25
1 Ubɔti Saloomɔn laŋkpaŋŋi aba gíti sèé. Juuda bɔtiu Eeseekiyaasi nib di ŋmàn̄-ŋi.Alaŋkpan aba mun
2 Unimbɔti nyooti di sá bí taa nín̄ gbìl̀ tin u ŋáańee taapu, bibɔtiibi nyooti di sá bí ŋmā kí lēē tin kɔkɔ binib ŋáańee taapu.
3 Taa nyí kutaa nín dátìń-ti puee, kaa nyí kitiŋ nín nyóò puee. Míǹ mbaantiim ní taa ŋūǹ kí béé tin kā bibɔtiibi pɔbiliŋinee.
4 A yaa lēē tijɔkɔndi tin bí animbil kúti puee, bi làá ŋmā kí dūú mɔ́ɔ́ tiwan tin cáá kunyaaŋŋuee.
5 Jà binikpitib kí nyāntí ubɔti cee, ní deedee ń tīī u-beel mpɔn.
6 Taa nín̄ yòontí a-ba ubɔti nimbiin, kí taa nín̄ fòol̄ binikpaambi paaŋŋu. 7 Di sá yii an sɔ́ ubɔti ń tùkù-si yii: «Jɔ̄mìń kí kāl̀ m-cee doo!» ki jítiǹ bí sìntīǹ-si taapu unikpaan ubɔ nimbiina.
8 Tin a-nimbil kée, taa jìkì kí lì-tì ni yaa bí ibɔsoonni. A-juti yaa kpákáǹ-si yii aa cáá ibaamɔn, a làá ŋá mana.
9 Sii nì a-juti yaa cáá tɔbee, ní kpèè kí ŋāŋkì, ama á taa dū tin ubɔ tùkū-si dibalinee kí māafì. 10 An yaa kaa sá míǹ, ubɔ ŋūǹ kí gbìl̄ ní kí kɔ́ǹ-si icoo, ní tin a sòon̄ee, aa ti ŋūǹ kí gítí boon.
11 Dinyɔɔbundi din nyáń ŋyunti ŋun máaǹee ŋān̄ kii sindaariya wanti tin bi dū animbil kúti ki nyɔ̄kɔntèe ní.
12 Unil un pílifíǹ uciŋfiti wooŋyee bí kii sindaariya bɔmbil nì sindaariyamɔnti léeŋkaatee ní.
13 Kii utaa nín nì kí sɔ̀ŋkì tikɔkɔ kutuntuŋu yuntiŋu puee, míǹ ní deedee tuuŋŋu sɔ̀ŋkī ŋu-kpiliu ŋun túń-ŋuee pɔbil.
14 Unil un pōoǹ kí pɔ̄ tiba ní kaa púee náań nì atagban nín lúntí, kubuŋu ń jītí utaa kaa nì puee ní.
15 Unil un cáá kimɔtii tikpilee ŋūǹ kí kpántí ubɔsoonli landɔkɔŋu, míǹ ní dilimbil din pɔ̀fèe ŋūǹ kí wīī dikpabil.
16 A yaa ká tisiilee, á taa ŋmɔ́ kí lákatí a-ba pu, an yaa kaa sá míǹ, án làá núutíǹ-si ní á wùliŋkì. 17 Taa nín̄ cá a-bɔɔ dumpu múlmul, an yaa kaa sá míǹ u-naŋki dāa nyēē-si, ní u kíǹ ki ná-si.
18 Unil un lēē u-juti pu nnyimɔn seerauee bí kii ditambɔndi àá kitàataajiki àá mpiin ŋun cɔ́m̀ líkí likee ní.
19 Dinimbinaamandi yuntiŋu un yaa dū u-mákal ki páaǹ un nyēē binib boonee puee bí kii unil un dù u-nyindi din cìŋkēe kí jú tiwan, àá un còom̄ u-taal din wùee puee ní.
20 Á gāā un bí kunimbaaunee dipɔɔpindi laŋyee bí kii a cúú u-bɔkutil ki pēetì tiwool yuntiŋu àá a dū ndaam min nyàm̀ee ki sītì mbuun puee ní.
21 Ŋkùm yaa cáá a-nannanliu, á tīī-u tijin ú jī, nnyinnyoo yaa tí cáá-u, á tīī-u nnyim ú nyɔ̀. 22 A yaa ŋá mimmee, an bí kii amɔsiŋkoon ní a cáa pāantí u-yil pueeb, ní ti-Dindaan ń dāá pà-si.
23 Kubuŋu kun nyēeń ŋgan púee cāabìń utaa, ní tinyimɔmbɔti kɔ̄ntí binib diŋuul.
24 An sɔ́ á nīn kóò digunlɔkɔlin ki jítiǹ si nì unimpu un néeń kujaauee ń nīn kóò.
25 Dinyɔɔbummɔɔndi din nyánní ndandatee bí kii nnyinsɔm min sɔ̀ŋkī nneenee ní.
26 Nnyimbul ŋun gbātèe àá dinyimbɔbil din nyim bíil̀ee sá kii deedeedaan un mátifí unikpiti nimbiinee ní.
27 An kaa ŋān̄ unil ń ŋmɔ́ tisiil tikpil, míǹ ní an kaa tí ŋān̄ unil ń nyàab̀ tinyool tikpil.
28 Kitiŋ kin dɔ̄ ki wāā fám kaa cáá digundi din māntì ki tú-kèe bí kii unil un gíí diŋuul kaa ŋūǹ kí cúú u-bee ní.