28
1 Báà ubɔ yaa kaa bíi jì unikpiti, u sáń ní. Ama deedeedaan úǹ cáá dipɔbil kii digbikintipɔmbilee ní.2 Binib yaa yíkì kaa kíí bi-ba pu kitiŋ kin poonee, bikpilib wīintí ní. Ama unil un cáá iciin nì dinyilee yaa bée, kitiŋ sɔ̀m̀ ní.
3 Upɔɔl un di cáá ntoom ní ki wɔ́b̀ binandambee bí kii utaa un nì ki bíiĺ tikpaajinee ní.
4 Binib bin féeń Unimbɔti marauee pàkà binikpitib ní, ama ní binib bin ŋúb́ Unimbɔti marauee jáà nì bi.
5 Binikpitib kaa gbìl̀ tin bí deedeeyee taapu, ama bin nyàab̀ ti-Dindaanee gbìl̀ tikɔkɔ taapu ní.
6 Unil un sá usoodaan ki còom̄ deedee saŋŋunee sɔ́ǹ unil un di sá ugaaja ki nóó isaŋkpitee.
7 Kibiki kin ŋúb́ Unimbɔti marauee sá unyil ní, ama un nōotí biyipɔɔdambee kɔ̄ntí u-baa ní icoo.
8 Unil un pìntí binib animbil kí dāá fōō kí páań kí kpántí ugaajee kōontí u-gaajati gbanti ki yōontí un sūǹ biwɔfib saayee ní.
9 Unil un yaa lēē u-tafal Unimbɔti maraunee, ti-Dindaan ná udaan wimmeem gba ní.
10 Un yaa kíil̀ deedeedambi ki tɔ́ nsaŋkpitinee làá dāá jēetí mbòó ŋun úǹ u-ba gbìn̄ee poon. Ama bibulcinnib làá dāá jī nnaam.
11 Ugaaja kā ki dàkafī yii úǹ di cáá iciin, ama usoodaan un cáá dinyilee nyí kun ní u sée.
12 Deedeedambi di yaa fōō mpɔnee,
an sá ifaal ní. Ama binikpitib yaa fōō mpɔnee, báà ŋma bāal̀ ní.
13 Unil un yaa cáá u-kpitii ki bāal̀ee, an kaa bútí-u. Ama unil un bìitī u-kpitii pu kí dū-i kí fée kāntí u-kpitii pɔ̄tam.
14 Unil un fàŋkí kí taa pée ŋá ikpitee bí mmɔnni, ama un yaa cáá mpɔɔgbifinee làá ká nnaabu.
15 Kii gbikinti nín sūǹ pu àá digbiŋgbil nín wúlìń puee, míǹ ní unikpiti un wɔ́b̀ dinibul din sá binandambee bí.
16 Uyidaan un kaa cáá dinyilee fìkì binib wanti ní. Ama un kaa néeń ki mùul̄ ki jīǹee kāntí mmaŋfafɔkɔn ní.
17 Unil un kūū u-jutee sáń ki cá dikaakulin ní, ubɔ ń taa cúú-u.
18 Unil un cáá tibulcinee làá ká difiil, ama un nóó mili mili saŋŋuee làá lítí ŋubɔ poon.
19 Unil un kù u-saakuee jīǹ ki díkì ní, ama unil un jòó ki pá tin kaa bí tibanee boonee làá nīn pée sá usoodaan ní.
20 Unil un bí deedeeyee làá ká dibiindi, ama un jìkì kí ká tigaajatee kaa làá lóó ditafadaaldi.
21 An kaa ŋān̄ unil ń pɔ̀ digàndi, ama fiii un bi làá nyíĺ kí ŋá-u ú jēe puee, unil ŋáań ikpiti gbanti.
22 Unil un cáá nnimbitaataamee jòó ki pá tigaajati boon ní. Waa nyí yii disool làá kɔ́-u.
23 Unil yaa wòon̄ u-jutee, kí dāá kúntée, úǹ ní u làá dāá jāam̀ ki jítiǹ un nìn pàkā-uee.
24 Un yaa yù u-baa nì u-na ki lì yii: «An kaa sá ikpitee!» udaan nì digaŋgandambi sá ubaanti ní.
25 Un cáá binib wanti pu nnimbitaataamee jāantí binib ní, ama un máká ti-Dindaan puee, an bútí-u ní.
26 Unil un máká úǹ u-ba puee sá ugbaan ní, ama un còom̄ nì iciinee làá ká difiil.
27 Un yaa pūǹ biwɔfibee, tiba kpá kí lóó udaan. Ama un yíì kaa fātìi tɔ́-bee làá kɔ́ mbusukpaanni.
28 Binikpitib yaa fōō mpɔnee, báà ŋma bāal̀ ní. Ama bi yaa kúntèe, deedeedambi bùtī tikpil ní.