Unimbɔti un bí dimaŋfalinee làá kúntí awaa
«Ní taa nín̄ túŋkíǹ atimbun ŋin kíǹee!
Ní taa fàŋkì tidaandi tin nyēē
ki pāantí kutagbɔŋu puee.
Atimbun ŋin kíǹee di fàŋkí an wanti.
3 Di sá yii anibul ŋin kíǹee koobiliŋ kaa bí tiban!
Bi gà ndɔ kubambaŋŋun,
ní ukpiŋkpiiti ń dū kicɔkɔ kí kpítí diwaal.
4 U dù animbil kúti nì sindaariya kí nyɔ̀kɔntì-dì,
ní kí dū dikújal nì mpiin kí kpáá-dì kí nákań,
dí nīn pɔ̄ɔ̄ kí taa nín̄ cìŋkī.
5 Awaa gbanti náań nì tiwan tin bi sākaǹ
diputaajul kpaabun ki fàantí inoonee ní.
Awaa gbanti kaa sòoǹ.
Bi tūntí-ŋi ní,
di sá yii ŋaa ŋūǹ kí còom̀.
Taa fàŋkìmaan-ŋi,
di sá yii ŋaa ŋūǹ kí ŋá tikpitilaaa, kaa ŋūǹ kí ŋá tiŋan mun.»
6 Sii, ti-Dindaan, ubɔ kaa bí kii siiyee!
A sá ukpaan,
ní a-yindi sá dikpaandi ki cáá mpɔn.
7 Ŋma di kaa fàŋkí sii atimbun bɔtiu?
Kun puee sii ní bi máaǹ kí fàŋkì.
Di sá yii duulinya ciŋfitiibi kansikin,
nì abee kɔkɔ poonee, ubɔ kaa bí kii siiyeea.
8 Bi-kɔkɔ nín bí pu nee, ugàntil kpá,
bi sá bigbaambi kaa nyí tiba.
Bi-waaŋi kaa ŋūǹ kí dàkà-bi tiba,
di sá yii ŋì sá idɔ ní.
9 Ukpiŋkpiiti di kpítì-ŋi,
ní ukúduntil dūu tikúti ki dūntì ki nyūntì-ŋi
ní ki dū animbil kúti tin nyánní Taarsiisi tiŋkinee,
nì sindaariya un nyánní Ufasi tiŋkinee ki nyɔ̄kɔntì-ŋi.
Míǹ boonee ní bi dū iŋaaman cínciŋ nì in máǹ wèeeeyee
ki ŋáĺ dibɔkutil ki pēeǹ-ŋi.
Bin nyí iŋal pu tundi tiŋanee di mɔ́ɔ̀ an wanti.
10 Ama ti-Dindaan di sá Unimbɔti tiŋman pu yɔu.
U sá Unimbɔti un bí dimaŋfalinee,
ki sá ubɔti kí nīn cá jaanjaan.
U yaa fōō diŋuulee, kitiŋ cìŋkī ní,
ní atimbun kaa ŋūǹ kí yūĺ u-bum nimbiin.
11 Kpèè ni nín làá sòoǹ nì bi puee sèé:
Bi máaǹ kí kúntí awaa ŋin kaa náań yilpu nì taapuee,
ŋi máaǹ kí wāŋkì kutagbɔŋu taapu.
12 Ti-Dindaan di dū u-pɔŋŋu ki ŋá kitiŋ,
ki dū u-ciiŋŋu ki náań duulinya,
ki dū u-nyil ki kpátì kutagbɔŋu ki dāntì.
13 U yaa téeńee,
inyiŋfi kōontí ní kí kpāfì kutagbɔŋu pu.
U yàntī atagbaŋkpaan ń nyānní kitiŋ gbeennyɔkɔ kí jɔ̄m̀.
U yàntī utaa ń ŋmɔ́ kí cáań utaa,
ní ki nyāntiń kubuŋu ku-walimbookun.
14 Binib kɔkɔ bākatì sèee,
kaa ti nyí tin poon bi bée.
Awaa ŋin bikúduntiliibi mɔ́ɔ́yee cáá-bi icoo.
Awaa gbanti sá tinyimɔmbɔti ní.
Ŋaa cáá kufoou.
15 Ŋì sá tiwan tin kaa bí tibanee,
ki mɔ̄ tilaal.
Ŋwiin ŋun ti-Dindaan làá yīkì ŋi-puee,
ŋì làá wāŋkì ní.
16 Ama Unimbɔti un sá Jaakɔb gaajawantee,
kaa bí kii ŋíǹ nín bí puee.
Jaakɔb Nimbɔtiu di náań duulinya kɔkɔ,
ní Isirayeel naakooku sá u-fakal.
U-yindi di sá ti-Dindaan Mpɔŋkɔdaan.
Nnaabu tóobiń
17 Jeerusaleem, sii un bi māntìi túee,
kóoǹ a-waŋguliŋ ŋin dɔ̄ kitiŋee!
18 Ti-Dindaan nín lī puee sèé:
«Min bí nee, m làá dū kitiŋ nee nib
kí tɔ̄ ndan kii kujaataafuŋ taŋkpalee.
M làá cáań dinimbinaamandi kí tɔ̄ bi-pu
áli ubɔ ń taa ŋmátí.»
19 Ba busuu dee! Nnaabu ŋulɔŋu ŋúǹ dee!,
Tiweendi tin m fōōyee kaa cáá dicáaǹdi!
M lī m-ban yii:
«An kaa páb́,
m làá ŋmā kí túń m-gìńdi.
20 Bi nāaǹ m-tantiu, u-ŋmiii kɔkɔ tīfì.
M-biyaamu yíkì-mi, muaa ti bí.
Ubɔ kaa ti bí kí cóoń m-tantiu,
kí ŋāŋkì m-kɔŋkooŋŋu.»
21 Tin yì-tèe di sá yii bikpootiliibi ŋá digbaandi.
Baa nyàab̄ ti-Dindaan.
An pu ní an kaa bútì-bi,
ní bin bi nìn kpòotēe yàl̄ an kɔkɔ pu.
22 Ti gbìl̄ kuwoou kubɔ pu, ku tóobiń.
Kukunsaŋu kubɔ nyánní ŋgan pú tiŋkin.
Ku làá yàntī Juuda tiŋki ń kpántí kuteeu,
laakin sinsiŋkub làá nīn kóòyee.
Unimbɔti bɔnaatiliu wimmeem
23 M-Dindaan, m nyí yii,
unil kaa yì u-ba.
Unil un còom̄ee kaa ŋūǹ
kí kpòotī u-ba.
24 Dáaĺ m-tafal,
ama á taa lákatí marab pu.
Taa fōō diŋuul, an yaa sá fám, a làá nàan̄-mi.
25 Kpáatí a-ŋuul kí sìtī
atimbun ŋin kaa nyí-see pu,
kí sìtī anibul ŋin kaa jáaḿ-see pu.
Kun puee bi tɔ̄ntì a-nibul Jaakɔb naantiibi,
bi fúkúl̀-bi ki púntì-bi,
ní ki nāaǹ bi-tiŋkib.