19
1 Unil un sá usoodaan ki còom̄ deedee saŋŋunee sɔ́ǹ unil un di sá unyimɔndaan ki sá ugbaanee.2 An kaa ŋān̄ unil ń nīn bí kaa cáá nlandɔkɔ. Unil un di jìkì tikpilee làá lítí ikpitin.
3 Unil u-ba gbaandi yaa nāaǹ-uee, ní ú dūú nyìntī ti-Dindaan pu.
4 Tigaajati yàntī unil bɔɔbi mɔ̀tīi wīintí ní, ama ní unandaan úǹ nì u-bɔɔ ń yàkatīǹ tɔbin.
5 Unil un lèekī nnyimɔn seerauee kaa làá lóó ditafadaaldi, ní unil un mɔ́ntée kaa làá nyā ditafadaaldin.
6 Binib tikpil cáá nyɔɔmálmal ki ŋmàtíǹ binikpaambi, ní báà ŋma bɔɔ sá unil un pūǹee.
7 Usoodaan nabiyaamu kɔkɔ kaa là u-bɔti, míǹ ní u-bɔɔbi mun sáń ki wàatī-u. U yaa bàà là kí sòoǹ nì bee, baa bí.
8 Unil un yaa cáá iciinee néeń u-ba. Un di yaa pɔ́ɔǹ kí gbìl̄ tibɔti taapuee làá gbìl̄ mmɔn.
9 Unil un lèekī nnyimɔn seerauee kaa làá lóó ditafadaaldi, ní án làá nàan̄ unil un mɔ́ntée.
10 An kaa kítì yii ugbaan ń nīn bí mmɔnni, míǹ ní uyumbu kaa máaǹ kí nīn cáá bikpootiliibi pu mpɔn.
11 Unil un cáá dinyilee kaa gífí diŋuul malaa, tin yì u-nyootee di sá u súntí tin bi yīntiǹ-uee pu.
12 Ubɔti yaa gíí diŋuulee, an bí kii gbikinti nín sūǹ puee ní. Ama u-ŋanti sá kii dimalindi nín tòó kumoou pu puee ní.
13 Ugbaan sá dinimbinaamandi ní ki tīī u-baa. Unimpubɔmbɔdaan sá kii nnyim min còol̀ kaa gúǹee ní.
14 Unil ŋūǹ kí jī u-baabi diiku nì animbil difakal, ama ti-Dindaan di tìì uninja unimpu un cáá iciinee.
15 Diwutijool cāabìń ŋgeem, ní ŋkùm cútí un kā ki kpàl̄ iŋalee.
16 Unil un tɔ́ marabee wúń u-maŋfal pu ní. Un kaa kpèé u-bimbim tiŋanee làá kpú ní.
17 Unil un yaa pú unandaan tiwanee pīnnì ti-Dindaan ní, di sá yii ti-Dindaan làá dāá téeǹ-u.
18 Dáaĺ a-biki tafal ŋyunti ŋun dimákal dáá béé, ama á taa nín gíí diŋuul kí tin nyàab̀ kí kpɔ̀-kì ní.
19 Unil un yaa gíí diŋuul ŋkpitim puee máaǹ kí pà dipɔndi. Di sá yii a yaa yāntì-uee, a bíi tìì-u kunyannyaau ú fàtīí kíĺ dee.
20 Pīlifì isaŋki, kí kíí bí dàkà-si ní kí kpántí uciŋfiti.
21 Unil pɔbil poonee, u bɔ́ntí tiwan tikpil tin u làá ŋée, ama ti-Dindaan nín là puee di làá dāá pée ŋá.
22 Tin bi cí kí ká unil ceeyee di sá u-niti. An ŋān̄ unil ń nīn sá usoodaan ki jítiǹ ú nīn sá unyimɔndaan.
23 Unil ń fàŋkì ti-Dindaanee tìì dimaŋfal. Udaan làá nīn bí digbilin ní kaa làá gbìl̄ tibɔkpitil tiba pu.
24 Uwutijoodaan dùŋfī u-ŋal kí bɔ̄ disambilin, ama ní kaa ŋūǹ kí gíiǹní-ŋu u-nyɔkɔn.
25 A yaa gbáń ulambidaanee, un kaa nyí tibee kíǹ ki nyí nì u-ba ní. A yaa wòon̄ uciŋfitee, u làá bīfì iciin kí kūtì ní.
26 Kibiki kin sāaǹ ki-baa ki jìn̄ ki-nee sá kibiki kin bíil̀-bi ki kɔ́ǹ-bi icooyee ní.
27 M-biki, a yaa gbēeǹ kaa ti bíi pílifí isaŋkee, a fātì a-boon ki tīī dinyil dee.
28 A yaa yíiń maabiiban ń dāá lēē seerayee, waa dù deedee bɔti ki yíiń tiba. Tikpitil ní binikpitib jīǹ ki bí.
29 Bi bɔ́ntì ditafadaaldi ki cíitì bilambidambi, ní ki bɔ́ntì bigbaambi boon ki cíitì tigbati.