22
1 Diyimmɔntiil jítiǹ tigaajakpaandi, disíndi jítiǹ sindaariya nì animbil kúti.2 Ugaaja nì usoodaan sá ubaanti ní, ti-Dindaan di pée náań bi-liitil kɔkɔ.
3 Un nyíǹ u-bee yaa ká nnaabu dòońee, u sáń kí báĺ ní. Ama bin kaa nyí tibee cáǹ bi-ba kí tɔ̄ poon ní án píĺ-bi.
4 Unil un sīntì u-ba taapuee fàŋkí ti-Dindaan ní. U-paatii di sá tigaajati nì tinyool nì mmaŋfafɔkɔn.
5 Ikuŋkum nì titalindi bí milimilidaan saŋŋu pu ní, un là kí fīī u-maŋfalee gɔ́ntí an wanti ní.
6 Dàkà kibiki nsan ŋun kì máaǹ kí nóóyee, báà kì yaa láa púĺ, kì kpá kí fá-ŋu.
7 Ugaaja cáá mpɔn bisoodambi pu, ní un jíń dipɔndee sá un u jíń dipɔndee yumbuu.
8 Unil un yaa búĺ tin kaa bí deedeeyee, agìŋ́kpaan ní u làá cā, di sá yii mpɔn ŋun u cáa ŋáań tipɔmbɔtee làá kúntí.
9 Unil un cáá tinitee làá ká Unimbɔti biindi, di sá yii u kpīintí unandaan.
10 Jà ulambidaan ní kunikpɔŋkpɔkɔu ń gbèen̄, mimmee kujaau nì asiibil mun kúntì dee.
11 Un néeń unil un pɔbil bí diba nì Unimbɔti ní ki sòoǹ nì dineendee bɔɔ di sá ubɔti.
12 Ti-Dindaan nimbiliŋ pée bá dinyil pu ní, ama waa fòol̄ biibiidambi bíǹ nyɔɔbuŋŋi.
13 Uwutijoodaan di lì yii: «Gbikinti bí mmɔŋki! M yaa nyáń u làá tin cúú-mi nsanni!»
14 Ubɔ nimpuu nyɔkɔ sá kpaalaa ní, unil un ti-Dindaan dūu fée di jēetí u-poon.
15 Digbaandi jíń kibiki pɔbilin. Mbambaan ŋun bi cáa dátí ki-tafalee di nyāntí-kì digbaandin.
16 Bi yaa bíi wɔ́b̀ unandaanee, bi bíi tìì-u tigaajati ní, bi yaa tí pú ugaaja tiwanee, bi bíi kɔ̄ntí-u disool ní.
Tibɔkpaafikaal tiba mun
17 Kpòon̄ a-tafal kí pīlifì biciŋfitiibi bɔti, pìitī a-pɔbil kí fōō tin m nyí kí dàkà-see. 18 A yaa dū-tì ki kpáafì a-pɔbilin ní ki yaa nyí-tì ki yóoǹ, án làá mɔ̄ɔkiǹ-si. 19 M là á dū a-mákal kí ŋá ti-Dindaan ni ní. An pu ní m làá dū tibɔti gbanti kí dàkà si mun díǹ. 20 M ŋmàn̄-si alaŋkpan mmuŋku nì saalaa ŋin sá isaŋki nì dinyilee. 21 Ŋi làá dàkà-si tin ŋān̄ ki sá ibaamɔnee, án nín làá ŋá pu bi yaa tú-see, á sòoǹ tibɔti ti-púee.
22 Taa fūkul̀ uwɔfi wanti yii u nín sá uwɔfee pu, kí taa wɔ́b́ unandaan ibɔsoon laŋki, u nín kaa cáá ubɔee pu. 23 Di sá yii ti-Dindaan di làá dāá mɔ̄tì bi-pu, ní kí dāá lēē binib bin fìkī-bee maŋfal.
24 Taa bɔ́ɔtí unil un cáá diŋuulee. Taa nīn tāatí unil un fòol̄ mbum malaayee. 25 Yaa sá fám a làá fōō bi-bimbikpitim, ní án sàl̄-si kii kutaliŋŋuee.
26 Taa fáá ubɔ ŋaan kí pòon̄ kí pà a-juti pɔndi. 27 A yaa kaa ká kí téeǹee, a dāa dɔ̄ a-lambaŋki pu ní bí dāá cúú kí tíkití.
28 Taa cóotí ditaŋkpal din a-baabi nìn cóoǹ kikpaanyɔkɔee kí nìkī.
29 Kpèè unil un di nyí u-tundi tiŋanee. U ŋūǹ kí cù bibɔtiibi cee kí tɔ̄ ditundi. Waa làá nīn sá utɔntɔnli un pu baa nyée.