Yeereemii 23

Bikpootiliibi bikpitib nì ubɔti ufiil

1 Ti-Dindaan bí yii: «Mbusu dɔ̄ ki cí m-nibul kpootiliibi bin bí kii bipikpaaliibi bikpitibee. Bi féeń m-piii ní ki gbáà ki yàantí-i.» 2 An pu ní ti-Dindaan Isirayeel Nimbɔtiu bíi sòon̄ bipikpaaliibi gbanti pu yii: «Ni yāntì m-piii wáŋkì ki yàl̄. Naa kpēē-i tiŋan. Too, mama m-ba làá kpèè ni-bɔti nì ni-tuŋkpitiŋ bɔti, man ni-Dindaan di lī míǹ.

3 «Míǹ boonee, mama m-ba làá kóoǹ m-piii in kíǹ ki yàl̄ ki bí ntimu mun kɔkɔ poon m jìn̄-bi ki kɔ́ǹee kí kpāfì. M làá fàtīí gíiǹní-i i-pikpaapɔɔkun. Niinee, i làá bùtī kí wíiǹ. 4 M làá tīī-i bipikpaamɔntiibi bin làá kpàà-iee. Niinee, iaa ti làá fàŋkì, kaa ti làá nyɔ̀ ŋkpatim, ní báà ubɔ kaa ti làá wāŋkì, ti-Dindaan di lī míǹ.»

5 Ti-Dindaan bí yii:

«Iwiin bí ki dòoń

m làá yàntī bí màal̀ Daafiidi jipɔɔn tiŋman pu yɔu.

U làá dū dinyil ní kí jī dibeel.

U làá yàntī bí nīn tɔ́ mbaamɔn saŋŋu

nì tin bí deedeeyee kitiŋ nee pu.

6 U-yuntiŋuee, Juuda beel làá ká difiil

ní Isirayeel yab ń nīn bí ŋgbansɔŋfin.

Bi làá dāá nīn yíì-u yii:

<Ti-Dindaan di sá ti-baamɔŋŋu.>

7 «An pu ní ti-Dindaan sòon̄ yii, ŋwiin bí ki dòoń baa làá dāá gíti lì yii: <M pūtì ti-Dindaan un bí dimaŋfalin ki nyántìń Isirayeel yab kuyuŋun Eejipiti tiŋkinee!>, 8 ama bi làá dāá lì: <Nì ti-Dindaan un bí dimaŋfalin, ki nyántìń Isirayeel yab kitiŋ kin bí ŋgan púee nì ntimu mun kɔkɔ poon u nìn jìn̄-bi ki kɔ́ǹ bi fātìi gítìń ki kíǹ ki kóò bi-tiŋkinee pu.>»

Unimbɔti bɔnaatiliibi bin kaa bàà máaǹ kí nīn sée

9 Ti-Dindaan nín sòon̄ u-bɔnaatiliibi pu puee sèé:

M-pɔbil bíil̀

m-wunti kɔkɔ jìkì.

M bí kii udanyɔgbilee,

a lì kii unil un nyùn̄ ndaam ki bál̀ee.

An sá ti-Dindaan circir Nimbɔtiu

nì tin u sòon̄ nì mee pu.

10 U bí yii: «Kitiŋ nee poonee, binib kɔkɔ sá bilaakpaadambi ní.

Bi-kɔkɔ sáń ki cá tikpitil laŋki ní,

bi cáá tininjati kí ŋá tin kaa ŋān̄ee.

Mbusu ubɔ puee, kitiŋ nee kā dikpool.

Kitiŋ nee naakpaapɔɔku kɔkɔ kūń nyíki nyiki.»

11 Ti-Dindaan bí yii:

«M-bɔnaatiliibi nì bisaraaŋaliibi mun sá bikpitib ní.

Áli gba m kāntí bi-tuŋkpitiŋ m-Diikun.

12 Míǹ puee bi-saŋŋu ń kpántí dijɔnjɔndi.

Bí wāŋkì dibɔmbɔndin kí lítí.

M làá cáań nnaabu kí tɔ̄ bi-pu

dibindi din bi làá dāá sòoǹ bi-nyɔkɔpu yayee.»

