Bigbaambi bɔti
26
1 Kii an nín kaa máaǹ ntaayim ń lítí dipeel pu, utaa ń nì ŋyunti ŋun bi cēē tikpaajinee, míǹ ní tinyool kaa máaǹ ugbaan.2 Kii udiyaal àá kikoosiyaakpaai nín yíkí ki ŋàaǹ puee, míǹ ní mbusu kaa lítí maanyiiba pu.
3 Utaamu máaǹ dinaalabil, ní kimaŋ máaǹ dikpàldi, ní ugbaan máaǹ ndɔ.
4 Ugbaan yaa bālifì tibɔti ŋgbaaŋyaamin, á taa kíí-u kii si mun sá ugbaanee. An yaa kaa sá míǹ, a làá kpántí ugbaan kii úŋ̀wuee ní. 5 Ugbaan yaa bālifì tibɔti ŋgbaaŋyaaminee, á kíí-u ŋgbaaŋyaamin, án nín làá ŋá pu ú taa dū u-ba ki yíiń uciinee.
6 Un yaa dū tibɔti ki ŋúbiǹ ugbaanee ŋá kii unil un gāā ki gūutì a-taaŋi àá un dáaĺ agìń ki tɔ́ u-ba puee ní.
7 Kii ufaliŋfaan taaŋi nín fáká puee, míǹ ní dilaŋkpandi fáká ki kā ugbaan nyɔkɔn.
8 Á tīī ugbaan jilmee bí kii á dū ditaŋkpal kí fúuń kujaataafuŋun kí bóob́ kí nákańee ní.
9 Kii udanyɔgbil nín ŋúb́ ikuŋkum u-ŋaan puee, míǹ ní dilaŋkpandi fáká ugbaan nyɔkɔn.
10 Ukpil un di fòol̄ ugbaan àá udanyɔgbil un jītée ditundee sá un ŋáań báà ŋma tiweendee ní.
11 Kii kibɔkɔ nín wùliŋkī kí fàtīí gíiǹ kí ŋmɔ́ pueea, míǹ ní ugbaan fàtīi gítí u-gbaandi pu.
12 A yaa tin ká unil yíì u-ba uciinee, a yaa pūtì máká ugbaan pu gba, an sɔ́.
Uwutijoodaan bɔti
13 Uwutijoodaan lì yii: «Upeecuncuti bí didandi pu! Gbikinti bí nsanni!»
14 Kii punuu nín màntī tikúti tin pu u sàkēe puee, min ní uwutijoodaan dɔ̄ u-dooŋu pu ki lábití.
15 Uwutijoodaan dùŋfī u-ŋal kí bɔ̄ disambilin, ama ní u-wutijool puee, an pɔ̄ɔ̄ ú fàtīí gíiǹní-ŋu u-nyɔkɔn.
16 Uwutijoodaan yíì u-ba uciin ki jítiǹ binib biluli bin kíikí tibɔti nì dinyilee.
Alaŋkpan aba mun sɔ̀
17 Unil un dù u-ba kí kɔ́ǹ kujaau kun kaa sá u-yɔkɔee poonee bí kii unil un là kí cúú kibɔkɔ ki dūu cúú ki-tafalee ní.
18 Kii unil un wáatèe nín tòó aŋmisaatee nì mpiin nì tiwan tin kùee puee, 19 míǹ ní unil un kíiĺ u-juti, ní boonee kí lì yii: «M ŋáań-si tinaacinee» bí.
20 Idɔ yaa wùn̄ ki kúntèe, ŋŋmi kpíì dee, míǹ ní usambiidaan yaa kaa ti bée, kujaau mun kúntì.
21 Akoon di tìì amɔsiŋkoon ní idɔ tìì aŋmilimbil, míǹ ní ubɔmbɔdaan nyàatī kujaau.
22 Ubɔmbɔtukul nyɔɔbuŋŋi sá tijin tin mɔ̄ee ní, tì kóò unil poon ní fíŋfiŋ.
23 Anyɔɔbummɔɔn ŋin nyēē dipɔɔkpitilinee bí kii animbil kúti tin cáá tijɔkɔndi bi dūu nákáǹ kuyɔkɔu sambil puee ní.
24 Unil un cáá kináŋee kaa sòoǹ kí dóó u-poon bɔti kɔkɔ, ama u-pɔbilinee, u bɔ́ntí tinyimɔmbɔti ní. 25 U yaa bíi sòoǹ nì si kinyɔɔmɔɔyee, taa fōō kí kíí, di sá yii u-pɔbilinee, tilandɔkɔkpiil di gbí. 26 U cáá nciin kí ŋmā kí bìin̄ u-náŋki pu, ama ŋwiinee u-tuŋkpitiŋ làá dāá nyā mpaampiin pu báà ŋma ń ká.
27 Unil un yaa gbìn̄ mbòóyee làá dāá lítí ŋu-poon, un yaa bíntí ditaŋkpalee, dì làá gítiń kí tàb̄-u ní.
28 Unil un mɔ́ntí u-jutiibee ná-bi ní ki ŋáań-bi tiweendi, ní un cáá nyɔɔmálmalee nàantí-bi.