Yeereemii 16

Yeereemii bí u-baba

1 Ti-Dindaan sòon̄ nì mi tibɔti nee yii: 2 «Á taa cáá unimpu, kí taa màal̀ mbininjabiyaamu nì nnimpubiyaamu kitiŋ nee poon. 3 Di sá yii man ni-Dindaan nín sòon̄ mbininjabiyaamu nì nnimpubiyaamu mun bi làá màal̀ kitiŋ nee poonee, nì bibinaatiibi nì bibaatiibi bin làá màal̀-muee puee sɔ̀. 4 Tigbaŋweeŋkpiil di làá kpɔ̀-bi. Ubɔ kaa làá sɔ̄ bi-kpool, ní ubɔ mun kaa dāa bí kí síb́-bi. Bi làá dāá dòon̄ kitiŋ kí sūū ní kí dāá kpántí ntiŋkpam. Kujaaun ní bi làá kpú àá ŋkùm di làá kpɔ̀-bi. Kaajiikub nì sinsiŋkub di làá ŋmɔ́ bi-nanti.»

5 Ti-Dindaan gíti bí-mi yii: «Á taa kɔ́ dicindi din poon ní binib kpáfì ki kā dikpoolee, kí taa cù dikpool. Á taa ŋá ubɔ fɔ̀ɔ́, di sá yii m cúú m-saasɔl nì m-ŋanti nì m-poommɔŋŋu ki fōō dinibul nee cee. Man ni-Dindaan di lī míǹ. 6 Kitiŋ nee poonee, binikpaambi nì ŋwaamu làá kpú. Ubɔ kaa làá síb́-bi. Ubɔ kaa làá cāfì u-wunti kí dàkà kunimbaau ní kaa nín kōol̀ diyibaakpandi. 7 Ubɔ kaa làá mɔ̄ǹ bukpɔsaa kí cùnnì dikpool kí ŋméeǹ-bi. Ubɔ mun kaa làá dā un baa kpíì àá u-na kpíìyee ndaam.

8 «Taa kɔ́ kudicaŋu kun poon bi bíi jīǹ jiŋaalee. Taa kàl̄ si nì bi ń jī kí nyɔ̀. 9 Di sá yii man ni-Dindaan Mpɔŋkɔdaan, Isirayeel yab Nimbɔtiu nín sòon̄ puee sèé: <Ni-maŋfal wiiŋyi poon nì ni-nimbilaaliyin ní m làá kúntí kitiŋ nee pu ni-jiŋaalib gbiiliŋ nì ni-pɔɔpindi faalii nì animpucaŋgbiil.>

10 «A yaa láa dū tibɔti nee ki tùkū dinibul nee yab ní bi yaa láa bālifì-si yii: <Ba pu ní ti-Dindaan cáań nnaabu nee ki tɔ́ ti-pu? Ba ní ti ŋá ki yīntì ní? Ba kpitii ní ti baasii ŋá ti-Dindaan ti-Nimbɔtiu ní?> 11 Á dāá kíí-bi yii: <Ti-Dindaan nín sòon̄ puee sɔ̀. Kun pu m ŋá mimmee di sá yii ni-naanjab nìn dū-mi ki fá ki cūtìi nóó awaa ki tōotì-ŋi ní ki gbāaǹ ŋi-taapu. Mamee, bi dū-mi ki fá ní kaa ŋúb́ m-marab. 12 Nimbee, ni-kpitii gíti nyāŋkì nì ni-naanjab yai. Báà ŋma nóó u-landɔkɔkpitii kaa pílifiǹ-mi. 13 M làá jà-ni kí nyāntí kitiŋ nee poon kí cùnnì kitiŋ kin poon ni nì ni-naanjab kaa nyí ki kée. Niinee, ni làá ŋmā kí nīn tòotī awaa ŋwiimpu nì kunyeeu. Di sá yii maa ti làá dàkà-ni m-laŋaŋfitiiku.>»

Ti-Dindaan fātìi gíiǹní bin u nìn jìn̄ee bi-tiŋki pu

14 An pu ní ti-Dindaan sòon̄ yii: «Ŋwiin bí ki dòoń baa làá dāá gíti lì yii: <M pūtì ti-Dindaan un bí dimaŋfalin ki nyántìń Isirayeel yab kuyuŋun Eejipiti tiŋkinee!>, 8ki kɔ́ǹee.> Tiŋman m làá fàtīí gíiǹní-bi kitiŋ kin m nìn dūu tīī bi-naanjabee poon.»

Unimbɔti làá fàtīí fōō bin jíń dibɔkpilee

16 Ti-Dindaan bí yii: «M làá tɔ̄ bijɔncuuliibi tikpil bí cùú cúuń-bi. Míǹ boonee ní ḿ tɔ̄ bikpambi kupaau bí cù ajoon kɔkɔ pu nì ŋgbantamu kɔkɔ pu nì itakpalɔkɔn kí kpāŋkì-bi. 17 Di sá yii m wāĺ tin kɔkɔ bi ŋáańee. Bi-tuuŋŋi báà dibaba kaa bál̀-mi, ní tiba kaa lìkī bi-kpitii m-nimbiin. 18 M làá yàntī bí pà bi-kpitii paati mili pu nì bi-yìntitam. Di sá yii bi dū bi-waaŋi ŋin sá ntimbiil wanti kaa cáá dimaŋfalee ki kɔ́ǹ m-tiŋki tijɔkɔndi. Bi dū bi-waaŋi ŋin m-nimbil kaa là kí wāl̀ee ki gbéeǹ m-tiŋki kin sá m-gaajawantee.»

Báà ŋma béè Unimbɔti un sá tiŋman pu yɔuee

19 M-Dindaan, sii di sá man pɔŋŋu nì m-balilaŋki,

dinimbinaamandi yuntiŋuee,

sii ní m sáń ki kóò.

Atimbun làá nyānní kitiŋ gbeennyɔkɔ kí dāan̄.

Bi làá dāá lì yii:

«Difakal din ti-naanjab fōōyee di sá tinyimɔmbɔti,

tiwan tin kaa bí tiban kaa kèetēe.

20 Unil ŋūǹ kí mɔ́ɔ́ inimbɔtaaa?

Tin bi māāyee kaa sá inimbɔti.»

21 «Too, min bí nee m làá dàkà-bi

m-kpabil nì m-pɔŋŋu.

Niinee bi làá béé yii man di sá bi-Dindaan.»