18
1 Unil un dàkafī u-baba puee kaa kàal̀ bin kíǹee cee, bi yaa là kí tūtuǹ-uee, ní ú gíí diŋuul.2 Tin mɔ̄ǹ ugbaanee kaa sá yii ú gbìl̄ tibɔti taapu, ama ú lēē u-landɔkɔi kí bíĺ mpaampiin pu.
3 Atuŋkpiti di cāabìń kpeefam, ní icoo yàntī unil ń fá u-nyooti.
4 Unil nyɔɔbuŋŋi sá kii nnyim min nyóòyee, mbun ŋun gbée nì nnyimbul ŋun nyim sá kii iciin ki pùub̀ee ní.
5 An kaa ŋān̄ bí dī dibɔkpil daan boon kí sòoǹ kí kpɔ̀ deedeedaan un cáá ibaamɔnee bɔti.
6 Ugbaan nyɔɔbuŋŋi cāabìń kunikpɔŋkpɔkɔu, ní tibɔti tin nyēē u-nyɔkɔnee dāa kúntí nì kujaau.
7 Ugbaan nyɔkɔ di nàantí-u, u-nyɔɔbuŋŋi sàtī-u kii kutaliŋŋuee ní.
8 Ubɔmbɔtukul nyɔɔbuŋŋi sá tijin tin mɔ̄ee ní, tì kóò unil poon ní fíŋfiŋ.
9 Unil un ŋáań diwutijool u-tundinee nì unil un bíiĺ ditundee sá kuyuu nì ku-bukul ní.
10 Ti-Dindaan yindi di wúń m-pu, deedeedaan yaa sáǹ kí kɔ́-uee, u bí ŋgbansɔŋfin ní.
11 Ugaaja gaajati sá-u kii kitiŋ kin bi máń digundi ki túee ní. U-landɔkɔŋu poonee, tì sá digundi din fɔ̀kɔ̀ yilpu yilpu baa ŋūǹ kí dàb̄ee ní.
12 Kí wàatī án nàan̄ unilee, u yòontí u-ba yilpu ní. Ama kí wàatī unil ń ká tinyoolee, see ú sìntī u-ba taapu.
13 Unil un kíikí tibɔti kí wàatī kí nín gbìl̄-tèe dàkà u-gbaandi ní ki kɔ̄ntí u-ba icoo.
14 Unil mákal di tīkintí-u u-weeŋyi poon, ama u yaa kaa ti cáá dimákalee, ŋma di gíti ŋūǹ kí tūtuǹ-u?
15 Unil un cáá dinyilee kāntí dinyil ní, ní un cáá iciinee nyàab̀ iciin ki kútí.
16 Tiwampɔkaal pìitī unil nsan ú ŋmā kí cù binikpaambi cee.
17 Unil un péé ki sòon̄ tibɔtee yati di bí kii tì ŋān̄ee. Ama u nì un cáá tɔbee yaa sòon̄ u-yatee ní bí ká yii an nyáń ti-ba.
18 Bi tòó kasi ní kí kúntí kujaau, ní kí pàtī bipɔɔbi.
19 An pɔ̄ɔ̄ unil ń sòoǹ nì kinabiki kin u yīntèe ki jítiǹ ú já kí fōō kitiŋ kin bi máń digundi ki túee. Kujaau táb̀ unil nyɔkɔ kii kudii kun pɔ̄ɔ̄yee punuubee ní.
20 Unil nyɔɔbuŋŋi di yì-tì ní ú ká kí jī. Tibɔti tin u sòoǹee di yàntī ní ú díkí.
21 Ibɔsoon ŋūǹ kí cáań dimaŋfal àá ŋkúm, unil un néeń ki sòoǹee máaǹ kí kíí kí fōō isoon paati.
22 Unil un ká unimpu ki cááyee ká tiwammɔntiil dee. An sá tiŋaŋkpaandi ní ti-Dindaan ŋá ki tīī-u.
23 Unandaan sòoǹ ki gbàam̄, ama ní ugaaja kíikí nì mpɔn.
24 Unil yaa cáá bibɔɔtiibi tikpilee, án ŋūǹ kí bīil̀-u, ama ubɔɔti ubɔ bí ki ŋūǹ kí nīn nákáǹ-si ki jītíǹ kinabiki.