Alaŋkpan Gbɔŋku 20

1 Ndaam yàntī unil ń kpántí ulambidaan, ní ndaam min pɔ̄ɔ̄yee yàntī ú kpántí kufuudaan. Unil un nyù-mì tikpilee kaa cáá iciin.

2 Ubɔti yaa gíí diŋuulee, an bí kii gbikinti nín sūǹ puee ní. Unil un yaa gbítì ubɔti ŋuulee nyàab̄ tibɔti ki tɔ́ u-ba pu ní.

3 An sá jilma ní ki tīī unil un yíití kunikpɔŋkpɔkɔuee. Ama ugbaan úǹ néeń kujaau ní.

4 Ukpaayoon yaa kaa kùn̄ tikpaal ti-yuntiŋu, waa dāa kāntí tiba kí cā kudiceeu.

5 Unil landɔkɔi sá kii lɔkɔ un nyóòyee nyim ní. Unil un cáá dinyilee di ŋūǹ kí dáaĺ-i kí nyāntí.

6 Binib tikpil lì yii bíǹ di sá bimɔntiibi. Ama ŋma di baasii ŋūǹ kí ká unil un bí deedeeyee?

7 Deedeedaan còom̄ deedee saŋŋu ní, u-kpátam boonee u-biyaamu làá nīn bí mmɔnni!

8 Ubɔti yaa kāl̀ kubɔsoondiin kí sòoǹ tibɔtee, dicilpu malaayee, u kpáàa pée wál̀ tin kaa ŋān̄ee.

9 Ŋma ŋūǹ kí lì yii: <M fíntì m-pɔbil píil̀ káŋkaŋ, m fíntì m-ba ki nyáń m-kpitiin?>

10 Unil ń nīn cáá ataŋkpee ŋin bi cáa ŋmàntī tiwan nyiŋfiŋuee nì tiwaŋŋmantikaal mili mili pu kí nīn cáa mùul̄ee, an sá tiwan tin ti-Dindaan née ní.

11 Kibiki tuuŋŋi pu ní unil béetí yii kun kì ŋée ŋān̄ ki bí deedee.

12 Ti-Dindaan di náań atafal bí nīn cáa pílifí nì animbil bí nīn cáa kpèé.

13 Taa nín̄ néeń ŋgeem, a làá dāá kpántí usoodaan. Nín̄ wāĺ ní kí ká kí jī kí díkí.

14 Uwandal lì yii: <Tiwan pɔ̄ɔ̄ kudaau>, ama u yaa līkiǹee ní u kíǹ ki pàkà u-ba yii an mɔ̄ kudaau.

15 Sindaariya gbōō, ní abeedimbil dɔ̄ tilèel, ama iciin nyɔɔbuŋŋi di sá tin pée cáá kunyampoouee.

16 Unil yaa yúl̀ unil un waa nyée boon kí pìnnì tibee, á fōō u-bɔkutil kí yóoń. U nín yúl̀ unicaan boonee puee, á fōō u-cee toolima kí yóoń.

17 Tinaayujin dá láá mɔ̄ unil nyɔkɔn ní. Ama boon kinyɔkɔ yaa gbée, an kpántí itaŋkpabiiti ní.

18 Isaŋki di yàntī unil ń ŋmā kí ŋá tin u bɔ́ntèe. A yaa làá cù kujaauee, a bɔ́ntí tiŋan ní.

19 Unil un cāab̀ u-juti disambiilee kaa bāal̀ tibɔti. Á taa nín̄ nōotí unil un di néeń kubɔcaauee.

20 Unil un di yaa kpēē ki sīŋkiǹ u-baa nì u-nee, u làá kpú kii fitila nín kúù dibɔmbɔndin puee ní.

21 Unil yaa jíń difakal malaayee, kí dāá kúntée, dàa cáá dibiindi.

22 Taa lì yii a làá téeǹ ikpiti in bi ŋá-see. Nín̄ pée máká ti-Dindaan pu, u làá dāá fīī-si.

23 Ti-Dindaan ná tiwaŋŋmantikaal tin kaa bí deedeeyee. Saniya un kaa ŋmàntī tiwan deedeeyee mun kaa ŋān̄ u-cee.

24 Ti-Dindaan di kpòotī unil u-saŋkindi poon. Nisaaleen làá ŋá mana kí béé laakin u cée.

25 An sá kutaliŋŋu ní unil ń lì u-nyɔkɔn fám yii: <M dū tiwan nee ki sú Unimbɔti,> àá kí pòon̄ Unimbɔti ipoon kí wàatī kí nín dàkafì^a.

26 Ubɔti un cáá iciinee béetí kí gàntì binikpitib malaa, ní kí yàntī bí dáaĺ bi-tafal ŋkpitim pu.

27 Unil fam sá fitila ní ti-Dindaan dūu tīī-u, ú nīn cáa ŋmíntí ki wāĺ u-poon fɔ́ŋfɔŋ.

28 Ubɔti ŋanti nì u-baamɔŋyi di wúń u-pu, tiŋan tin u ŋáańee di tíkí u-beejal.

29 Mpɔn di sá binipɔmbi nyooti, ní tiyikpipin sá bitikpilib nyaaŋku.

30 Tigbati buuŋyi sá tikpitil nyɔkɔŋu ní, míǹ mbaantiim ní i kóò kí bà unil poon fɔ́ŋfɔŋ.