Ibaamɔn dóò
9
1 M bàà là kí nīn bí kuteeunlaakin bisaŋkinliibi túutée!
M bàà làá dū m-nibul nee kí fá
kí cùú nīn bí niin ki dátiǹ-bi.
Di sá bi-kɔkɔ sá bilaakpaadambi,
ki nyēē binib boon.
2 Ti-Dindaan bí yii:
«Bi-limbiliŋ bí kii butɔbu bun bi dáaĺee ní.
Bi dū nnyimɔn ní ki jíń dibeel kitiŋ pu,
kaa sá mbaamɔn.
Bi ŋáań ikpiti ní kaa gbèentí,
ama baa nyí-mi.
3 Báà ŋma ń nīn nyí nì u-ba nì u-bɔɔ.
Ubɔ ń taa nín̄ máká u-nabiki pu,
di sá yii kì ŋūǹ kí kīil̀-u
ní ubɔɔti mun ŋūǹ kí kūŋfì u-boon.
4 Báà ŋma kíiĺ u-juti,
ubɔ kaa sòoǹ ibaamɔn.
Bi mántì kí nīn mɔ́ntí.
Bi-tuŋkpitiŋ puee
baa ti ŋūǹ kí gítiń m-cee.»
5 Ti-Dindaan bí yii:
Bi ŋáań tipɔmbɔti kaa gbèentí,
ki mɔ́ntí inyimɔn ki bùsī.
Bi yíití kaa là kí béé-mi.
6 An pu ní ti-Dindaan Mpɔŋkɔdaan bí yii:
«M làá dū-bi kí ŋá ŋŋmin kí ŋá-bi circir,
ní kí cɔ̄ŋkì-bi kí kpèè.
Ba ní m gíti ŋūǹ kí ŋá nì
m-nibul nee kpitii?»
7 Bi-limbiliŋ bí kii nlɔpiinee ní,
tinyimɔmbɔti ŋma di nyēē bi-nyɔmmun.
Bi-nyunculiŋ pu ní bi sòoǹ nì bi-juti yii
ŋgbansɔŋfi ń nīn bí u-cee,
ama ní bi-pɔbiliŋ poonee,
bi pīil̀ udaan kutaliŋŋu.
8 Ti-Dindaan bí yii:
«Kii tin bí nee kɔkɔ puee,
m taa dáaĺ bi-tafalaaa?
M taa tɔ̀ ditimbundi
din bí kii di neeyee ipɔntoonaaa?»
Nsiim nì iyaliŋki yuntiŋu
9 M bí ajoon pu ki sūǹ ki yáliŋkí,
m bí ki gà kunaakpaapɔɔu ikpiisilan.
Baa ti gbìl̀ tiwaŋkuti siim pu.
Inoon nì tiwaŋkuti kɔkɔ sáǹ. Báà tiba kaa ti bí.
10 M làá yàntī Jeerusaleem ń kpántí ataŋkpakpuku,
laakin sinsiŋkub làá nīn kóòyee,
ní kí yàntī Juuda timmu
ń kpántí kuteeu,
laakin binib kaa làá nīn gíti kóòyee.
11 Unil ubɔ bí ki cáá iciin
ki ŋūǹ kí gbìl̄ tibɔti nee taapuɔɔɔ?
Ti-Dindaan yaa sòon̄ nì udaanee,
ú tùkū-ti kun pu ní bi nāaǹ kitiŋ nee,
ki wùn̄-kì ŋŋmi kì kpántì kii kuteeu
ubɔ kaa ti jītí niinee.
