Yeereemii 11

Unimbɔti nibul nyáń u-pèéŋu boon

1 Ti-Dindaan sòon̄ nì Yeereemii yii: 2 «Ní nīn tɔ́ mpèé ŋun bí man nì ni kansikinee.» Ní u kútì ki lī yii: «Á sòoǹ nì Juuda nì Jeerusaleem yab. 3 Á tùkù-bi yii: Ti-Dindaan Isirayeel Nimbɔtiu nín sòon̄ puee sɔ̀. Mbusu dɔ̄ ki cí unil un kaa tɔ́ mpèé nee nyɔɔbuŋŋee! 4 M nìn nyántì ni-naanjab Eejipiti tiŋkin, kipaai ŋmiŋun. Ŋyunti gbanti ní man nì bi nìn ŋá mpèé nee. M nìn bí-bi yii: <Ní pīlifì m-nyɔkɔ kí ŋá tin kɔkɔ m bí yii ní ŋée. Niinee, ni làá nīn sá m-nibul, ní ma mun ń nīn sá ni-Nimbɔtiu.> 5 Niinee, m làá ŋá m nín nìn pōoǹ ni-naanjab puee kí tīī-bi. M nìn pōoǹ-bi yii m làá dū kitiŋ kin poon nnaabiim nì tisiil còol̀ee kí tīī-bi. Kitiŋ gbanti poon ní ni bí díǹ nee.»

Ní m kíí yii: «An sá míǹ ní ti-Dindaan.»

6 Ní ti-Dindaan bí-mi yii:

«Dū an bɔti gbanti kɔkɔ kí bāakì Juuda timmu nì Jeerusaleem daŋŋi pu yii: <Ní pīlifìmaan mpèé nee bɔti, kí ŋá tì nín bí yii ní ŋá puee. 7 M nín nìn nyántì ni-naanjab Eejipiti tiŋkin ki dāa sāā díǹ nee, m nìn pée kpáafí-bi ní kaa gbèentí, kii m nín bíi kpáafí ni mun díǹ pu nee ní. M lì ki bùsī yii bí pīlifì m-nyɔkɔ. 8 Ama baa pílifàaa, kaa fātìi tɔ́. Bi-landɔkɔkpitii ní bi nóó. Niinee ní m yāntì agìń ŋin m nìn tùkū-bi yii bi yaa kaa ŋúb́ mpèé nee bɔti bi làá kée, bāań-bi.>»

9 Boonee ní ti-Dindaan gíti bí-mi yii: «Juuda nì Jeerusaleem yab ŋá kinyɔkɔ kí já nì mi. 10 Bi fātìi gítì ikpiti in bi-naanjab bin nìn yíì kaa pílifì m-bɔtee nìn ŋée pu. Bi nóó awaa ki tòotī-ŋi. Isirayeel nì Juuda yab bíil̀ mpèé ŋun nìn bí man nì bi-naanjab kansikinee.

11 «Too, an pu ní ti-Dindaan bí yii: <M làá cáań nnaabu ŋubɔ kí tɔ̄ bi-pu, ní baa làá ŋmā kí ŋmátí. Bi làá dāá kúuǹ kí yíiń-mi ḿ jòò-bi, ama maa làá dāá pīlifiǹ-bi. 12 Juuda yab nì Jeerusaleem yab làá dāá cù kí mèè bi-waaŋi ŋin bi cá ki tùutī talaalub ki tììyee, ama ŋaa làá dāá ŋmā kí fīī-bi nnaabu yuntiŋu gbantin. 13 Juuda yab timmu nín wīikí puee, míǹ ní bi-waaŋi mun wīikí. Jeerusaleem daŋŋi nín wīikí puee, míǹ ní ki-saraafaŋyi mun wīikí. Bi tùutī i-pu saraabi ki tìì diwaal Baal din sá-bi icooyee.> 14 Sii Yeereemii, á taa pée mèè dinibul nee pu. Á taa sɔ̄ di-pu, kí taa gbàam̀ di-pu. Di sá yii dinimbinaamandi yuntiŋu poonee, bi làá dāá mèè-mi, ama maa làá dāá pīlifiǹ-bi.»

Ti-Dindaan làá gāā ɔliifi subu kí lúkú

15 «Ba ní dinibul din m néeńee nib

dòoń kí ŋá m-Diikun ní?

Bi ŋá bi-landɔkɔkpitii nín sá puee.

Bi dàkafī yii ipoon nì tiwaŋkuti tin bi cáa ŋáań-mi saraayee

ŋūǹ kí kpàà bi-naabuŋu kí cùnnì ndan kí wàatī-bi ní.

Mimmee míǹ ní bi làá ŋá kí ŋmátáaa?

16 M nìn pú-bi diyindi yii:

<Ɔliifi subu bun faati pée sɔ̀m̀ bu-biliŋ ŋān̄ee ní.>

Ama dibintiŋkpaandi poonee,

m gāā ŋŋmi ki tūū bu-faati

ní bu-paŋŋi wáŋkì.»

17 An sá ti-Dindaan Mpɔŋkɔdaan di cóoǹ-si. Ama kɔŋkɔnnee, u bíi tùkù-si yii u làá cáań nnaabu kí tɔ̄ a-pu Isirayeel nì Juuda yab kpitii pu. Di sá yii bi tūutì talaalub ki tīī diwaal Baal ki gbítì ti-Dindaan ŋuul.

Yeereemii dicaŋkun yab nyáń u-pu

18 Ti-Dindaan lēē ki dàkā-mi, ní m béè tin m-nannanliibi bíi búkù m-puee. 19 Mamee, m nìn bí kii dipibil din pɔ̀fì bi cáǹ-dì kí kpɔ̀ee ní. Maa nìn nyí tin bi nìn bíi bɔ́ntí m-puee. Bi nìn lì yii: «Tí gāā busubu bun dáá sɔ̀m̀ee kí lúkú. Tí lēē-u binifoobi tiŋkin bí taa ti téetí u-yindi pu.»

20 Ti-Dindaan Mpɔŋkɔdaan,

a sòoǹ tibɔti nì deedee ní.

Sii di nyí unil pɔbilin nì u-landɔkɔi^a.

M dū m-ba ki líiǹ-si á sòoǹ m-bɔti kí tīī-mi.

Niinee ní ḿ ká a nín làá pɔ̀-mi puee.

21 Too, ti-Dindaan nín sòon̄ nì Anatooti yab bin là kí kpɔ̀-see puee sèé. Bi lì yii: «Taa ti nàatī Unimbɔti bɔti ti-Dindaan yindi pu, an yaa kaa sá míǹ, ti làá kpɔ̀-si.» 22 Too, ti-Dindaan Mpɔŋkɔdaan nín sòon̄ puee sèé: «M làá tāā kí bīikì bi-pu. Bi làá kpɔ̀ bi-nipɔmbi kujaaun, ní bi-jipɔmbi nì bi-bisalib ń kpú ŋkùm. 23 Dibindi din m làá tāā kí bīikì Anatooti yab pu kí cáań nnaabu kí tɔ̄ bi-puee, báà uniseen kaa làá ŋmátí.»