15
1 Ní ti-Dindaan bí-mi yii: «Báà gba Mooyiisi nì Samiyeel yaa gbāam̀-mi dinibul nee yab pua, maa làá pée sɔ̄ bi-saai. Jà-bi kí nyāntí bí búntí kí wàatī-mi. 2 Ní bi yaa bālifì-si yii: <La ní ti làá cù ní?> Á kíí-bi yii: <Ti-Dindaan nín sòon̄ puee sɔ̀.«Bìlbil kúm ń kpɔ̀ un sá bìlbil kúm yɔuee!
Un máaǹ kí kpú kujaaunee ń kpú kujaaun!
Ŋkùm ń kpɔ̀ un sá ŋkùm yɔuee!
Ní un sá kuyuŋun yɔuee ń búntí kuyuŋub!»
3 Ti-Dindaan bí yii: «M làá jáǹ-bi minaa pu ní: kitàataajiki làá kpɔ̀-bi, ní iboo ń fù-bi kí cùnnì ndan, ní kaajiikub ń jī-bi ní sinsiŋkub ń ŋmɔ́ kí tɔ̀ntī-bi. 4 Mimmee, kitiŋ pu beeŋi kɔkɔ yaa ká-bee, bi làá kɔ́ dinyoondin. Kun pu m làá ŋá mimmee di sá Eeseekiyaasi jipɔɔn Manasee, Juuda yab bɔtiu nín ŋáaǹ atuŋkpiti ŋin kɔkɔ Jeerusaleem tiŋkineec.»
Ti-Dindaan gīī kí sɔ̄ isaa
5 Ti-Dindaan bí yii: «Jeerusaleem, ŋma di làá gíti sɔ̄ a-saai?
Ŋma di làá sɔ̄ a-pu?
Ŋma di làá dūú páb́ u-ba kí bàlifì kí kpèè tin poon a bée?»
6 Ti-Dindaan bí yii: «Sii di dū-mi ki fá,
ní ki fātì a-boon ki tīī-mi.
An pu ní ma mun jáń nì si
ki nāaǹ-si.
Di sá yii m gīī kí nīn sūǹ a-saai.
7 Kitiŋee timmu kɔkɔ poonee,
m yōoǹ ndɔ ŋun m cáa gbáà tijimpinee
ki gbáń ki yāaǹ-bi.
M nāaǹ-bi ki yāntì baa ti cáá mbiyaamu,
ama ní baa kpántì bi-bimbim.
8 M yāntì bikpiipoobi wíiǹ
ki jítiǹ tiŋku gbandi bul.
M cáań nnaabu ki tɔ́ unipɔɔn
un sá ujanjalee na pu kuwiŋkaŋu pu.
Dibɔbil pu niinee ní m yāntì
dinyooŋkpaandi jéetì u-pu.
9 Unimpu un nìn cáá jipɔmbi bilulee kaa ti bí tiban.
U fìkī ki dɔ̄.
Úǹ wìiŋ́ŋu jéetì kuwiŋkaŋu pu.
Icoo cúú-u,
u fá u-jilmau.
Bin kíǹ ki bí dimaŋfalinee,
m làá yàntī bí kpú kujaaun
bi-nannanliibi nimbiin.»
Ti-Dindaan di lī míǹ.
Yeereemii bíi yáliŋkí, Unimbɔti dàkā-u u-tundi
Yeereemii
10 M-na, mbusu kɔ́-mi a nín màl̄-mee pu!
Kitiŋ nee kɔkɔ poonee,
binib jáà nì mi
ní kaa là kí wāl̀-mi.
Ma mun kaa pīnnì ubɔ animbil,
kaa tí cūtì ubɔ mun cee ki pīnnì animbil.
Ama ní báà ŋma tòó-mi mbusu.
11 Ama ti-Dindaan nìn bí-mi yii:
«M pūtì yii m làá fīī-si kí kɔ́ǹ-si nnaamin.
Nnaabu nì dinimbinaamandi yuntiŋuee,
m làá yàntī a-nannanliibi ń dāá gbàan̄ a-nimbiin.
12 Ubɔ ŋūǹ kí kóoĺ tikútaaa,
tikúti tin nyánní ŋgan púee nì tasa kútaaa?»
ti-Dindaan
13 «Juuda yab, m làá yàntī bí fūkul̀
ni-gaajawanti nì ni-gaajati,
ní an kaa cáá yii ubɔ làá téeǹ-ni.
Ikpiti in kɔkɔ ni ŋá ni-tiŋki kɔkɔnee paati dee.
14 M làá yàntī ní kpántí ni-nannanliibi yumbui
kitiŋ kin a nyée poon.
Di sá yii m-ŋuul sēē ŋŋmi
ŋun di làá wà-see.»
Yeereemii
15 Sii ti-Dindaan nyí tikɔkɔ!
Dàkafì m-pu kí téetí m-pu.
Tɔ̀ bin kā m-puee ipɔntoon.
Kimɔtii kin a cáá bi-puee puee,
á taa yàntī ḿ jī falaa.
Béé yii sii pu ní man bíi jīǹ takaasi.
16 M yaa nìn ká a-nyɔɔbundee,
m dù-dì kí ŋmɔ́ ní kí náĺ.
Di nìn tìì-mi mmɔn nì dipɔɔpindi ní.
Di sá yii bi dū-mi ki sú sii
m-Dindaan Unimbɔti Mpɔŋkɔdaan ní.
17 Maa kāl̀ bibeeliliibi kansikin
ki kɔ̄ntì m-nimbiliŋ.
Ama a ŋá-mi mpɔn m kākatì m-baba,
di sá yii a yāntì m díkí a-ŋuul ki gbí.
18 Ba pu ní m-falaau kaa cáá dikúntil ní?
Ba pu ní m-buuŋŋu kaa kúù
ki kpántì taagbunjaanjaan ní?
Ibaamɔn, a kpántì m-cee kii
mbun ŋun kíiĺ binib,
baa ŋūǹ kí nīn máká ŋu-pu yii
ŋu cáá nnyimaaa, ŋuaa cááyee ní.
19 Too, ti-Dindaan nín sòon̄ puee sɔ̀.
«A yaa fātìi gítìń m-cee,
m làá fàtīí fōō-si á nīn bí m-tundin
ní á dāá yūĺ m-nimbiin.
A yaa ŋūǹ kí lì tibɔti tin cáá kudapɔɔuee
kí yàntī tibɔfanee,
m làá fàtīí dū-si kí kpántí kii m-nyɔkɔee.
An sá Juuda yab nín fàtīí gítiń a-cee,
an kaa sá sii di làá fàtīí gítí bi-cee.
20 Binib nee nimbiinee, m làá dū-si kí kpántí
kii tasa kúti gundi din yú ki pɔ̄ɔ̄ kaa cìŋkēe ní.
Bi làá jáǹ-si, ama baa làá ŋmā kí ŋá-si tiba,
di sá yii m làá nīn bí a-cee kí fīī-si,
ní kí gbìntī-si kí líí.
Man ni-Dindaan di lī míǹ.
21 M làá fīī-si kí nyāntí bitɔŋfitiibi ŋaan,
m làá fōō-si bin dàkà tipɔmbɔtee ŋaan kí líí.»