27
1 Taa nín̄ pàkà a-ba fool wiiŋŋu pu, di sá yii saa nyí tin làá jītí díǹ wiiŋŋueea.2 Yàntī ubɔ ń pàkà-si, taa pàkà a-ba, yà unicaan ń pàkà-si, án taa nín̄ sá sisi a-ba!
3 Ditaŋkpal nì dibul nyìm̀ tikpil, ama ugbaan ŋuul nyìm̀ nì tiwan liitil gbanti.
4 Mbum ŋáań tipɔmbɔti ní diŋuul bí kii mbun ŋun gbée, ama ŋma ŋūǹ kí yūĺ ipoompoon íǹ nimbiin?
5 Á wòoǹ unil mpaampiin pu sɔ́ nì á nīn néeń-u dibalin ubɔ kaa wāĺ.
6 A-bɔɔ yaa tīī-si tiweendee, án cáá dimákal, ama a-nannanliu yaa kpàl̄-see, á nīn nyíǹ a-ba.
7 Unil un jíń ki díkée yaa ká tisiilee, u yákafí ditaal ní, ama un ŋkùm cááyee ceeyee, tin tūee mɔ̄ ní.
8 Kii kinɔmbiki nín yìiǹ kí cù ndan kí fá ki-diiku puee, míǹ ní unil un yìiǹ kí cù ndan kí fá u-dicaŋkuee bí.
9 Ikpafi nì talaalub tìì unil pɔbil mmɔn, ama ní kubɔɔtiiu kun mɔ̄ee jítiǹ talaalumɔmmɔnti.
10 Taa fá a-bɔɔ, kí taa fá a-baa mun bɔɔ. Digìńdi yaa kɔ́-see, á taa cù a-nabiki cee. A-kɔŋkɔnnaatɔ un pìlīǹ-see sɔ́ǹ kinabiki kin bíń ndandatee.
11 M-biki, nín̄ cáá iciin kí tīī-mi dipɔɔpindi. Niinee ubɔ yaa bíi kpākantí-mee, ḿ ŋmā kí kíí-u.
12 Un nyíǹ u-bee yaa ká nnaabu dòońee, u sáń kí báĺ ní. Ama bin kaa nyí tibee cáǹ bi-ba kí tɔ̄ poon ní án píĺ-bi.
13 Ubɔ yaa yúl̀ unil un waa nyée boon kí pìnnì tibee, á fōō udaan bɔkutil kí yóoń, u nín yúl̀ unicaan boonee puee, á fōō u-cee toolima kí yóoń.
14 Unil yaa téeń ki jáam̀ u-juti mpɔn kutaafaau pɔ̀lpɔlee, udaan jaamii gbanti kpántí mbusu ní.
15 Utaa yaa bíi nì nnyim nín còol̀ kaa gúǹ puee, míǹ ní unimpu un néeń kujaauee bí. 16 Unil ń ŋmā kí cúú-uee bí kii u bíi cútí kubuŋuee ní, àá kii ŋkpam ní u bíi nyàab̀ kí dū u-ŋal kí cúúyee.
17 Tikúti ní bi cáa lòontí tikúti, unil nākantí u-juti ní kí cíkití.
18 Unil un kpèé u-fiigi subu tiŋanee làá dāá ŋmɔ́ bu-bil. Bi làá tīī utɔntɔnli un ŋúb́ u-kpiliu tiŋanee jilma.
19 Kii unil nín kpèé nnyimin kí wāl̀ u-ba puee, míǹ ní a kpèé unil nimbiin ní kí wāl̀ u-landɔkɔi nín sá puee.
20 Taapu taŋkpiil nì Mbookpaan kaa gbéè, míǹ ní unil nimbil kaa kpèé kí díkí.
21 Ŋŋmi ní bi cáa cɔ́ŋkí kí béé animbil kúti timɔntiil nì sindaariyamɔnti, ama bi nín pàkà unil puee di dàkà dinicil din ní u sée.
22 Báà a yaa dū ŋkuntudɔ ki sáń ugbaan kukuntuu poon kii bi nín cùkutī tijimpin puee, u-gbaandi kaa làá nyā u-ni.
23 Nín̄ nyí a-waŋkuti tiŋan, kí nīn kpèé a-picaŋkpunti tiŋan. 24 Di sá yii tigaajati kaa bí kí nīn cá jaanjaan kaa kúntí, míǹ ní dibeel kaa bí kí nīn cá abin abin. 25 Á gāā timool tisatin, ní timɔpɔn yaa bíi nyēēyee, á cù dijool pu kí kùliń timɔkulindi. 26 Kpàà ipii kí cā i-kuti kí dūú ŋáĺ tiwampeeŋkaal, ní kí kpàà iŋɔjaa kí nyāfì kí dā kitiŋ kí kpɔ̀ tikpaal. 27 Kpàà iŋɔsal tikpil kí ká ŋŋɔbiim kí kpíiǹ a-ba, kí kpáaǹ a-dicaŋkun yab nì a-tɔntɔnliibi binimpoobi.