Samaarii bɔnaatiliibi sɔ́ǹ Jeerusaleem yab

13 Samaarii bɔnaatiliibi ceeyee,

m ká tiwan tin cáá titantanee.

Diwaal Baal bɔti ní bi nìn nàatī,

ní ki gáatí m-nibul Isirayeel yab.

14 Ama tin m ká Unimbɔti bɔnaatiliibi

bin bí Jeerusaleemee ceeyee

di sá ntimbiil bɔti.

Bi ŋáań tilaakpaal,

ki mɔ́ntí inyimɔn,

ki tìì bikpitiŋaliibi kunyannyaau,

an yāntì báà ubɔ kaa ti ŋūǹ kí fá u-kpitii.

Bi-kɔkɔ bí m-cee kii Soodoom yabee ní.

Jeerusaleem yab náań nì Goomoora yab ní.

15 An pu ní ti-Dindaan Mpɔŋkɔdaan

sòon̄ u-bɔnaatiliibi pu yii:

«M làá tīī-bi kisubiki kin tūee bí ŋmɔ́,

kí tīī-bi nnyim min cáá ndabiimee bí nyɔ̀.

Di sá yii Unimbɔti bɔnaatiliibi bin bí Jeerusaleemee

cee ní ikpiti nyánní ki tīntì kitiŋ nee kɔkɔ.»

16 Ti-Dindaan Mpɔŋkɔdaan bí yii:

«Ní taa pīlifì tibɔti tin

Unimbɔti bɔnaatiliibi sòoǹee,

bi mɔ́ntí-ni ní.

Bíǹ bi-ba di nāantí tin bi sòoǹee,

taa nyánní man ni-Dindaan nyɔkɔn.»

17 Bi lì bin kpèé-mi fámee cee yii:

<Ti-Dindaan sòon̄ yii ni làá ká ŋgbansɔŋfi.>

Bi tùkù bipɔɔgbifindambi yii:

«Nnaabu ŋubɔ kaa làá bàń-ni.»

18 Di sá yii ŋma di cūtì

laakin man ni-Dindaan kàal̀

ki lèekī ilandɔkɔee?

Ŋma di ká m-bɔti ki gbìl̄-tì?

Ŋma di fōotì ki yīkiǹ m-nyɔɔbundi ki gbìl̄ di-taapu.

Yeereemii

19 Ti-Dindaan buŋkpaaŋku dòoń,

u-ŋuul làá pōō.

Kunaakpaabuŋkpaaŋŋu kubɔ bíi jītí,

ku bí binikpitib yiliŋ pu ki màntī.

20 Ti-Dindaan yaa kaa ŋá u nín lēē kí ŋá puee,

u-ŋuul kpá kí sɔ̀ŋkì.

Boon kpataaayee, ni làá dāá gbìl̄ taapu.

ti-Dindaan

21 Unimbɔti bɔnaatiliibi gbantee,

maa tú-bi, ama ní bi sáń ki cá.

Maa sòon̄ nì bi, ama ní bi bí ki nàatī m-bɔti.

22 Bi yaa bàà nìn bí laakin

m kāl̀ ki lēē ilandɔkɔee,

bi bàà sòoǹ nì m-nibul bí béé m-bɔti.

Bi bàà nyāntí binib bi-bimbikpitim poon,

nì ikpiti in bi ŋáańee poon.

Ti-Dindaan bí duulinya kɔkɔn

23 Ti-Dindaan bí yii:

«M sá bin bí kɔŋkɔmee baba Nimbɔtiu níii?

Maa sá bin bí ndanee mun Nimbɔtiuaaa?

24 Unil ŋūǹ kí báĺ laaba ḿ taa wāl̀-uaaa?

Man ni-Dindaan di lī míǹ.

Naa nyí yii m gbí kutagbɔŋu nì kitiŋ kɔkɔɔɔ?»

Man ni-Dindaan di lī míǹ.

