Alaŋkpan Gbɔŋku 21

1 Ubɔti pɔbil sá kii mbunee ní ti-Dindaan ŋaan, ní laakin pú ní u yaa lèe, ú kpòotī-dì kí túĺ.

2 Unil dàkafī yii tin kɔkɔ u ŋáańee ŋān̄ ní, ama un nyí tin kā unil pɔbilinee di sá ti-Dindaan.

3 Mbimbim min ŋān̄ ki bí deedeeyee ŋān̄ ti-Dindaan cee ki jítiǹ saraabi.

4 Dibadakal nì dilambil di sá tin lèekī binikpitib kpitii ki dàkēe.

5 Ufaŋgiifiti landɔkɔi kɔ̄ntí-u digbilin ní, ama kujinjikilaapaau daan kóò disoolin ní.

6 Binib bin mɔ́ntì inyimɔn ki ká tigaajatee sá bin sáń ki kóò ŋkúm ŋaanee ní. Bi kāntí tiwan tin kaa bí tiban kaa yúntée ní.

7 Tipɔmbɔti tin binikpitib ŋáańee di kù-bi, kun puee bi yíì kí tɔ̄ deedee tuuŋŋi.

8 Unikpiti nóó nsan ŋun gɔ́ĺee ní, ama maanyiiba úǹ nóó nsan ŋun tèen̄ee ní.

9 An sɔ́ á nīn kóò digunlɔkɔlin ki jítiǹ si nì unimpu un néeń kujaauee ń nīn kóò.

10 Unikpiti úǹ pée nyàab̀ kí ŋá ikpiti ŋma ní, waa sūǹ u-bɔɔ gba saai.

11 Bi yaa dáaĺ ulambidaan tafalee, un kaa nyí tibee cíikí ní. Bi yaa dàkā uciŋfitee, u-nyil mɔ̀tīi kútí ní.

12 Deedeedaan nyí tin jītí unikpiti dicaŋkunee. U làá téé-bi kí tɔ̄ nnaabun.

13 Unil un yaa kpáá u-tafal kaa pílifì unandaan kuŋkuuntiiyee, u mun yaa láa bíi kūuntí ki nyàab̀ dijòońdee, baa làá dāá pīlifiǹ-u.

14 Tiwan tin bi yaa pú unil un gíí diŋuulee dibalinee sɔ̀ŋkī dipɔbil ní. Tiwampɔkaal tin a dūu nēeǹ udaan lookunee sɔ̀ŋkī diŋuul ní.

15 Kí ŋá tin tèen̄ee sá mmɔn ní ki tīī deedeedaan, ama ní ki sá tifaandi ki tīī bikpitiŋaliibi.

16 Unil un yaa kākatì u-ba ki wāatì dinyil saŋŋuee làá cùú ŋàl̄ bitaŋkpiibi ní.

17 Unil un néeń ki jīǹ mmɔnee làá kpántí usoodaan. Un néeń ki nyù ndaam ki jīǹ tijin tin mèeǹee kpá kí kpántí ugaaja.

18 Unikpiti làá fōō deedeedaan paaŋŋu kí kɔ́ nnaabun, ní biibiidaan ń fōō ibaamɔndaan paaŋŋu.

19 An sɔ́ unil ń nīn kóò u-baba kuteeun ki jítiǹ u nì unimpu un néeń kujaau u-nyɔkɔ pɔ̄ɔ̄yee ń nīn kóò.

20 Uciin dumpuee, tigaajamɔntiil nì ŋkpam bí ní, ama ugbaan úǹ yati kaa dɔ̀.

21 Unil un nyàab̀ kí nīn nóó deedee saŋŋu ki ŋáań tiŋanee làá dāá ká mmaŋfafɔkɔn nì deedee nì tinyool.

22 Uciŋfiti ŋūǹ ki kɔ́ bibaatandambi tiŋkin, kí gbá kí wīī digundi din bi máń ki tú-kì bi máká di-puee.

23 Unil un ŋúb́ u-nyɔkɔ nì u-limbilee nyāntí u-ba tibɔtin ní.

24 Kpeefam daan di cáá dilambil ní ki dàkà u-ba, tin kamaa ní u yaa ŋáańee, dibadakal di līī.

25 Tin uwutijoodaan bàà là ní kaa ŋūǹ kí kée di yì u-kúm, di sá yii waa kíikí kí dū u-ŋalii kí tɔ̄ ditundi.

26 Ŋyunti kamaayee u-nimbiliŋ pée máń tiwan pu ní, ama deedeedaan úǹ pūǹ kaa kpáàa dàkafī u-ba pu.

27 Binikpitib saraau sá ntimbiil ní, ŋma nín yíiń bí ŋá an saraabi nì ilandɔkɔkpiti.

28 Unil un lèekī nnyimɔn seerauee làá kpú, ama unil un gbìl̄ tibɔtee yaa làá sòoǹee, bi yàntī ú sòoǹ ní.

29 Unikpiti ŋáań kii u máká u-ba puee, ama ní deedeedaan úǹ máká u-saŋkindi pu.

30 Unil ciiŋyi àá u-nyil àá u-landɔkɔŋu kaa bí tiban ti-Dindaan nimbiin.

31 Bi bɔ́ntí utaamu kí yóoń dikɔ̀ndi wiiŋŋu pu ní, ama dijajil díǹ nyēeń ti-Dindaan baba cee ní.