti-Dindaan nín sòon̄ puee sɔ̀. Nimbee, ní pīlifiǹ-mi. Ní taa túń diwaŋgul ŋwiŋŋuŋfikaa dal kí dī kitiŋ nee punyɔmmu kí kɔ́. Ní dū ŋwiin gbanti kí sú-mi kí taa tɔ̄ ditundi diba ŋwiin gbanti. 25 Niinee, bibɔtiibi nì abɔtibil bin kā Daafiidi beejal puee làá nīn kàal̀ itaamu nì tɔrɔkub pu kí nīn pée dì kitiŋ nee punyɔmmu pu ki kóò ki nyēē. Bi-kàliŋkpilib nì Juuda yab nì Jeerusaleem yab làá nīn dì niin, ní binib ń nīn pée kóò kitiŋ nee ni kí nīn cá jaanjaan. 26 Binib làá nyānní Juuda timmun nì Jeerusaleem kpaanceetii nì Beenjameen tiŋkin nì Seefeelaa tiŋkin nì ajoon pu timmun nì Neegeeb. Bi làá dāá ŋá bisaraawɔkaabi nì saraabi biba mun nì tijimpin saraabi nì talaalutuukaa nì ijaam saraabi ti-Dindaan diikun. 27 Ama ni yaa kaa pílifiǹ-mi kaa dū ŋwiŋŋuŋfikaa ki sú-mi, ki túǹ diwaŋgul ŋwiŋŋuŋfikaa dal ki dī Jeerusaleem punyɔmmu pu ki kɔ́ee, m làá tūū ki-punyɔmmu ŋŋmi. Ŋu làá wà Jeerusaleem beeciŋŋi, ní kaa làá kpú.>»