17
1 Laakin ní a làá ká kinɔkatii kikuliŋŋi kí pɔ̀kɔ̄ ní ŋgbansɔŋfi bée sɔ́ǹ dicindi din poon busamɔntiibu bun pu tinan pée gbí, ama ní kujaau bée.2 Uyumbu un wálifèe làá dāá fōō u-dindaan jipɔɔn un kɔ̄ntí-u icooyee paaŋŋu, ní u nì u-dindaan jipɔmbi ń dāá yàkatī difakal din u yóoǹ-bee.
3 Ŋŋmi ní bi cáa cɔ́ŋkí kí béé animbil kúti timɔntiil nì sindaariyamɔnti, ama ti-Dindaan di cɔ́ŋkí unil pɔbil kí béé di nín sá diŋyee.
4 Unikpiti pílifíǹ binib bin sòoǹ anyɔɔbuŋkpitee, ní unyimɔndaan pílifíǹ bin sòoǹ ki bíiĺ bi-jutiibee.
5 Unil un bèel̄ usoodaanee sìí u-náanliu ní. Un juti yaa bí dinimbinaamandin an mɔ̄ǹ-uee kaa làá lóó ditafadaaldi.
6 Bitikpilib naantiibi di yì bi-nyooti, ama ní bibaatiibi yì bi-jipɔmbi yati.
7 Tibɔmɔntiil kaa máaǹ ugbaan, míǹ ní inyimɔn kaa máaǹ unil un bi tìì disíndee.
8 Bin cáá tiwan kí pɔ̄ee ceeyee, tiwampɔkaal sá kii diyimɔɔl sabilee ní. Laakin pú ní u yaa fātèe, an bútí-u ní.
9 Unil un súntí u-juti nín yìntīǹ-u puee kāntí bibɔɔtiibi, ama un pée téetí ki sòoǹ múlmulee yàkatī bibɔɔtiibi ní.
10 Á wòoǹ unyil dibaba ja làá tɔ̄ u-ni ditundi ki jítiǹ á gbá ugbaan anaalab dilaataal.
11 Unikpiti pée nyàab̀ kí nīn ŋáań tikpitil ŋma ní, ní un kaa ŋān̄ee bí ní ki gbì bin kíǹee taapu, ama bi làá dāá dū ntuun ŋun cáá ntoomee kí tɔ̄ u-pu.
12 Á tū digbiŋgbil din biyaamu bi cúúyee nsanni sɔ́ǹ ugbaan un bí ki tūǹ agbaantuunee.
13 Unil yaa dū tikpitil ki pàn̄ tiŋan tin bi ŋá-uee, u-dicaŋkun tikpitil làá nīn pée bí ní ki cá talku.
14 Á kíĺ kunikpɔŋkpɔkɔu sá kii á pìitī nnyimbilkaam kí pɔ̄-mì nsan mí pùub̀ee ní. Dūú gbèen̄ kí taa yàntī án kpántí kujaau.
15 Unil un pɔ̀ dibɔkpil daanee nì unil un kù ibaamɔndaan bɔtee, ti-Dindaan ná binib gbanti liitil.
16 Animbil yaa bí ugbaan ŋaanee, u làá dūú ŋá nì ba? Ú cáá dā iciinaaa? Míǹ kaa bí u-yilin.
17 Ubɔɔti dàkà u-neendi ŋyunti kamaa ní, ama kinabiki kíǹ bí kí tíkiń dinimbinaamandin ní.
18 Unil un kaa cáá iciinee di fátí ubɔ ŋaan kí pòon̄ kí pà u-juti pɔndi.
19 Un néeń kujaauee néeń ikpiti ní, un yòontí u-ba yilpuee dāa lítí.
20 An kaa bútí milimilidaan, ní nnaabu làá jēetí un kaa sòoǹ ibaamɔnee pu.
21 Un màl̄ ugbaanee pée bí kunimbaaun ŋma ní. Un kaa nyí tibee baa kaa ŋūǹ kí nīn bí mmɔnni.
22 Dipɔɔpindi cāantí iween ní, ama kunimbaau bàtī unil pɔŋŋu ní.
23 Unikpiti fòol̄ tiwampɔkaal dibalin, kí taa sòoǹ tibɔti ti-pú.
24 Unyil nimbikpeeŋu pée cɔ́ iciin pu ní, ama ugbaan úǹ nimbikpeeŋu cɔ́ ndandati ní kaa wāĺ tiba.
25 Ugbaan tìì u-baa kunimbaau, ní ki tìì u-na un màl̄-uee nnyɔɔtun.
26 An kaa ŋān̄ bí dáaĺ maanyiiba tafal báà fiii pu, an kaa tí ŋān̄ yii bí gbá jilmadaan u-baamɔŋyi pu.
27 Unil un kaa sòoǹ tikpilee di cáá iciin, ní un dàkafī kí nín sòoǹee di cáá dinyil.
28 Ugbaan gba yaa kā ki ŋmí, a làá dū-u kí yíiń uciŋfiti ní. U yaa kā ki táb́ u-nyɔkɔ, a làá lì yii unyil ní.