12 Ti-Dindaan bí yii: «Kun pu tin bí nee bāań-bee di sá yii bi dū marab bin m tīī-bee ki fá. Baa pílifiǹ-mi kaa nóó-mi.» 13 Ama bi nóó bíǹ bi-ba landɔkɔi ní. Bi-baabi nìn dàkā-bi awaa ŋin bi yíì Baalee, ní awaa gbanti ní bi nóó. 14 Too, ti-Dindaan Mpɔŋkɔdaan, Isirayeel yab Nimbɔtiu bí yii: M làá tīī kisubiki kin tū ki cáá tiloolee bí ŋmɔ́, ní kí tīī-bi nnyim min cáá ndabiimee bí nyɔ̀. 15 M làá jà-bi bí yàl̄ kí kɔ́ atimbun ŋin bíǹ bi-ba kaa nyáaa, bi-naanjab mun kaa nìn nyée poon. M làá dū ajanjakiti kí páań bi-boon, ŋí kpɔ̀ kí céetí-bi. 16 Ti-Dindaan Mpɔŋkɔdaan bí yii:
Isirayeel nibul
«Bɔ́ntímaan kí yíiń binimpoobi bin sūǹee
bí dāan̄ kí sɔ̄.
Ní nyàab̀ bimɔmmɔntiibi!
17 Bí yáb́ malaa.
Bí gāā-ti ikpiisilan!
Nnyinnyim ń gbí ti-nimbiliŋin.
Ti-niŋgbunti ń díkí nnyinnyim ń nīn pùub̀!»
Yeereemii
18 Ti gbìl̄ Siiyɔn pú ikpiisilan pu.
Bi nāaǹ-ti!
«Ba cooi bulifi poon ní ti bí na!
Ti làá yīkì kí fá ti-tiŋki,
di sá yii bi kpéelikì ti-diiŋŋi.»
19 Nimbi binimpoobee, pīlifìmaan
ti-Dindaan nyɔɔbundi nee.
Ní ŋátí ni-tafal kí pīlifì u-nyɔɔbundi!
Ní dàkà ni-bisalib ŋkpiisilan nee,
báà ŋma ń dàkà u-kɔŋkɔnnaatɔ
iyaliŋki laŋŋu nee:
20 «Di sá yii ŋkúm dàb̄ ti-tɔkɔlab ki kɔ́ ti-pu,
mì kɔ́ ti-dinyaaŋŋin.
Mì yōoǹ ti-biyaamu adan pu,
ki yōoǹ binipɔmbi sampaambi pu.»
ti-Dindaan
21 «Sii Yeereemii, gíti sòoǹ tin ti-Dindaan lēe yii:
<Anikpil dɔ̄ kitiŋ fìlfil
kii tinaabin ní bi bíl̀ kusaaunee.
Ŋi náań nì idifin in bicaliibi cáń ki bíl̀
ubɔ kaa pá bi-boon ki kōontée.>»
Iciin in sá tiŋman pu yayee
22 Ti-Dindaan nín sòon̄ puee sèé:
«Uciŋfiti ń taa nín̄ yòontí u-ba u-ciiŋyi pu.
Upɔndaan ń taa nín̄ yòontí u-ba u-pɔŋŋu pu.
Ugaaja ń taa nín̄ yòontí u-ba u-gaajati pu.
23 Ama ubɔ yaa làá yòon̄ u-ba yilpuee,
án nīn sá u nín ká dinyil ki béè-mee pu.
Di sá yii man ni-Dindaanee,
m cáá disaasɔl
ní ki ŋáań tin dɔ̄ nsan ki bí deedeeyee kitiŋ pu.
Tíǹ di fáatì-mi.»
Ti-Dindaan di lī míǹa.
Bin kaa gíí dikpancandi tiŋman pu yalee
24 Ti-Dindaan bí yii: «Ŋwiin ŋubɔ dòoń m làá tāā kí bīikì bin gíí dikpancandi ŋwuŋgban pu gíitamee pu, 25 an dàkà yii Eejipiti yab nì Juuda yab nì Eedoom yab nì Amɔn yab nì Moowaab yab nì bin kɔkɔ kòol̄ bi-gatikii ki kóò kuteeunee. Di sá yii anibul gbanti kɔkɔ kaa gíí tiŋman pu gíitam, ní Isirayeel yab bi-ba kaa gíí bi-pɔbiliŋ.»