Idi nì tifin kaa sá ubaanti

25 Man ni-Dindaan, m gbìl̄ tin m-bɔnaatiliibi sòoǹee. Bi lì yii bi sòoǹ m-yindi pu ní, ama an kaa sá míǹ. Bi lì yii: <M dámintì kudamintiiu kubɔ, m dámintì kudamintiiu kubɔ.> 26 Kí tin cáá sāā ŋyunti ŋulɔŋu dee? Ba di kalin kā bibɔnaatiliibi gbanti yiliŋin ní bi nàatī tinyimɔmbɔti ní? An sá bibɔnaatiliibi bin di nāantí tibɔti bi-ba ki nàatēe ní. 27 Nì bi-damintiiti tin bi cáa sòoǹ tɔb ceeyee, bi dàkafī yii m-nibul làá súntí m-pu, kii bi-naanjab nín nìn dī diwaal Baal pu ki súntì m-pu puee ní. 28 Unimbɔti bɔnaatiliu kansikin un yaa dámintèe ń sòoǹ tin u kée. Ama un fōō m-nyɔɔbundee ń nàatī-dì deedee!

Idi nì tifin kaa sá ubaanti.

Ti-Dindaan di lī míǹ.

29 Ti-Dindaan bí yii:

M-bɔti sá kii ŋŋmee ní,

a lì kii dikújal din bi cáa wìil̄ ditaŋkpakpaandee ní.

30 «Ti-Dindaan bí yii: <M làá jáǹ bibɔnaatiliibi bin di yòontí tɔb bɔti ki cáa nàatī yii an sá m-bɔtee. 31 M làá jáǹ bibɔnaatiliibi bin di cáá bíǹ bi-ba bɔti ki nàatī yii an sá m-yatee, ti-Dindaan di lī míǹ.> 32 Ti-Dindaan bí yii: <M làá jáǹ-bi. Bi-damintiiti sá tinyimɔmbɔti ní. Bi yaa sòoǹ bi-damintiiti gbanti puee, bi cáá tinyimɔmbɔti nì nyɔɔmálmal ki kíiĺ m-nibul. Man kaa tú-bi, kaa dū dinyɔɔbundi diba ki ŋúbíǹ-bi. Baa pée ŋūǹ kí kèetī m-nibul tiba poon, ti-Dindaan di lī míǹ.>»

Unimbɔti nyɔɔbundi sá diwaŋgulaaa?

33 Ti-Dindaan bí Yeereemii yii: «Dinibul nee niliu ubɔ, àá Unimbɔti bɔnaatiliu ubɔ àá usaraaŋal ubɔ yaa bālifì-si yii: <Ti-Dindaan nyɔɔbundi sá dilal? Diwaŋgul dilal ní u làá tí túń-ti ní?> Á kíí-bi yii: <Ti-Dindaan bí yii nimbi di sá diwaŋgul, ní m làá túutí-ni kí fá kí wàatī m-ba, ti-Dindaan di lī míǹ.> 34 M-nibul niliu ubɔ àá m-bɔnaatiliu ubɔ àá usaraaŋal ubɔ di yaa lī yii: <Ti-Dindaan di túǹ-mi diwaŋgulee,> m làá dáaĺ udaan nì u-dicaŋku tafal. 35 Ni máaǹ ki bàlifì tɔb yii: <Ti-Dindaan kíí-ti yii ba ní? Ti-Dindaan bí yii ba ní.> 36 Ama ní taa ti sòoǹ yii ti-Dindaan túǹ-ti diwaŋgul dilal ní? Mimmee ti-Dindaan nyɔɔbundi sá diwaŋgulaaa? Ni yaa bíi lì mimmee ni bíi kpántí ti-Dindaan Unimbɔti Mpɔŋkɔdaan un bí dimaŋfalinee bɔti taapu dee. 37 Kpèè tin a máaǹ kí bàlifì Unimbɔti bɔnaatiliuee sèé: <Ti-Dindaan kíí-si yii bá ní? Ti-Dindaan tùkū-si yii ba ní?> 38 Ama ni yaa gbíntìi lì yii ti-Dindaan túǹ-ti diwaŋgulee, min kamaa ti-Dindaan bí yii ní taa ti lì mimmee, man ni-Dindaan nín lī puee sɔ̀. 39 M làá yòon̄-ni kí túń kí cáá ni nì ni-tiŋki kin m nìn tīī ni-naanjabee kí tɔ̄ kí fá ndandati. 40 M làá yàntī icoo ń cúú-ni kí nīn cáa cá jaanjaan, ní ní fá ni-jilmau kí nīn cá abin abin. Unil dāa pée kpá kí súntí.»